1 TESALONIKA2
1Riadodoto! Ngini ma hirete nia na'o ma oraha ngomi mi'ai'a ngini'a geena mia 'arajaanga 'igou-goungu de ma haidaa'a.2Ngini niana'o ma oraha ngomi 'amioboawahi ngini'a o Tesalonika ma bendaro'a, ngomi 'imihangihara'au de imihoheduo'au o Filipi ma bendaro'a. Ma, ngaro manga lepe milawana, ma tongone nanga Jou ma Dutu wo'ula'au ngomino o mooini mangale miohingahu ngini'a o Habari ma Owa Unano.3Ngomi miogaaho'o ngini'a la nionga'u o Habari ma Owa, mia do-doto'o geena 'ai elu'uwa, de 'a ma dumutua nimielu'u ngini'a.4'A'ouwa! Ma ngomi miohingahu o Habari ma Owa hababu ma Jou ma Dutu wamao'u ngomi idadi miohingahu. Ngomi mimaade-ade 'a ma dumutua o nyawa manga hingina miohihananga, ma to ma Jou ma Dutu awi hingina miohihananga. Unau guuna watailo'au mia hingina mangale wataila'o ma diai.5Ngini ma hirete nia na'o, ngomi 'omaiwahi mioade-ade mia demo-demo nage 'a o nyawa manga hingina moihihanaanga, bolo mio'ielu-elu'u mia dumutu iti-tiiha mangale mio mau mimadama'e o'ia naga nginino. Ma Jou ma Dutu ma hirete wana'o na'o neena itiai!6Ngomi mioolu'u mio'arajaanga ma dumutu ngini bolo o nyawa ma homoa 'imihidaiana. Ngaro idadi miogaaho'o o'ianaga ngini'a mangale ngomi geena ma Kristus awi hu-hulo'o,7ma ngomi mia hingina 'imaai ma oraha ngomi nia hidogorona'a, harage o eha momatengo ami ngoa-ngoa'a mo'ipaliara.8Duru minihibohono, ho ngomi mia hingina iha-hanaanga minihingahu o Habari ma Owa ma Jou ma Dutuno. De 'ageenawa, ma ngomioli mio'ula mia wowango mangale ngini, hababu duru nimidora.9Ri-riadodoto, ngini marai nioda-danganonohi 'oia nage ngomi mimaduhunu mio'arajaanga. O wutu de o wange ngomi mio'arajaanga mangale mia wowango la 'a nimihitubuhowa ngini'a nage ma oraha ngomi minihingahu o Habari ma Owa ma Jou ma Dutuno.10Ma oraha ngomi 'a de de nginiohi nage o nyawa nionga'u-nga'u, ngomi miodinii'i ma Jou ma Dutu awi mau, miodiai o'iau naga nage iti-tiai, de 'ao'ia-'iawa miodiai ihala. Ngini niama'e'au de niala'o ma hirete, 'ogeenali de ma Jou ma Dutu wama'e'au.11Ngini moi de moi niana'o cara'iau nimidiai ngini'a, harage o dea wo'idiai awi ngoa-ngoa'i'a ma hirete.12Ngomi miohi'uata nia hingina de nimihidangonono ngini'a, miogaaho'o miohigou-goungu la niowango imote'e ma Jou ma Dutu awi mau. Hababu Una niwiaho'o la niodadi Awi 'awaha nage wo'uaha mangale wo'oana, de ngini aha inipuji de inihoromati de de Una.13Ma oraha ngomi miohingahu ngini'a o Habari ma Owa Jou ma Dutuno, ngini nionga'u na'o o habari geena 'a o nyawanowa ma ena igou-goungu ma Jou ma Dutuno geenau ho ngomi 'aitauri'a miogarago ma Jou ma Dutu'a. O habari geenau oraha neena 'i'arajaanga ngini'a nage nionga'u-nga'u ma Kristusi'a mangale nia wowango 'ihi'adiai.14Miana'o geena itiai ri-riadodoto, harage cara'iau yohangihara'au ma Jou ma Dutu awi ja-jama'ata geenala o nyawa-nyawa nage yonga'u-nga'uo'au ma Yesus Kristusi'a o Yudea'a, 'ogeenali ma de ngini. Ngini niohangihara hababu 'a to ngini ma hirete nia nyawa inihangihara, harage ma Jou ma Dutu awi ja-jama'ata 'a o Yudea'a, ona yohangihara hababu ona mahirete manga nyawa geenalah o Yahudio'a.15O Yahudi ma nyawa goona ma hila yo'itooma o nabi-nabi, de Witooma ma Jou Yesus aha de 'imihangihara ngomi. Ona 'a yodaali'awa o'iau nage idadi ma Jou ma Dutu awi hininga Ihananga, de yo'ilawana o nyawa moi-moi.16De ona mi'atato'o miohihabari o nyawa-nyawa'a nage 'a o Yahudio'awa, cara'iau idadi yo'ihihalamata. De geenau o Yahudio'a goona 'a yadogo monga manga baradoha hiadono manga baradoha 'itotomo Ma baha'u de oraha neena ona yo'idaene ma Jou ma Dutu awi hu'umana.17Ri-riadodoto, o oraha neena ngone poma'a-'atinga'o'ahi o oraha moi, duga ngaro poma'atinga'i'a 'ao ga'ulu ma 'animihi-hiningahi. Ngomi duru miomau poma'ama'eli hiadono ngomi mimaduhunu miomau mi'ai'ali.18Ngomi mia hininga'a miomau miai'a ngini'a, ho ngoi o Paulus todi-digaliou tohitaili tai'ali ma o To'ata ma 'Oana mi'atato'o.19Ngoi tomau tai'ali ngini'a hababu nginiou tongomi mia ngongano-no de mioga-garago. Hababu na'o ma Jou Yesus woboali de ngone potaali Una'a, geena nginiou duga tongomi mia hingina nimihigarago de nimihihoromati!20Ma gou-goungu nginiou ho hiadono, ngomi 'imihidaiana de mihoromati, de niodiai mia hingina 'ihanaanga.
The Seed Company