2 TIMOTIUS3
1Timotius halingou nana'o nohidi-diai neena: O wange ma hibobaha'a naga aha o huha ilepe.2O nyawa-nyawa aha yohiamo-amo'o 'atoona mahirete manga roehino, de o pipi yodopo'ana, yoere de yaigo manga demo-demo 'ayomatibanguau. Ona yaigo yohohedu o nyawa'a, yo'idu'uata o baluhi'a, 'ayana'owa yo amaowa'a, de yabuhulu o'iau hona nage ma Jou ma Dutu waigo-igo.3Ona ayoolu'u yo'idora o nyawa'a, ayoolu'u yo'iapongo o nyawa'a, ona yaigo yodiai o nyawa ma homoa'a yo'ironga ma diiha, de yaa'unua yomatongohono yaigo yomarohu-rohu, de 'ayaigowa yaowa-owa.4Ona yaigo yo'iwu'unu manga manai ma hirete, yomahiie-ie de yomatibanguawau. Ona iholoi yaigo o dunia ma hananga de awi domote'uwau ma Jou ma Dutu'a.5Na'o po'ige-gelelo ona ma Jou ma Dutu'a wihuba-huba, ena momongo ma goungu geena ona 'ayoolu'u ma Jou ma Dutu awi 'uaha 'imanoa manga hininga'a. O nyawa-nyawa nage harage o geena uwa nomahidutu'u o na'a.6Naga ona'a yamuluo naga yooahamo'au woa-woa'a ma nge'omo yo'ielu'u de yo'ia'uno'au o nge-ngewa'a nage yo huma-huma, nage manga baradoha ilamo'o de o nyahihuu 'iini-ini'o'a yo'iparetano.7O nge-ngewe'a goona 'aitauri'a yomagaaho'o yo'idoto'o, ma 'omaiwa yaa'unu yana'o o do-doto'o iti-tiai nage ma Jou ma Dutuno.8Harage amahila o Yanes de o Yambres yolawana o Musa'a, 'ogeenali ma o agama yodoto-doto'o ma ngelu-ngelu'u goona, yolawana o do-doto'o ma Jou ma Dutuno. Toona manga di-dibanga de manga ngonga'u itiiha'au.9Ngaro ona yohitaili yo'ielu'u o nyawa'a ma ona done 'ayo'ia'unua, hababu o nyawa moi-moi aha yana'o toona manga huma harage de ma hila o Yanes de o Yambres.10Ma ngona nanii'o'au tongoi 'ai do-doto'o, 'ai go'oie de 'ai gogelu'u, de 'ai wowango madumutu. Ngona mahirete nama'e'au cara'iau ngoi tonga'u igou-goungu ma Yesus Kritusi'a de to'idora o nyawa-nyawa. Ngona ma nana'o 'ai dongohono de cara'iau ngoi tatapu totongohono.11Ngona nama'e'au ngoi ihi'ihaa de tohangihara. Ngona na'o'ina'o o'ia nage idadi ngoio'a o Antiokhia'a, o Ikoniumo'a, de o Listra'a. De ngona nana'o'au moi-moi 'ai hangihara! Duga ma Jou woihihalamata geenano moi-moi.12Igoungu moi-moi o nyawa nage yomau manga wowango 'iofi de yorimoi de ma Kristus Yesus, aha yo'ihi'ihaa,13Ma o nyawa nage yoti-tingi'ai de nage yoelu-elu'u aha iholoi 'ayolepe monga yotingi'ai. Ona yo'ielu'u o nyawa ma homoa'a de ona ma mahirete ayo'ielu'u.14Ma ngona Timotius, halingou nomahiga-gao igou-goungu o do-doto'o nage iti-tiai'a nage nihidoto'o'au de nage nanga'uo'au, hababu ngona nana'o'au nagonau nage nidoto-doto'o.15De halingou noda-danganono bali ngona anoete'ohi ena nana'o'au o Bo'u Iofi-ofi. O Bo'u Iofi-ofi geena idadi nihimangariti mangale nama'e o halamata ma nge'omo nonga'u ma Kristus Yesusi'a.16Moi-moi nage ihitulihu'u o Bo'u Iofi-ofio'a, geena ma Jou ma Dutuo'a de yaino, de ma haidaa'a mangale idoto'o nage iti-tiai, mangale 'inataaele de 'inatiai nage aihala, de mangale yo'idoto'o o nyawa la yowango imote'e ma Jou ma Dutu awi mau.17De o geena ma Bo'u Iofi-ofi geena, o nyawa nage wileleani ma Jou ma Dutu idadi yaa'unu mangale yodiai o hagala arajaanga nage yaowa-owa.
The Seed Company