1 TESALONIKA5
1Ri-riadodoto! 'Iparaluwa ngomi miotulihi ngini'a mangale muluo'a de 'o'iau ma oraha ma Jou Yesus aha woboali.2Hababu ngini mahirete niana'o madiai na'o ma Jou Yesus woboali ma oraha yaadono, harage yotohi-tohi'i yoboa o wutu ma gorona'a ho moiwa yomao.3Nage o nyawa aha yotemo, <<Moi-moi 'ai'lii-lii'a de 'aiha-hanaanga,>> de geenau ma oraha 'aihorogano ona yohangihara 'a 'imatero de momatengo nage aha moma'ualenge 'aihorogano midahau'u. De ona aha yaa'unua yomahimada o hangihara'a geena.4Ma ngini geena niowango 'aodaluho'awa mangale niwina'o ma Jou ma Dutu, ho ngini nihido-do'anuwa nage ma Jou awi bo-boa nage ma oraha geena yaadono, harage o nyawa yohido-do'ana wa'utu yotohi-tohi'i yoboa.5Hababu ngini moi-moi niowango ma daraanga harage o wangede hababu nia wowango irahai de iberehi. Ngone nanga wowango 'oimaterowa harage de o nyawa nage o diiha yodi-diai ho yowango harage de o daluho'a.6Geenau ho ngone 'aidadiwa pomaidu-idu harage o nyawa munu'a. Ngone halingou pomahitiari de paa'unu papareta nanga roehe.7Ma oraha 'italuhu'u o nyawa yomaidu, de 'italuhu'u ma o nyawa yo'ieto.8Ma ngone nage nanga wowango ma daraanga harage de o wangede. Ho ngone halingou paa'unu papareta nanga roehe. Ngone halingou tatapu powinga'u ma Jou de po'idora o nyawa munu'a, de pomahingano-no na'o ma Jou ma Dutu aha wonahihalamata. Geenau imadadi tongone nanga hawaa'unu moi nage pomahitato'o ma oraha palawana o daluhu ma pareta.9Hababu ma Jou ma Dutu wonaili'i ngone geena ma dumutu 'awonahu'umuwa, ma duga wonahihalamata ma nge'omo ma Yesus Kristus to ngone nanga Jou.10Una wohongeno'au mangale ngone, la ma oraha woboali geena ngone 'apowango-wangohi e'ola pohongeno'au, ngone aha powango de de Una.11Geenau ho halingou 'aitauri'a nimahi'adanganono de nimahi'a'uata nia hingina, harage de ma oraha neena naga niadi-diai.12Riado-doto! Ngomi miogaaho'o la ngini nio'ihoromati o nyawa nage yomaduhunu yo'arajaanga naga nginio'a; geenala ona nage ma Jou wo'iili'o'au mangale nihibaluhu de nio'iade-ade.13De halingou nihigou-goungu nio'ihoromati de nio'idora hababu o hagala moi-moi nage yadi-diai. Halingou uwa niomatogu-togumu nioma'aaha niohidi-diai moi de moi.14Riadodoto! Ngomi ma miogaaho'o la nio'itaaele o nyawa nage yoolu'u yomada'arajaanga, de niohi'uata manga hingina o nyawa nage yohawana, nio'iduhunu o nyawa nage 'iparaluu nio'iduhunu, de niotongohono o nyawa moi-moi'a.15Niomagoana la uwa hiadono naga o nyawa o diiha yodiai ngini'a de niohibalaha 'a o diihali. Halingou 'aitauri'a niodiai yaowa-owa moi de moi'a naga nginio'a, de o nyawa moi-moi'a.16Halingou 'aitauri'a nioga-garago!17De ngini 'iani tatapu niohaubayanga!18Ngini halingou nio'amaowa'a ma Jou ma Dutu'a ngaro o'ia naga bato idadi. Hababu geenau nage ma Jou ma Dutu womau niadiai, ngini nage niowango niori-rimoi de ma Kristus Yesus.19Uwa niatato'o o Omaha 'Iofi-ofi,20de uwa niaete-ete'e o habari nage yotemo bali geena o Omaha 'Iofi-ofino.21Ma o demo-demo moi-moi geena halingou niatibanga niohidi-diai. La na'o geena 'igou-goungu ma Jou ma Dutuno geena halingou niodinii'i.22Harage de o 'iau hona nage o diiha halingou nimahilehene nia'a'uli'a.23Ma Jou ma Dutu nage niwi'ula o dame de o hanaanga, tanu ma Jou ma Dutu niwidiai niowango niohigou-goungu 'a de de Una. Tanu ma Jou ma Dutu wapaliara nia wowango, nia hininga de nia roehe la ma oraha ma Yesus Kristus to ngone nanga Jou woboali geena ti ngini nia hala 'oiwa.24Ma Jou ma Dutu nage niwiaho-aho'o'au ngini, Una aha wadiai 'ogeena hababu Una 'awoelu-elu'uwa ho o'ia naga wojajio'au geena aha idadi.25Riadodoto! Miogaaho'o la ngini nimidahaubayanga ngomi.26Nima'a-'atabea geena nihimaiti na'o ngini nima'adora moi moi ngini nage nionga'u-nga'u o Yesusi'a.27De ma Jou Yesus awi 'uaha, ngoi togaaho'o tohigou-goungu la ma hurata neena nio'idabaca o nyawa yonga'u-nga'u moi-moi'a.28Ngoi togaaho'o tanu ma Yesus Kristus to ngone nanga Jou niwihibara'ati.
Ngoi o Paulus tinitabea.
Ngoi o Paulus tinitabea.
The Seed Company