Mark4
1Ju dŏ hư̆t, Khua Yang dư̆ng tơ ti lăh ta hang dak sĭ, jêh iên ju pôl uôn lan ŏk ngăn tăm ƀư̆n jư̆m dar Khua Yang. Kơt iên, Khua Yang hao tŏng ƀơn plŭng kêng dak sĭ jêh hư̆n gŭk ta iên, bơ lĕ mơt băl uôn lan hên gŭk ta hang dak sĭ tê̆.2Khua Yang tơ ti hên ŏk pơp ta pơp hơ hôr, jêh iên mŏng pơp tơ ti lăh Yang di, Khua Yang ngơi ta hên:3“Ăn iêt ho! Tŏ hư̆n, mau nêh mhŏ lŏ sak răh til.4Bruă trôh jai nêh răh til, mau ƀơ ƀă nggăr ĕh lăč kêng truông jêh iên sư̆m răč sak sa lĕ mơt til hư̆n.5Mau nggăr dơ dêh ĕh lăč mŏng tŭk teh mau ndrĕh, hư̆n jêng tŭk so mau ŏk teh găl, jêh iên ĕh čăt mhăč rŏk, yơng băh so ĕh čư̆t jru mŏng teh.6Jai măt nar jua tŏng tê̆, jhi hư̆n tŭ pơp dôh nar al, jêh iên yơng băh so mau rĕh, hư̆n yơh ĕh ƀa ro.7Nggăr dơ dêh ĕh lăč mŏng mbar pôm luôk, tơm luôk čăt jua ĕh dlăn til, jêh iên til hư̆n so dơi mau ple kao ôh.8Mau nggăr dơ dêh ya ĕh lăč mŏng teh găl, grăp nggăr ĕh mau ple kao, jai jêh ĕh huôn ru ĕh dŏk ta ram, jêh iên ĕh mau ple kao ju nggăr mau pei jăt, ƀơ ƀă pro jăt, jêh iên mau ya ju hiêng.”9Jêh hiên Khua Yang ngơi: “Nêh tơm mau tôr no di iêt, ăn iêt.”10Jăng jai Khua Yang gŭk dêh ju nau, đơ băl gŭk jư̆m dar Khua Yang wăt ta măt bar nau ƀing kna hên lup Khua Yang yơng ta grăp pơp hơ hôr hư̆n.11Khua Yang ngơi ta hên: “Pơp yuôm ndăp yơng ta uôn tŏng trôk Yang Trôk di jêh dơi ăn ta pu me, ƀê̆ dăh yơng ta băl ta ling, grăp pơp jrăng yua pơp hơ hôr gơ gu,12no di jai dlăng, mông hư̆n hên dlăng ya, ƀê̆ dăh so dơi so ôh,jai iêt, hư̆n ăt hên iêt ya, ƀê̆ dăh so wơng ôh,ơn dăh, hên niêl mlih jêh iên pơp tih dơi đač un ta hên.”13Khua Yang ngơi ta hên: “Pu me so wơng pơp hơ hôr ho lăh? Ndă iên đô̆ nă pu me dơi gư̆t wơng lĕ mơt grăp pơp hơ hôr?14Nêh răh nggăr hư̆n jêng răh pơp đăo.15Bơ ho jêng đơ băl ta kêng truông hư̆n jêng tŭk pơp đăo jêh dơi răh, ƀê̆ dăh jai hên tŏng pơp đăo, Sa-tan mhăč rŏk trôh jêh iên tlĕ nga pơp đăo jêh mhei răh mŏng hên.16Iên ya, ho jêng đơ băl ta teh mau ndrĕh jai jêh nai răh, hư̆n jêng băl jai jêh hên tŏng pơp đăo, mhăč rŏk hên ruôm pơp đăo ta pơp čhô̆ brơn,17ƀê̆ dăh hên so mau rĕh mŏng hên băh gu bhiêu gu. Trôh ta kơi jai pơp knap mñai mdăh pơp kpĭ kpiêt trôh yơng băh pơp đăo, hên mhăč rŏk ĕh păk bông.18Nggăr ƀơ ƀă jêng đơ băl mŏng mbar pôm luôk jêh răh pơp đăo. Ho jêng đơ băl tŏng pơp đăo,19ƀê̆ dăh lĕ mơt pơp mĭn yơng ta nuk ho jêh iên pơp khơñ ta pơp ndrŏng săh, wăt ta nuih nhăm tluh ŏk pơp dơ dêh tŏng ñhêt mŏng iên, ĕh dlăn khư̆t pơp đăo jêh iên tăl ĕh ñjêng so mau ple kao.20Jêh iên ho jêng lĕ mơt nêh mŏng teh găl jêh răh pơp đăo, hư̆n jêng lĕ mơt băl tŏng pơp đăo jêh iên sŏk ruôm, jêh hư̆n duôm kao mau ple, mau pei jăt, mau pro jăt, jêh iên mau