1 TIMOTIUS2
1Ma di-dihila'a ngoi togaaho'o tohigou-goungu'u ngona'a Timotius la niohaubayanga ma Jou ma Dutu'a mangale o nyawa moi-moi. Nimahigaho'o Una'a la wo'iduhunu, wo'i'ula o'iau manga paraluu, de niotemo 'amaowa'a ma Jou ma Dutu'a mangale moi-moi ge wadiaio'au.2Nio'idahaubayanga o 'oa-'oana de o nyawa nage yopa-pareta la ngone idadi nanga wowango 'iliili de 'iha-hanaanga. De 'ogeena, ngone idadi powihingounu ma Jou ma Dutu'a de nanga go'oie de nanga gogelu'u yaowa-owa imote'e o nyawa ma homoa.3Geenau ira-rahai de ihihanaanga ma Jou ma Jou ma Dutu awi hininga. Una guuna ge Wonahiha-halamata.4Una womau la o nyawa moi-moi yama'e o halamata, de idadi yohi'ana'o o do-doto'o iti-tiai.5Hababu ma Jou ma Dutu duga 'awomatengo'a. De nage idadi wonahi'adame ngone o nyawa de ma Jou ma Dutu ma 'awomatengo'a, geena la ma Kristus Yesus nage womadiaio'au o Nyawa.6Una ma hirete womahigiama ma hoato'au wiho-honenge mangale watuuhu o nyawa moi-moi nanga baradoha. De 'ogeena, ma oraha ma wa'utu ihitatapuo'au, ma Jou ma Dutu wohimaiti na'o Una womau la o nyawa moi-moi wo'ihihalamata.7Mangale geenau ma hababu ho ngoi 'iili'i mangale todadi o hu-hulo'o la totagi 'a o Yahudio'awa ma nyawa'a mangale to'idoto'o o ngonga'u iti-tiai. De nage ngoi tohingahu-ngahu neena geena igoungu; 'atoelu'ua8Ngoi tomau la o nau-naulu 'ia'a naga bato yohaubayanga de manga giama yagoa'ie mangale wipuji ma Jou de manga hininga 'ibe-berehi; uwa yongamo'u e'ola yoma'aributu'u.9'ogeenali de o nge-ngewe'a, ngoi tomau o nge-ngewe'a tanu yomapa'e 'a biaha. De yomapa'eanga uwa o adata yapalene. Manga utu uwa iholoi yadidiai, manga roehino uwa yapa'e o gurahi e'ola o muhuti'a. E'ola o pa'eanga 'ihali-hali.10Ma o nge-ngewe'a manga go'oie de manga gogelu'u yaowa-owa geenau imadadi to ona manga pa'e harage de yadaene nage o nge-ngewe'a yohuba-huba ma Jou ma Dutu'a.11O nge-ngewe'a tanu yomadoto'o yoliilu'u de yohingounu.12Ngoi 'atohigumadawa ona yodoto'o de yopareta o nauli'a. Na'o ma oraha yomalomuno mangale yohigihene o dodoto'o, ona halingou yohigihe-gihene de yomalii-liilu'u.13Hababu madidihila'a ma Jou ma Dutu wihidadi geena o Adam aha de o ngo Hawa.14De 'a o Adamua wodomote'e o ngelu'u, ma o ngewe'a gumuna hiadono ma Jou ma Dutu awi behehongo mapalene.15Ngaro 'ogeena ma, o nge-ngewe'a aha yama'e o halamata hababu yoma'ualenge, iti tatapu yonga'u ma Kristusi'a de yaa'unu yomatongohono, de tatapu yo'idora o nyawa ma homoa'a, de yowango de manga hininga 'ibe-berehi ma Jou ma Dutu awi biono'a.
The Seed Company