1 TIMOTIUS5
1Timotius, uwa no'itaaele no'irohu-rohu o nau-nauli'a nage yohilia'i'a de de ngona, ma ma oraha no'itaaele la yohigihene ani demo-demo, halingou no'itaaele no'ihidi-diai ona'a harage de 'a ani dea'a nowitaaele. O do-doguulu'a no'itaaele no'ihidi-diai harage de ani riado-doti'a no'itaaele.2'ogeenali ma o ngewe'a yope-pere'i goona no'itaaele no'ihidi-diai harage ani eha'a nomitaaele, o mo-moholehe no'itaaele no'ihidi-diai harage de ani bilangi'a nomitaaele de ani hininga 'ibe-berehi.3No'ihoromati o nge-ngewe'a yobao-bao nage 'igou-goungu 'ayomatengo'au.4Ma na'o o bao-bao nage ami de ngoa'o'ahi de ami danongo'ahi, geena onau halingou ihila-hila yomadoto'o wileleani ma Jou ma Dutu'a ma nge'omo miuruhu o bao-bao gumuna de manga woa ma doda'u. La ona yabalaha manga baluhu de manga edete manga hininga ma rahai. Hababu geenau ma Jou ma Dutu awi hininga yadaene.5O ngewe'a yobao-bao'u nage igou-goungu 'ayomatengo'au de 'amoi-moiwau yo'iduhunu, yomahinganono duga 'a ma Jou ma Dutu'a. O wutu de o wange 'a itogu-togumua yomadahaubayanga mangale yomagaaho'o wo'iduhunu.6Ma o bao-bao nage yomau 'a manga 'iau hona ilepe de yaigo 'a to ona manga mau yodomote'e, ona geena harage de yohongeno'au ngaro 'a yowangohi ma.7Halingou no'ihitiari no'ihidi-diai'a la ona moi-moi yodomote'e ma haala geena moi-moi, la o nyawa 'aidadiwa yo'ihihala ona'a.8Ma na'o moi'ani yonga'u-nga'u 'ayo'iuruhua manga riado-doto nage, iholoioli nage 'a yomahiwoa moi, ona yomahipongono'au manga ngo-nga'u'a; ho de 'a yonga'u-nga'uwa ma ona iholoi manga wowango itiiha.9O bao-bao nage manga ronga idadi niohiohama o bo'u'u geena 'a nage manga umuru o taunu moributanga de ihiie de ma hila yomodo'a 'a ma moi.10O awaha moi-moi yana'o manga di-diai irahai, harage de manga ngoa'a yomadaamo'o'au, yaigo yo'idawongo o nyawa manga woano, yo'ileleani o nyawa yonga'u-nga'u'a, yo'iduhunu o nyawa nage yohuha-huha'a, de yadiai yohigou-goungu o hagala 'arajaanga nage yaowa-owa.11Ma o bao-bao nage 'ayopere'iwahi manga ronga uwa niatulihi. Hababu na'o manga nyahihuu yamao iholoi i'uata, yomau yomodo'ali de 'ayole-leaniwau duga 'a ma Kristusi'a,12de ona aha o hu'umu yo'idaene hababu 'ayohingounua manga jaji ma Jou'a mangale 'ayomodo'awau.13De iholoioli yomahibiaha o wa'utu yohigu-guule, yohupuohama o nyawa manga woa'a. De iholoioli itiiha geena ona o nyawa manga ronga yatiiha, de yotawo-tawongo o nyawa manga haala de yohijarita o 'iau nage 'oyadaenua yohiade-ade.14Geenau ho ngoi tomau o bao-bao nage 'ayopere'iwahi geena ngaro 'ayomodo'ahi, la o ngoa'a yomadama'e de manga woa ma doda'u yaleleani, la nanga haturuu uwa yama'e o oraha mangale yatiiha nanga ronga.15Hababu naga demaena o bao-bao yoihango'au de yodini'o'au o To'ata ma 'Oani'a.16Ma na'o o ngewe'a momatengo monga'u-nga'u naga demaena ami riadodoto nage yoba-babao, muna halingou mo'iduhunu, uwa mo'ipidili'a o jama'ata yo'iduhunu. De 'ogeena, o jamaa'ata idadi yo'iduhunu o bao-bao'a nage manga riadodoto 'aoiwau.17O jama'ata ma baluhu nage manga 'arajaanga yadiai yohidi-diai, ona goona yadaene yo'ihoromati de manga hewa 'ilape modidi'u, de 'iholoiohi gee yopeleeha yohingahu ma Jou ma Dutu awi demo de yodoto'o.18Hababu ma Jou ma Dutu awi bo'uo'a 'itulihu'u onane: <<O hapi nage 'i'arajaanga yado'o-do'o o gandum ma ngale ma haha'uo'a yohipidili, geena ma ulu uwa niali'o'a la idadi 'iodomo.>> Naga mareguoli itulihu'u onane, <<O nyawa nage yo'a-'arajaanga, ona goona yadaene yama'e manga hewa.>>19Uwa nomada-dabaluhi'a gee 'o jama'ata ma baluhu moi yo'i'ala'i na'o ma ha'ihii 'oiwa. Duga na'o la ma ha'ihii yamididi bolo yahaange geena nohigihene aha de nauruhu.20O nyawa nage o baradoha yodiai, halingou no'itaaele o jama'ata moi-moi manga biono'a, la nage ma regu ge yodomodongo o baradoha yodiai.21Ma Jou ma Dutu de ma Kristus Yesus manga biono'a, de nage o hagala malai'ata nage ma Jou ma Dutu wo'ili-ili'i ma biono'a, ngoi togaaho'o tohigou-goungu, la ngona nodomote'e o pareta da'uu'u nage tonihidemo'au, de uwa noili-ili'i, ngona halingou no'idiai o nyawa'a moi-moi 'aiborimatero.22Uwa 'aitaitoli ani giama no'idatami manga hae'e ma de'u'u ma ngale no'ihitatapu no'igoa'a yodadi ma Jou ma Dutu awi gilaongo. Hababu na'o yobaradoha, ngona ma nihidalatete. Nomagoana la 'anoofi-ofi.23De hababu ngona, ika de ani roehe de ani po'o ihanaangua, uwa duga a o a'ele noo'e-o'ele, ma ma ile nao'ele o angguru la ani doda'a 'ihanaanga.24Naga o nyawa munu'a 'apodana'o'a manga baradoha. Ma o nyawa munu'a 'oyana-na'owahi, o oraha moi done aha pana-na'o manga baradoha.25'ogeenali ma, o hagala di-diai yaowa-owa. Naga munu'a 'apodana'o'a. De ngaro naga gee 'apana'owahi ma done aha 'apana'o'a.
The Seed Company