1 TESALONIKA4
1Ho riadodoto, ngomi miogaaho'o la niawowango mote'e 'o'iau naga nage ma hila minihidoto'o'au ngini'a, la ma Jou ma Dutu awi hininga yadaene. Ma goungu niodinii'o'au 'ogeena. Ma neena de ma Jou Yesus awi 'uaha, ngomi miogaaho'o miohigou-goungu'u minihigegoto la ngini iholoioli nimaduhunu niodinii'i.2Ngini niana'o'au 'o'iau halingou niowango hara gee minihidoto'o'au ngini'a. O dodoto'o geena ma Jou Yesusino.3Hababu ma Jou ma Dutu awi mau oneena: Nio'ula niawowango Una'a la niowango de o hingina iberehi. Ho uwa nima'apa'e itimaronga.4De ngini moi-moi halingou niana'o, cara'iau niapareta niaroehe ma hirete la ma Jou ma Dutu awi hingina ihananga de o nyawa nihoromati.5Uwa niodinii'i o nyahihuu ma diiha, nage harage o nyawa 'awina'o-na'owa ma Jou ma Dutu'a yadi-diai.6Uwa nimahiidu de o ngewe'a nage 'a nia we'atua 'iholoioli de nia riado-doto nage yonga'u-nga'u manga we'ata. Na'o hiadono idadi harage de 'ogeena, geena niodiaio'au o baradoha nia riadodoti'a e'ola nio'ielu'o'au ona'a. Hababu o nyawa 'ogeena yodi-diai aha ma Jou Yesus wo'ihu'umu imote'e manga di-diai harage ma hilahi miohidemo'au mihigou-goungu ngini'a.7Ma Jou ma Dutu wonaaho'o geena mangale 'a o nyahihuu ma diihawa padiai, ma iani podadi Awi 'awaha de o hininga iberehi.8Ho na'o la nagoona yadawongua o do-doto'o geena, geena uwa niotemo bali yadawongua o nyawa manga demo, ma ona yadawongua ma Jou ma Dutu awi demo nage wo'ula'au Awi 'Omaha 'Iofi-ofi ngini'a.9Mangale ngone 'a o ngo-nga'u moi poma'adora, geena 'aiparaluwau o hurato'a miatulihi, hababu geena ma Jou ma Dutu niwidoto'o'au ngini'a.10De ngini nima'adora de o nyawa-nyawa nage 'a o ngo-nga'u moi de de ngini o Makedonia ma daera'a moi-moi. Duga ngomi mio gaaho'o riadodoto, la ngini iholoioli nima'adora.11Ngini 'iani nimaduhunu nima'aaha nihidi-diai de o nyawa ma homoa. Uwa nia ganu nyawa manga haala, ma duru iholoi yaowa ngini nia uruhu nia haala ma hirete. Ngini 'iani nio 'arajaanga de nia giama ma hirete mangale nimadama'e niaparaluu, harage de minihibehehongo'au ngini'a.12Na'o niowango 'ogeena, geena o nyawa 'ayonga'u-nga'uwa o Yesusi'a aha nihoromati hababu nia go'oie de nia gogelu'u irahai de niomahinganonua o nyawa ma homoa'a.13Ri-riadodoto! Ngomi miomau la ngini niana'o mangale o nyawa yohone-honengo'au geena ona cara'iau. Ho minihingahu la uwa nia hininga ihuha harage o nyawa yonga'u-nga'uwa, nage 'ayomahinganonua bali aha yo'ihiwango.14Ngone ponga'u o Yesus wohongeno'au de wowangoli; geenau ho ngone ma ponga'u bali na'o o nyawa nage yonga'u-nga'u o Yesusi'a nage yohonge-hongeno'au geena aha ma Jou ma Dutu wo'ihimomi'oli, la yowango de ma Jou Yesus.15Imote'e ma Jou Yesus awi do-doto'o, ngomi miomau minihingahu onane: Ma oraha ma Jou Yesus woboali ena ngone nage 'apowango-wangohi, 'a pohilawa wonagoa'a de o nyawa nage yohonge-hongeno'au.16Na'o ma Jou Yesus o horoga'a de woutiou de done naga o pareta moi imaorehe ihi'ua-'uatie, o malai'ata ma baluhu aha imaorehe ihi'ua-'uatie de ma Jou ma Dutu awi torompete yawua'a. De ma Jou Yesus aha wouti da'uu'u de o nyawa yonga'u-nga'u ma Kristusi'a nage yohonge-hongeno'au aha ona yo'ihimomi'oli.17Geena iduangino de ngone nage 'apowango-wangohi done wonagoa'a o 'amo-'amode de-de ona de poma'ama'e de ma Jou Yesus o diwango'a. De ngone aha pomanoa de de Una 'ahiado-adoni'a18Geenau ho halingou moi de moi nia hingina nimahi'a'uata de o demo-demo neena.
The Seed Company