2 TIMOTIUS4
1Ma Kristus Yesus aha woboali o duniano neena mangale wo'iha'imi nage o nyawa 'ayowango-wangohi de yohone-honengo'au; de una aha wopareta mangale wo'oana. Geenau ho ngoi togaaho'o tohigou-goungu ngona'a ma Jou ma Dutu de ma Kristus Yesus manga biono'a, geena la:2Halingou ngona nohingahu o behehongo ma Jou ma Dutuno. Halingou nomahidiai'u la 'aitauri'a nohingahu o behehongo geena ngaro o nyawa yohigihene bolo 'ayoolu'u yohigihene. No'itaaele de no'ihi'adiai nage 'aiti-tiaiwahi de o nyawa manga hininga nohi'uata. No'ihidemo ona'a o'ia nage halingou ona yadiai, de halingou notongohono ma oraha no'idoto'o.3Hababu aha ma oraha yaadono o nyawa ayoolu'u yohigihene o do-doto'o nage iti-tiai. Ma ona aha yamote'e 'atoona ma hirete manga mau, de yo'ipolu o guru manga lepe la yo'idoto'o ona'a o'iau hona nage yoiheni'a iha-hanaanga.4Ona aha yomapongo'a nage iti-tiai'a, ma aha yohigihene o jarita ma hila-hila nage ma haidaa oiwa-iwa.5Ngaro o huha de o hangihara bolo o hananga ma hidogorona'a ma ngona halingou naa'unu ani roehe napareta. Notongohono o hangihara ma doda'a, nadiai ani arajanga nohingahu o Habari ma Owa, de nohidagi nohidi-diai hiadono naduanga ani 'arajaanga, geena la ma Jou ma Dutu nowileleani.6Neena mangale ngoi, 'aitaaowau aha tohonengou de 'ai wowango done aha 'imatero harage de o angguru yodogopoa imadadi o hu-huba ma Jou ma Dutu'a. Ngoi ma du-dubehi tamada'a o dunia neena.7Ngoi tani'o'au totandingi tohigou-goungu'u, de taadoninou ma gare ma hibobaha'a. De ngoi tatapu todomote'e o Habari ma Owa nage ngone panga'u.8De ma oraha neena, nage 'ai gangela ma hewa 'ida-damaau ngoi, hababu ngoi towango imote'e ma Jou ma Dutu awi mau. De a ngoiwa duga done aha tama'e a hewa geena, ma o nyawa moi-moi nage yoda-damaa de yaigo-igo ma Jou awi bo-boa ma aha yama'e. Ma oraha o dunia ma baha'a, ma Jou Yesus o ha'imi nage wo'adi-adili guuna aha woi'ula o hewa geena.9Nomahidaila'o la nomataitino ngoino,10hababu o Demas woida'aloa'au hababu una iholoi waigo o dunia ma haala neena. Una wotagio'au o Tesalonika'a. O Kreskes wotagio'au o Galatia'a, de o Titus una o Dalmatia'a.11Duga 'ao Lukasa nage womanoa de de ngoi. Nowiaho'ino o Markus de nowiahano nima'anii'ino, hababu una idadi waduhunu 'ai 'arajaanga.12Ngoi towihulo'o'au o Tikhikus o Efesusi'a.13Na'o na'aino de naahano 'ai baju i'a-'a'ulu'u nage tamada'u o Troaso'a o Karpus awi woa'a. De ma nahano 'ai o bo'u-bo'u, ma iholoioli o bo'u-bo'u nage o 'aewani ma'aino yadi-diai'u.14O Aleksander o tambaga wodi-diai guuna, woidiao'au o haala nage duru iti-tingi'ai ngoino. Ma Jou aha wabalaha una'a imote'e touna awi di-diai.15Ngona mahirete halingou nomahitiari una'a hababu una duru wolawana tongone nanga do-doto'o.16Ma oraha ngoi ma di-dihila'a tomadapaluhu, 'amoiwa ihiboa. Ona moi-moi ida'aloa. Tanu ma Jou ma Dutu uwa wo'ihihowono ma haala neena!17Duga ma Jou tatapu naga de de ngoi. Una wohi'uata 'ai hininga hiadono taa'unu tohingahu o Habari ma owa geena, la moi-moi o nyawa nage o Yahudio'awa yo'o'iihene. De 'ogeena ma Jou ma Dutu woiduhunu woihipidili o nyawa-nyawano nage hali'i yomau 'itoomau ngoino.18Ma goungu ma Jou aha woihipidili naga o hagala niata iti-tiiha ngoino itaali. Una aha woiaha 'aiha-hanaanga Awi pareta ma ngii'a o horoga'a. Tanu o nyawa-nyawa wihilamo'o Una'a 'aihiado-adoni'a. Amin.19'Ai tabea ongo Priskila de o Akwila'a, de o nesiforus awi woa ma doda'u.20O Erastus womanoa o Korintuso'a, de o Trofimus towimada'u o Miletuso'a mangale wigogamu'u.21Nomahidaila'o de ma goungu la 'ayaadonuawahi o loo'o ma oraha ena noboa'au neenano. O Ebulus, o Pudes, o Linus, ongo Klaudia de nanga riado-doto moi-moi nage 'ao ngonga'u moi manga tabea yohidingoto ngona'a.22Tanu ma Jou naga de de ngona. Tanu ma Jou ma Dutu awi owa naga de de ngini Riadodoto!
Ngoi o Paulus tini tabea.
Ngoi o Paulus tini tabea.
The Seed Company