1 TIMOTIUS3
1Duru 'igoungu o demo neena: <<O nyawa nage yomau yodadi o jama'ata ma balu-baluhu, geena yaigo o arajaanga moi nage duru 'ira-rahai.>>2O jama'ata ma balu-baluhu geena halingou nage o nyawa 'a yo'igi-giihenua o diiha yadiai, de manga we'ata 'a momatengo'a, yaa'unu manga roehe yapareta, yobarija, o adata yana'o, de halingou yaigo o nyawa yo'idawongo manga woa'a, de yopade o nyawa'a yodoto'o.3'Ayotabaetowa, 'ayotabangamowa ma halingou manga hininga 'imaai, yaigo yoma'aaha irahai de o nyawa. Uwa o pipi yohitogohanga.4Halingou yana'o yaaturu manga woa ma doda'u, de manga ngoa-ngoa'a yodoto'o la yo'iihene de yo'ihoromati ona'a.5Hababu o nyawa na'o 'ayaa'unua yaaturu to ona ma hirete manga woa ma doda'u, cara'iau ona idadi yaaturu ma Jou ma Dutu awi jama'ata?6O jama'ata ma balu-baluhu geena halingou uwa ge aha yonga'uno ma Yesus Kristusi'a, la uwa yomaere. Hababu na'o yomaere ma Jou ma Dutu done aha wo'ihu'umu harage de ma hila ma Jou ma Dutu wahu'umu o To'ata ma 'Oani'a.7Ona halingou manga ronga irahai o 'awaha'a, hababu na'o 'a'ouwa geena aha o nyawa yo'ihohedu de o To'ata ma 'Oana 'ayo'ilegono'a.8'Ogenali ma yole-leleani o jamaa'to'a goona halingou manga go'oie de manga gogelu'u yaowa hiadono o nyawa yo'ihoromati de ona yaigowa yoelu-elu'u; 'ayodopo'anua o pipi de 'ayotabaetowa.9Ona halingou yodomote'e nage manga hininga'a ge yamao iti-tiai, de yomahiga-gao igou-goungu o nyawa yonga'u-nga'u manga do-doto'i'a nage ma Jou ma Dutu wohimaito'au.10O jama'ata halingou ihila yataila'ohi manga go'oie de manga gogelu'u, la na'o 'a 'oiwa manga haala, aha de idadi yoleleani o jama'ato'a.11To ona manga we'ata ma halingou manga go'oie de manga gogelu'u irahai la o nyawa yo'ihoromati, 'aidadiwa o nyawa manga ronga yatiiha. Halingou yaa'unu manga roehe yapareta, de idadi o nyawa yo'inga'u o hagala moi-moio'a.12O jama'ato'a yole-leleani geena halingou manga we'ata 'a momatengo'a. Ona halingou yo'iuruhu yo'ihidi-diai manga ngoa-ngoa'i'a de manga woa ma doda'u.13O nyawa nage yoleleani irahai o jama'ati'a geena aha yo'ihoromati de iholoi yomooini yomaade-ade mangale to ona manga ngonga'u ma Yesus Kristusi'a.14Ngoi tomau 'aitaaowa de tai'a ngona'a. Ngaro 'ogeena ma toniduhurato'ahi,15la na'o totaao ma ngona nana'o'au ma Jou ma Dutu awi ngoa-ngoa'a geena halingou cara'iau nanga wowango. Ma Jou ma Dutu awi ngoa-ngoa'a geenala ma Jou ma Dutu wowango-wango awi jama'ata. Ona geena o do-doto'o iti-tiai ma guata, harage de o woa ma ba-bangini de ma tadi nage idadi ihi'uata ma woa geena.16O do-doto'o nage ma Jou ma Dutu wo'ula ngoneno geena igoungu, de duru 'ao rahai! Ngaro ma hila o nyawa 'ayana'owahi ma do-doto'o geena, ma oraha neena ma Jou ma Dutu wohingahuo'au ngoneno onane:Una wodadi o Nyawa de o nyawa wima'e Una'a.O Omaha 'Iofi-ofi ihimaiti ngoneno na'o Una guuna wotiai,de o ma-malai'ata wima'e Una'a.Ma habari mangale Una 'ihihabario'au o bangiha'a moi-moi,de o nyawa-nyawa o dunia'a neena winga'u Una'a.De ma Jou ma Dutu wigoa'o'au o horogade.
The Seed Company