1 TESALONIKA3
1Ngomi duru miomau mioihene nia habari, hababu geena ma baha'u miatibangoli, 'iholoi yaowa ngoi de o Silwanus miogogelohi o Atena ma bendaro'a,2de miohulo'o nanga riadodoto o Timotius wotagi ngini'a. Una ma Jou ma Dutu wile-leani nage wo'arajaanga de de ngomi geenala wohingahu o Habari ma Owa mangale ma Kristus. Ngomi miohulo'o o Timotius wai'a ngini'a la una niwihi'uata de niwihidanganono la iholoioli nionga'u ma Kristusi'a.3La nginio'a naga aha 'amoi ma manga ngo-nga'u ma Kristusi'a 'ilio-liowa ngaro o nyawa inahangihara 'oneena ma. Ngini ma hirete niana'o'au ngone inahangihara geena 'iani idadi.4Ma oraha ngomi 'a de de nginiohi, ihila minihidemo'au bali aha pohangihara. De geena ma gou-goungu idadio'au, ngini mahirete niana'o'au.5Geenau ho o Timotius towihulo'o wotagi ngini'a, hababu tamao'u 'idadiwau toda-damaali tana'o cara'ia niangonga'u ma Kristusi'a. Ngoi tododato o To'ata ma 'Oana 'imadaga'unu nitaili, de mia gangela 'aiparahaja.6Neena o Timotius wolionou de wohingahuo'au ngomino o habari mioga-garago geenala nia ngo-nga'u i'ua-'uata ma Kristusi'a de nima'adora moi de moi. Una wohingahu ngomino bali ngini 'aitauri'a 'anioga-garago na'o minidanganonie ngomi. De ngini niomau poma'ama'eli, harage ngomioli miomau poma'ama'eli.7Ma hababu geenau ri-riadodoto, ngaro miohuha de miohangihara ma ngomi mia hingina igaragoli de ngini nia habari. 'Ania ngo-nga'u ma Kristusi'a, yohi'uata to ngomi mia hingina.8Ho neena ngomi miamao ngomi 'igou-goungu miowango, iti ngini tatapu niorimoi de ma Jou Yesus.9Ngomi duru mio'amaowa'a ma Jou ma Dutu'a, mangale miamao'u ngomi duru miogarago ma hababu ngini, ma oraha miohaubayanga Una'a.10Ngomi 'aitauri'a mimahigaho'o Una'a de mia hininga ma ngodumu, la ngomi de ngini idadi poma'ama'eli la miohitotomo o'ia naga nage 'animihidoto'uwahi mangale nia ngo-nga'u ma Kristusi'a.11Tanu ma Jou ma Dutu to ngone nanga Dea mahirete, de o Yesus tongone nanga Jou miwi'ula o nge'omo la mi'ai'ali ngini'a.12Tanu ma Jou Yesus niwidiai ngini 'iholoioli nima'adora moi de moi de 'iholoioli nio'idora o nyawa moi-moi, harage to ngomi mia dora ngini'a.13Ngomi 'ogeena miogaaho'o, la na'o ma oraha o Yesus to ngone nanga Jou woboali, de ngini Awi 'awaha nia hingina iberehi ma Jou ma Dutu'a, to ngone nanga Dea awi biono'a, de Una 'a wama'ewa nia hala.
The Seed Company