ju hiêng.”21Khua Yang ngơi ta hên: “Kđen jêh jhu so mau nai ăn mŏng sô̆ thŭng mdăh mŏng ƀrôm jhưng geh ya? So lăh geh no di nai ĕh ăn tŏng jŏng kđen lăh?22Bơ yơng so mau ju mta pơp dơi ndăp ndă so geh no di dơi nai lăm ƀlang, ăt so mau ju mta pơp mhŏ mŏng tŭk ndăp no di so dơi lăm ƀlang mŏng tŭk ang.23Ndă nêh tơm mau tôr no di iêt, ăn iêt.”24Jêh hư̆n Khua Yang ngơi ta hên: “Ăn ñjrăng ta pơp pu me iêt, Ŏk dŏng năk pu me sŏng mkă, ăt năk hư̆n ya nai jrăng sŏng mkă ta pu me jêh iên ĕh jrăng dơi nai wêh mbăč ta pu me ya.25Bơ yơng nêh tơm mau nai jrăng wêh mbăč hư̆t ta nêh hư̆n, bơ nêh so mau, hư̆n tăl pơp jêh kăn mau, nai jrăng sŏk lat băh kăn.”26Khua Yang ngơi: “Uôn Yang Trôk di jêng klăh iêu: klăh di ju nau nêh hư̆n răh til mŏng teh,27kăn bê̆ mdăh ngĕh, măng mdăh nar, nggăr til ĕh čăt kuôt jêh iên ĕh têh ram đô̆ nă — kăn tơm so kăn gư̆t ya.28Teh duôm kao mau ple hui si truông ĕh di: luôr hĭn jêng jhi ha, jêh hư̆n kăh mbôn ba, jêh iên ple jŏk krư̆p mŏng mbôn ba hư̆n.29Jêh hư̆n trôh mông dơm dư̆m ba, kăn mhăč rŏk ñôt niêh riêk bơ yơng dơm riêk jêh trôh.”30Jêh iên Khua Yang ngơi: “Băl băn jrăng tô mô uôn tŏng trôk Yang Trôk di đô̆ nă, mdăh băl băn jrăng lơ lang uôn găl hư̆n ta năn pơp hơ hôr?31Klăh di ƀơn nggăr pai bi, jêng nggăr jai jêh nai răh mŏng teh, hư̆n jêng nggăr kuôn nê̆ hĭn mŏng djăp mta nggăr mŏng teh,32jai jêh dơi răh ru, ĕh čăt jua jêh iên ñjêng ram hĭn ta djăp mta pai mŏng mir, jêh iên ĕh čăt grăp mbăh dhan ram, tăl sư̆m trôk dơi mhŏ suôn mŏng gui yô̆ ĕh.”33Wăt ta ŏk pơp hơ hôr klăh iên, Khua Yang tơ ti pơp đăo ta hên, hui si pơp dơi hên gư̆t wơng,34ƀê̆ dăh Khua Yang so tơ ti ju mta pơp ta hên no di so yua pơp hơ hôr ôh, ƀê̆ dăh jai gŭk dêh, Khua Yang lơ lang djăp pơp ta ƀing kna Yang di.35Mŏng nar hư̆n, jai trôk jêh mơñ mho, Khua Yang ngơi ta hên: “Băl băn jrăng găn gao trôh hang đăh tŏ.”36Jêh hư̆n jai jêh du băh pôl uôn lan, hên ndơp Khua Yang sak băk hên, bơ yơng Khua Yang jai hôm gŭk mŏng plŭng. Ăt mau grăp plŭng dêh ya gre Khua Yang.37Mau čal ŭ ram ngăn ĕh dŏk tŏng tê̆ jêh iên yak dak tlă ta plŭng tăl plŭng mơñ ĕh rŏng bêng dak.38Bơ săk Khua Yang jai gŭk ta kơi plŭng, kơl bôk jêh iên bê̆. Hên le Khua Yang jêh iên ngơi ta Khua Yang: “Wơ khua, khua so mĭn ôh băl băn jrăng khư̆t lăh?”39Jai jêh ngĕh bê̆, Khua Yang ôt čal jêh iên ngơi ta dak sĭ: “Gŭk miêt gơñ! Gŭk kriêp gơñ!” Hư̆n kăh, čal dư̆t lat, jêh iên mau pơp nge ngêt lĕ mơt.40Khua Yang ngơi hên: “Pơp mhŏ pu me bhŭng? Pu me ñăm mau pơp đăo lăh?”41Hên nga nuih nhăm ta pơp đhir ngit ram hư̆n jêh iên hên tŏng ngơi ndăng hên: “Kơt iên năn nêh ho jêng, bơ yơng tăl čal wăt dak sĭ ăt ĕh gưt Kăn ya?”
FAR EAST BROADCASTING COMPANY