O PAULUS AWI HURATA MA MODIDI O TESALONIKA MA JAMA'ATI'A1
1Tabea, ri-riadodoto o Tesalonika ma jama'ata, nage niodadi nanga Dea ma Jou ma Dutu awi 'awaha, de to ma Jou Yesus Kristus awi 'awaha! Ngomi geenala o Paulus o Silas de o Timotius.2Miogaaho'o tanu ma Jou ma Dutu to ngone nanga Dea de ma Jou Yesus Kristus niwi'ula ngini'a o bara'ati o dame de o hanaanga.3Ri-riadodoto, ngomi halingou 'aitauri'a mio'amaowa'a ma Jou ma Dutu'a mangale ngini. De miodiai 'ogeena geena itiai, hababu nia ngo-nga'u o Yesusi'a 'a i'uata monga, de 'iholoioli 'a nima'adora monga.4Mangale geenau ho ma oraha ihinoimi ngomi miai'a ma Jou ma Dutu awi ja-jama'ati'a, ngomi 'amioga-garago miohijarita mangale ngini tatapu niotongohono de nia ngo-nga'u ma Kristusi'a, ngaro nihangihara ma.5Geena moi-moi ma nyonyata na'o ma Jou ma Dutu o nyawa woha'imi duru de 'itiaio'a. Ngini neena naga niohangihara hababu ngini niwihingounu ma Jou ma Dutu, hababu geena ma Jou ma Dutu wotemo ngini idadi nioohama Awi pareta'a.6Una aha wadiai nage iti-tiai, de aha wohibalaha o hangihara nage cara'iau niha-hangihara'au ngini'a.7De ma Jou ma Dutu aha winidiai ngini de de ngomi nage ma oraha neena pohangihara, pohangiharawauoli. Una aha wodiai 'ogeena ma oraha ma Jou Yesus woboali o horogaa'u. Ma oraha geena Una womahimaiti de awi ma-malai'ata nage ma 'uaha 'iamo-amo'o de o u'u 'ito'a-to'ara.8De wo'ihangihara o nyawa nage widaali'awa ma Jou ma Dutu de nage yoolu'u yowango imote'e o Habari ma Owa mangale o Yesus to ngone nanga Jou.9O nyawa goona aha yo'ihu'umu ho yohangihara 'ahiado-adoni'a. Geena mangale ona yo'iginii'i ma Jou awi biono'a de 'oyama'ewa Awi pareta nage duru 'ira-rahai.10Geena moi-moi aha idadi nage ma oraha o Yesus woboali, mangale Awi 'awaha wihiiye de wihoromati o nyawa yonga'u-nga'u moi-moi goona. Done ngini ma naga de de ona, hababu ngini nionga'uo'au o habari nage nimihingahu-ngahu ngini'a.11Geenau ho ngomi 'aitauri'a nimihihaubayanga la ma Jou ma Dutu nage niwiaho'o'au ngini, winidiai ngini idadi niowango 'imote'e awi mau. Tanu ma Jou ma Dutu de awi 'uaha, niwiduhunu la niadiai nia'arajaanga yaowa-owa moi-moi nage niomau niadiai, de Una wohitotomo nia'arajaanga moi-moi nage niadi-diai hababu nionga'u ma Kristusi'a.12De 'ogeena niodiai, o Yesus to ngone nanga Jou guuna aha wihiiye hababu ngini, de hababu Una, ho ngini ma aha 'inihiiye. Neena idadi mangale tongone nanga Jou ma Dutu de ma Yesus Kristus manga hingina irahai ngini'a.
The Seed Company