2 TIMOTIUS2
1Ee Timotius, ngona nage harage de 'ai ngoa'a madutu! Tanu ngona idadi no'uata de ma Jou ma Dutu awi hininga ma owa nage wona'ula'au ngoneno, hababu ngone porimoi de dema Kristus Yesus.2Ma hila ngona noiheno'au moi-moi 'ai dodoto'o nage todoto'o o nyawa yolepe-lepe manga biono'a. Ngona halingou no'ihiga-gao o nyawa-nyawa'a nage idadi noinga'u de nage yopade yodoto'o o nyawa ma homoa'a.3Harage o hurudado ma owa womatengo wotongohono wohangihara, 'ogeenali de na'o ngona nowileleani ma Kristus Yesusi'a, halingou notongohono nohangihara de de ngomi.4O hurudado womatengo na'o, woparangou geena awodaali'awahi o haa-haala ma homoa. Hababu womau awi 'apita awi hininga ihananga.5Womatengo wotandingi yoma'arebehe mangale o hewa yomadahali'i geena halingou wodomote'e toena ma autoranga moi-moi.6Wora-rari womatengo nage wo'araajanga wohiga-gangela, geena yadaene halingou una ihila waehe ma hasili7Natibanga nohidi-diai o'ia nage tohidemo'au, hababu ma Jou aha woniduhunu la idadi nomahinao moi-moi geena.8Noda-danganono neena: o Habari ma Owa nage tohingahu-ngahu geena geenala o habari mangale ma Yesus Kristus awi guti'u o Dautino, Unau geena ngaro wohonengo'au ma 'awomomi'o'ali.9Hababu o Habari ma Owa geena tohingahu, ho ngoi tohangihara hiadono 'ili'o de o rante o buio'a harage woti-tingi'ai moi. Ma ma Jou ma Dutu awi demo 'oidadiwa yali'o.10Mangale geenau ngoi totongohono tamo'u moi-moi geena mangale o nyawa-nyawa manga owa nage ma Jou ma Dutu wo'ili'o'au, la yama'e o halamata ma nge'omo ma Kristus Yesus de yama'e o puji de o horomati de de Una 'ahiado-adoni'a.11Igoungu itiai o demo neena,<<Na'o ngone pohidohonenge de de una,ngone ma aha powango de de una.12Na'o ngone pohangihara de tatapu ponga'u ma Yesusi'a,geena ngone aha popareta ma de de Una.Na'o ngone pomahipongono Una'a,Una ma done aha womahipongono ngoneno.13Ngaro ngone powimada,Una tatapu wonamadawa,hababu Una halingou wadiai imote'e naguunau Una geena.>>14Halingou no'ihidanganono o nyawa-nyawa'a mangale moi-moi neena. Ma Jou ma Dutu awi biono'a, no'itemo ona'a la uwa yoma'aributu mangale o demo-demo. O ributu harage nage geena ma haidaa 'oiwa, ma duga irua nage o nyawa yohigihe-gihene.15Ngona nadiai ani arajaanga nohidi-diai la ma Jou ma Dutu nohanaanga ngona'a. Nomaduhunu la uwa nimae'e mangale to ngona ani arajaanga, la nohidoto'o de yadae-daene o do-doto'o nage iti-tiai ma Jou ma Dutuno.16Nomahidiato'i'a o hagala demo nage ma haidaa 'oiwa-iwa de nage wihohedu ma Jou ma Dutu. O demo harage o geena-ena duga 'a idadi o nyawa manga tingi'ai yodoholoi17Toona manga do-doto'o itagi harage ao panya'e o kankere. Naga ona'a geenala o Himeneus de o Filetus.18Ona oyani'uwau o do-doto'o nage iti-tiai, ona yotemo bali ona nage honengo'au yomomi'oli, geena idadio'au. De manga ade-ade 'ogeena, geena ona ya'aruae o nyawa munu'a manga ngonga'u.19Ngaro 'ogeena ma Jou ma Dutu awi jama'ata, tatapu yo'uata harage de o woa ma ba-bangini. Geena ma de'uo'a ihitulihu'u onane, <<Ma Jou wo'ina'o to una awi awaha.>> De <<O nyawa nage yomaade-ade na'o ona goona ma Jou awi 'awaha, ona halingou yomatoruhu yodiai nage o diiha>>.20O woa nage 'iamo-amo'o ma doda'a, ma pa'a-'aha 'iini-inio'a. Naga munu'a nage yadiai'u o hala'ano bolo o gurahino, geena yapa'e nage ma oraha o nyawa yola-lagomo yoboa. Duga maregu yadiai'u o gotano bolo o tona'ino, geena 'a ma wo'a ma dutu yapa'e o wange ihinoimi21O nyawa nage yomatogumo'au yodiai o dingi'ai, ona geena harage de o pa'a'aha 'ira-rahai ho yo'ipa'e o 'arajaanga 'ira-rahaio'a. Ona harage de o pa'a-'aha 'iofi-ofi nage yatinga'i'a ma ngale manga tuanga wapa'e. Ho ona geena ma Jou ma Dutu wo'ihidiai'u'au yo'ipa'e o hagala 'arajaango'a nage yaowa-owa'a.22Noma'a'uli'a o nyawa ma goo-goo manga nyahihuu'a. Nomahidaila'o mangale nowango imote'e ma Jou ma Dutu awi mau, nohingounu awi dodoto'o de no'idora o nyawa-nyawa'a, de nima'aaha nimahi'adi-diai. Nowango 'ogeena de o nyawa nage yomahigaho-gaho'o ma Jou'a de manga hininga ibe-berehi.23Uwa nomadi-dini'i de o nyawa yoma'a-aributu o haala nage 'ihuma-huma de nage ma haidaa oiwa, hababu ngona nana'o, yoma'aributu geena duga imadadi o gangamo.24O nyawa nage yo'arajaanga mangale ma Jou ma Dutu 'oyadaenuwa yoma'aributu. Ona halingou manga hininga irahai o nyawa'a moi-moi. Ona halingou yobarija yodoto'o yohidi-diai, de yotongohono,25ona halingou manga hingina 'imai yo'idoto'o o nyawa-nyawa'a nage yaigo yolawana, hababu ngone 'apana'owa poelua ma Jou ma Dutu wo'i'ula o wa'utu mangale yomatogumu o baradoha yodiai de yana'o o do-doto'o nage iti-tiai.26De o geena, ona idadi yomana'oli de yo'ipidili o To'ata ma 'Oana ma pareta nage yo'iparetano ona'a, hiadono ona oyani'uwau to ena ma mau.
The Seed Company