O PAULUS AWI HURATA MA MODIDI O TESALONIKA MA JAMA'ATI'A2
1Ri-riadodoto, ma oraha neena ngomi miomau mioade-ade mangale ma Yesus Kristus to ngone nanga Jou aha woboali, de mangale ma oraha Una wonatoomu la pomanoa de de Una. Ho ngomi miogaaho'o miohigou-goungu ngini'a,2uwa itai-taiti nia hingina ihuha de niododato, mangale naga o nyawa yohihabari na'o ma Jou Yesus Woboali ma Wange yaadono'au. Poelua ona yotemo bali o habari geena o Omaha 'Iofi-ofino, bolo naga o do-doto'o moino, bolo ona yotemo ngomi miatulihu'u naga mia hurata moi ma doda'a.3Uwa nimahigumada o nyawa nielu'u ngaro cara'ia naga bato ma, hababu madi-dihila'a ma wange geena yaadono, halingou idadi ma hala neena ihila: o nyawa manga lepe aha witili'utu ma ma Jou ma Dutu, de Ma nyawa Woti-tingi'ai guuna aha womahimaiti. Ma nyawa Woti-tingi'ai guuna maraio'au aha woohama o naraka'a.4Ma nyawa Woti-tingi'ai guuna aha wilawana ma Jou ma Dutu'a, wotemo bali una iholoi wo'uaha de o 'iau hona nage o nyawa yahuba-huba, bolo o gomanga moi-moi nage o nyawa yadiai manga Jou ma Dutu. De una aha wogogelie ma Jou ma Dutu awi Woa ma doda'a de wohi'awaha bali una geena ma Jou ma Dutu5Ma raio'au nioda-danganono, tinihidemo'au moi-moi geena ngini'a ma oraha ngoi 'a de de nginiohi o Tesalonika'a.6De ngini niana'o'au ma oraha neena o'ia nage wituumungu Ma nyawa Woti-tingi'ai guuna. La ma nyawa Woti-tingi'ai guuna aha womahimaiti nage 'a ma oraha ma Jou ma Dutu wohitatapuo'au yaadono.7O To'ata ma 'Oana 'imulaengo'au 'i'arajaanga 'imahiiu-iunu la o nyawa-nyawa wilawana ma Jou ma Dutu, ma demaenahi wituumungu'u. Ma de ma oraho'a, ma Jou ma Dutu aha wihitinga'a o nyawa nage witu-tuumungi'a.8Aha de o nyawa ma diiha guuna womahimaiti. Ho nage ma oraha ma Jou Yesus woboali, Una aha witooma o Nyawa woti-tingi'ai guuna de o omaha Awi uluno, de wibinaha de awi bo-boa nage duru 'ira-rahai.9O nyawa ma diiha guuna aha womahimaiti de o 'uaha o To'ata ma 'Oanino. Una aha wodiai o haala 'ihera-heranga 'iini-ini'o'a de o haala 'ila-laagomo mangale o nyawa wo'ihiaga.10Una aha wo'ielu'u o nyawa-nyawa de o diiha 'iini-ini'o'a, la wo'ielu'u o nyawa-nyawa nage aha yomurutu. Ona geena aha yomurutu hababu ona yaigowa de yoolu'u yoihene o do-doto'o nage iti-tiai, nage idadi yo'ihihalamata11Ho mangale ona yonga'uwa, ma Jou ma Dutu wo'ihipidili'a yo'ielu'u de yodini'i o 'ia naga nage iti-tiaiwa.12Ma Jou ma Dutu wodiai 'ogeena, la o nyawa moi-moi nage yaigo yodiai o 'ia naga nage iti-tiiha, de nage yonga'u-nga'uwa o do-doto'o nage iti-tiai.13Ri-riadodoto nage ma Jou niwihiboho-bohono! Ngomi 'aitauri'a halingou mio'amaowa'a ma Jou ma Dutu'a hababu ngini, hababu 'amadi-dihilahi ma Jou ma Dutu niwiili'o'au mangale niwihihalamata. Geena idadi hababu o Omaha 'Iofi-ofi 'ima'arajaanga nginio'a, la niodadi ma Jou ma Dutu awi 'awaha, de hababu nionga'u o habari iti-tiai ma Jou ma Dutuno.14Ma Jou ma Dutu womau 'ogeena, ho Una niwiaho'o la o halamata niama'e ma oraha minihingahu ngini'a o Habari ma Owa mangale ma Yesus Kristus. De 'ogeena, ngini aha nipuji de nihoromati de ma Yesus Kristus, to ngone nanga Jou.15Geenau ho ri-riadodoto, halingou nia ngo-nga'u 'iua-'uata de nimahiga-gao 'igou-goungu o do-doto'o iti-tiai'a nage miohingahu-ngahuo'au ngini'a, ma oraha miodoto'o de mioade-ade bolo de miahurata.16Tanu ma Yesus Kristus to ngone nanga Jou, de ma Jou ma Dutu to ngone nanga Dea, niwilalu de niwihi'uata niahingina la ngini idadi nima'arajanga de niohingahu o 'iau hona nage yaowa-owa. Hababu ma Jou ma Dutu wonahibohono de hababu awi hingina ma rahai, ho wona'ula o lolaru nage 'ahiado-adoni'a de pomahingano no yaowa-owa.
The Seed Company