O FILEMON1
1Filemon mia riadodoto nimihiboho-bohono de pomahida-da'arajaanga pohingahu o Habari ma Owa. Ngoi o Paulus 'ibui'a hababu tohingahu o Habari ma Owa ma ngale ma Kristus Yesus. Ngoi de o Timotius nage 'ao ngo-nga'u moi de de ngone, miohidingoto o hurata neena ngona'a,2de o jama'ati'a nage yomato-toomu ani woa'a. De ma hurata neena ma miohidingotoli nanga bilangi'a ongo Apfia, de o Arkhipusi'a nanga manai nage pomaduhunu pomahida-da'arajaanga.3Ngomi miogaaho'o tanu ma Jou ma Dutu to ngone nanga Dea de ma Jou Yesus Kristus niwi'ula ngini'a o bara'ati de o hanaanga.4Ma oraha tohaubayanga ma noimi 'a tonida-danganono ngona de totemo 'amaowa'a ma Jou ma Dutu'a.5Hababu toihene ngona ani ngo-nga'u i'uata nanga Jou Yesusi'a, de no'idora ma Jou ma Dutu awi awaha'a moi-moi.6Ngoi tohaubayanga la ngona de o nyawa yonga'u-nga'u niohininga moi, la ngone idadi 'iholoioli pomangariti ma Jou ma Dutu awi hininga ma rahai ngoneno ho done aha powipuji ma Kristusi'a.7Filemon ai riadodoto, ngoi togarago ma de 'ai hininga iholoi 'uata hababu ani dora ma Jou ma Dutu awi 'awaha moi-moi'a! Ma Jou ma Dutu awi 'awaha moi-moi yomagarago'auoli hababu ngona.8De ma nge'omo o 'uaha nage ma Kristus woi'ulano, ho ngoi tomooini tonihulo'o mangale nadiai o'ia nage halingou nadiai.9Duga hababu poma'adora riadodoto, ho atogaaho'o duga bato. Ngoi neena o baluhu de ma oraha neena ibui'a hababu tohingahu o habari mangale ma Kristus Yesus.10Ngoi o Paulus tohingahu 'ai ga-gaaho'o moi ngona'a geenala mangale o Onesimus, nage towidiai harage de ato ngoi 'ai ngoa'a ma dutu, hababu o buio'a neena towihingahu o Habari ma ngale o Yesus ho wonga'uo'au.11Ma hila una awi haidaa 'oiwa ngona'a, ma neena naga de awi haida'au 'a ngona'awa duga bato ma ngoino ma.12Ma oraha neena una nage duru towihiboho-bohono guuna towihulo'o'au wolioli ngona'a.13Tanu tomau towitumungohi neena'a mangale ani ngaliti, la una idadi woiduhunu cara'iau naga ma daao ngoi ibui'a neena, hababu tohihabari o Habari ma Owa ma Jou ma Dutuno.14Ma ngoi toolu'u towituumungu na'o anohimode'uahi. Ngoi iholoi taigo na'o ngona nodiai 'a de to ngona ma hirete ani hininga ma mau; ngoi atoolu'u tonigegoto.15Poelua geenau ma hababu ho o Onesimus de ngona riadodoto nima'atinga'a 'a oraha moi riadodoto, la nowidawongoli 'ahiado-'adoni'au.16Ma oraha neena una guuna to ngonawali ani gilaongo, ma una 'iholoioli de o gilaongo. Una geena nanga riado-doto o ngo-nga'u moi nage powihiboho-bohono. Ngoi duru towihibohonou, de ngona ma maraio'au iholoioli nowihibohono. Nowihibohono una'a hababu una geena ani gilaongo de una ma ani riadodoto nage niboringa'u ma Jou'a.17De hababu ngona namao'u ngone porimoi hababu ngone 'a o ngonga'u moi, geenau ho nowidawongou o Onesimus harage noidawongo ngoi.18Na'o naga de awi hala'a e'ola awi nagimi ngona'a, mada'a la ngoi'ou tamo'u geena moi-moi.19Oraha neena ngoi'ou ma hirete tatulihi neena: Ngoi o Paulus aha tahangu o Onesimus awi nagimi ngona'a. (Ma raio'au 'aiparaluuwau ngoi tonihidanganono na'o ngona ma hirete 'ani nagimi de ma 'ena ngoio'a, geenala 'ani wowango ma hungi ma ngale nonga'uo'au.)20Ho riadodoto Filemon, hababu ngone poboringa'u ma Jou Yesusi'a bee'a noiduhunu, nadiai ai hininga 'igaragoli.21Ngoi totulihi o hurata neena hababu tana'o'au na'o ngona aha nadiai o'ia nage ngoi togaaho'o. De ngoi tana'o riadodoto ngona aha nadiai 'iholoi'a de geena.22De tanu noiduhunu nohidiai'u o ngii ani woa'a ma ngale ngoi, hababu ngoi tongano-nganono ma Jou ma Dutu wohigihene ti ngini riadodoto moi-moi nia haubayanga de woiaha woihiigilioli ngini'a.23O Epafras nage nengo'a dau de de ngoi miobui'a hababu miohingahu o habari ma ngale ma Kristus Yesus, awi tabea wohidingoto ngini'a.24'Ai ma-manai nage pomahida-da'arajaanga manga tabea yohidingotoli ngini'a, geenala o Markus, o Aristarkhus, o Demas de o Lukas.25Togaaho'o la tanu ma Jou Yesus Kristus niwihibara'ati!
Ngoi o Paulus, tonitabea!
Ngoi o Paulus, tonitabea!
The Seed Company