1 TIMOTIUS4
1O Omaha 'Iofi-ofi inahingahuo'au ihiti-tiaino, na'o done o oraha moi done, o nyawa nage yonga'u-nga'u munu'a ge done aha 'ayonga'uwauoli ma Kristusi'a de yodinii'i o to'a-to'ata nage 'ihiliba-liba, de yodinii'i o to'a-to'ata manga do-doto'o.2O do-doto nage 'aiti-tiaiwa, geena yohingahu ma nge'omo yomaelu-elu'ino de yotabaelu'ino. Manga hininga'a 'ayohi'ana'owau ma diai.3Ona yodoto'o bali, o nyawa 'aidadiwa yomodo'a, de o inomo munu'a 'aidadiwa poodomo. Ena momongo o inomo ma Jou ma Dutu wohidadi'u ma ngale paodomo. O nyawa yonga'u-nga'u ma Kristusi'a, de nage yana'o-na'o'au o do-doto'o 'iti-itiai, geena 'aidadi yaodomo 'itigoo'o 'ayoga-garago ma Jou ma Dutu'a.4O'iau hona moi-moi nage ma Jou m a Dutu wadiai'u geena moi-moi 'ayaowa, de 'a moio ma 'oiwa ge 'aidadiwa paodomo, na'o podawongo'au de nanga garago ma Jou ma Dutu'a.5Hababu ma Jou ma Dutu awi Demo de nanga haubayanga hiadono moi-moi o inomo geena iofi ho 'aidadi paodomo.6Na'o geena moi-moi nohidoto'o nanga ri-riadodoti'a nage 'a o ngo-nga'u moi, ngona geena done aha nodadi ma Kristus Yesus awi gilaongo ma owa. De ngona aha 'aitauri'a nohi'uata ani roehe de ma Jou ma Dutu awi demo-demo nage ngone panga'u-nga'u, de o do-doto'o iti-tiai nage hiadono neena ngona nodi-dinii'i.7Uwa nohigiheni'a o jarita ma hila-hila nage ma haidaa 'oiwa, ma halingou nomahibiaha mangale nowango imote'e ma Jou ma Dutu awi mau.8Pohibiaha nanga roehe padoto'o la i'uata, ma faeda 'aiamo'ua. Ma pomahibiaha powango imote'e ma Jou ma Dutu awi mau geena ma haidaa 'iamo'o, hababu geena'a dau o bara'ati ma ngale o wowango ma oraha neena de ma duuluo'a.9Ma haala geena igoungu de yadaene podinii'i de panga'u de nanga hininga ma gou-goungu.10Geenau ho ngone pomaduhunu pohigou-goungu'u, hababu ngone ma gou-goungu pomahinganono duga 'a ma Jou ma Dutu'a nage wowango-wango. Unau geena o nyawa moi-moi Wohiha-halamata, 'iholoiohi nage ponga'u-nga'u.11No'idoto'o geena moi-moi o nyawa'a, de halingou no'ibara-barahi'a la yodinii'i.12Uwa hiadono o nyawa 'anihido-doa'awa hababu ngona 'a nodoguuluohi. Ma ngona halingou nohimaiti ani go'oie de ani gogelu'u yaowa la o nyawa yomadulu, naga ani demo-demo'a, ani wowango'a, ani dora o nyawa, ani ngonga'uo'a ma Yesus Kristusi'a de ani wowango'a nage 'Iofi-ofi.13Noidamaa magigiria'a hiadono ngoi toboa, halingou 'aitauri'a ma Jou ma Dutu awi bo'u no'idabaca o nyawa-nyawa'a geena'a, ngona ma halingou no'ihi'uata de no'ihidoto'o.14Ngona halingou napa'e nohidi-diai o cocatu nage o Omaha 'Iofi-ofi 'i'ula'au ngona'a ma moi'u ma oraha o jama'ata ma balu-baluhu manga giama yodatami ani hae'u'u mangale nidahaubayanga de nage o jama'ato'a ona yohingahu ma Jou ma Dutu awi behehongo mangale ngona.15Geena moi-moi na'arajaanga nomape-peleeha de nohigou-goungu'u la o nyawa idadi yama'e na'o ngona nodiai ma Jou ma Dutu awi 'arajaanga 'aiholoi monga irahai de 'aiholoi monga nonga'u.16Nomahitiari'a de nagoana la 'a no'idoto'o o do-doto'o iti-tiai. Ngona halingou 'aitauri'a nodiai geena moi-moi. Na'o nodiai geena moi-moi, ma Jou ma Dutu aha nowihihalamata ngona'a de o nyawa-nyawa nage yohigihe-gihene ngona'a ma.
The Seed Company