O PAULUS AWI HURATA MA MODIDI O TESALONIKA MA JAMA'ATI'A3
1Ho ri-riadodoto, oraha neena togaaho'o la nimihihaubayanga ngomi. Niohaubayanga la o habari ma Jou Yesusino itaiti ihidagi de o nyawa yadawongo de ma owa. Harage ma hila nginioli,2De ngini ma niohaubayanga la ma Jou ma Dutu wonahihalamata, la uwa hiadono o nyawa nage duru yoti-tingi'ai ma mihangihara. Hababu 'a o nyawa moi-moiwa yonga'u o Habari ma Owa nage ma Jouno geena.3Ma ma Jou Yesus itauri'a wodiai o'ia nage wotemo'au. Una aha nimiduhunu la nia hingina 'i'uata, de niwigoana nage o dingi'aino.4De mionga'u na'o ma Jou Yesus, niwiduhunu la ngini idadi niowango harage miohulo'o'au ngini'a, de nimatoruhuwa niodiai 'ogeena.5Ngomi miohaubayanga la tanu ma Jou nimihidoto'o la ngini 'iholoioli niomangarati bali ma Jou ma Dutu niwihibohono ngini'a de 'iholoioli niomangarati bali ma Kristus niwiduhunu ho niotongohono niohangihara.6Ri-riadodoto! De ma Yesus Kristus to ngone nanga Jou awi 'uaha, ngomi miohulo'o la uwa nima'amanai de nanga riadodoto yotu-tuudu'u yo'arajanga, de yodi-dinii'uwa o do-doto'o nage mihingahuo'au.7Hababu ngini mahirete niana'o'au na'o ngini halingou niowango harage ngomioli. Ngomi miopeleeha mio'arajaanga nage ma oraha ngomi de de nginiohi.8Ngomi 'amiohangu moi-moi o inomo ma oraha nagoonano bato miama'e. Ngomi mimaduhunu mio'arajaanga o wutu de o wange la moi ma uwa miohidadi huha naga nginio'a.9Ngomi miodiai 'ogeena ma hababuwa mia haaka 'oiwa mangale jama'ata nimiduhunu ngomino. Ma mioolu'u miapa'e o haaka geena. Mia gangela 'ogeena, hababu miomau la ngini niama'e 'oiau ge miodiai de nimadulu ngomino.10Ma oraha ngomi de nginio'ahi, ngomi miohulo'o'au ngini'a onane, <<O nyawa nage yoolu'u yoma'arajaanga, 'oidadiwa yoodomo.>>11Ngomi miotulihi neena, hababu mioihene bali naga nginio'a munu'a yotuudu'u. Ona 'o'iawau moi yadiai ho duga, 'ayotawo-tawongo o nyawa manga haala.12De ma Jou Yesus Kristus awi 'uaha, ngomi mio'ihulo'o mio'itemo-temo o nyawa-nyawa goona, la yoma'arajaanga yohidi-diai mangale to ona mahirete manga wowango.13Ma ngini ri-riadodoto uwa nio 'angela niodiai yaowa-owa.14Poelua aha naga o nyawa munu'a yoolu'u yodini'i o'ia naga nage miohidemo'au mia hurato'a neena. Nimahitiari o nyawa'a nage 'ogeena-ena, de uwa niogiamanai de de ona la yo'imae'e.15Ma uwa nio'idiai nia haturuu; duga nio'itemo-temo harage nia riadodoto.16Ma Jou Yesus geena o dame de o hanaanga ma titi, tanu Una 'aitauri'a niwi'ula o dame de o hanaanga naga o hagala moi-moio'a. Tanu ma Jou naga de de ngini riadodoto moi-moi.17O tabea ngoio'a, geenala o Paulus. Ngoi mahirete to totulihi ma do'u neena. Neenau ma du-dungu nage tohinoa'u 'ai hurata moi-moi'a.18Tanu nanga Jou Yesus Kristus niwihibara'ati riadodoto moi-moi.
Ngoi o Paulus tinitabea.
Ngoi o Paulus tinitabea.
The Seed Company