Romans3
1Năngđ nâyx, Yu-tai munh wax cuyb gongx six luungđ? Nzof ayx quaix catz wax cuyb gongx six luungđ?2Naih đuungx huungđ gongx nzongf! Tah yetx, six stiz tuz Zâu Tênb-Huungh jaoz wac phunz.3Six năngđ coong ah phanx munh max naih zen stimz, bix nongc ayx luungđ heh? Ha stiz max neetb zen stimz nyăngz jau, bix ayx phunz Zâu Tênb-Huungh neetb stimz nyăngz jau max săngh nongc mah?4Max zâyf năngđ nâyx. Plănc taih, six oix zuc coong Zâu Tênb-Huungh six senz nyăngz, nzof pănh muif lanh six puv maoh nyăngz munh. Cayx năngđ naih ja coong nâyx:“Hănđ ayx laix Nănh lauf tuz stunx ayx peengh stimz, yămz Nănh coong nyăngz wacTauv Nănh zuc stămđ Nănh yâuc tuz hingh.”5Six năngđ coong pănh max peengh stimz nyăngz jau, bix hinđ manyf Zâu Tênb-Huungh peengh stimz nyăngz jau, pănh six cayx coong ayx laix? Tauv Zâu Tênb-Huungh hinđ manyf Nănh tingc stoif nyăngz jau nzac taih, six max peengh stimz yah? (Yaz âyz bamh munh nyăngz jau coong.)6Max zâyf nâyx! Wâyc năngđ coong nâyx, Zâu Tênb-Huungh laiv hayh stămđ bamh canz heh?7Năngđ coong yaz coong puv maoh, bix ayx phunz Zâu Tênb-Huungh nyăngz senz gâyf, tuz gwăngz eeng năngx lub têx, săngh laix yaz bix năngx zuc stămđ, cayx năngđ ah tauh stoif munh heh?8Ha bix max zâyf (ayx cayx năngđ naih munh cooux buz nâyx, coong six buz nzaox coong) “Pănh zuc ayx okx dlayc, nzăngđ tuz gongx” nâyx hah? — Stiz zuc tingc stoif six senz hoopđ.9Năngđ nâyx? Pănh naih luungđ năngx gongx têx max? Cănh max naih. Wâyc buz tingc săngh coong, njinh Yu-tai munh cloon Hi-lapc munh, yetx stong zuc yămz stoif nyăngz cah đi nzuf.10Cayx năngđ naih ja coong nâyx:“Max naih laiv lanh peengh stimz, hănđ ah lanh lauf max naih.11Max naih laiv lanh manyh pec.Max naih laiv lanh lov Zâu Tênb-Huungh.12Stiz muif lanh ninyh longđ jau nzuf. Muif lanh max săngh luungđ tiny.Max naih mănv ayx gongx dlayc, hănđ ah lanh lauf max naih.”13“Stiz nyăngz đuung hôh năngđ ah cuyb stâu coib goib.Stiz nyăngz byetc, yâuc cungb coong jaf munh.Naih nangz jaz njaiz yămz stiz nyăngz nzetx neengx đany,”14“stiz nyăngz nzetx naih pong nzuf zaux munh nyăngz wac cloon imz byatc.”15“Stiz nyăngz staux, japc ninyh ayx phunz samđ setb.16Stiz nyăngz jau six cungb ayx mêtc cloon munz stimz.17Stiz yâuc max pâyz tauv peengh oonz nyăngz jau.”18“Nănh stiz nyăngz mâyc yâuc max pâyz tuz cumh nzav Zâu Tênb-Huungh.”19Six, pănh pâyz tuz coong, tinyh phanv gâyf njanh êu ayx laiv huungđ, six coong ănz wax đomc naih gâyf njanh nyăngz munh, phunz laiv nomz nzetx lauf zuc stinyb njâuh, yâuc njinh bamh canz, zuc Zâu Tênb-Huungh stămđ stoif nzuf,20wâyc zuc, yămz Nănh nyăngz cah đangc, max naih laiv lanh bamh munh âyz gâyf njanh ayx nyăngz, bix tuz stunx ayx peengh stimz; wâyc gâyf njanh phunz munh pâyz tauv stoif nyăngz jau.21Six nâyx zanyf, Zâu Tênb-Huungh peengh stimz nyăngz jau, tuz hinđ setb taih yămz gâyf njanh cungh ngwaic, tuz gâyf njanh cloon wax đomc tâuc wac munh ayx zanyx manyf phunz,22Zâu Tênb-Huungh nyăngz peengh stimz, six păngc zen stimz yămz Zâu Yê-su Jix-Tuz, nongc phunz muif lanh zen nyăngz munh, max cănh lanyc mănv.23Wâyc zuc muif lanh munh ayx longđ stoif nzuf, max naih Zâu Tênb-Huungh nyăngz gwăngz eeng,24Yâuc cungb tuz păngc Zâu Tênb-Huungh nyăngz pôz, cloon njâuv pôz yămz Zâu Yê-su Jix-Tuz, bix tuz hipđ ayx peengh stimz,25Six Zâu Tênb-Huungh tăng cah đangc, nyunc phunz wax Tauh, cayx năngđ ah cuyb stanyb lanyh nongc stav stoif nâyx, nongc phunz zen păngc Nănh nyăngz samđ, bix tuz quanyf nzuf tăng cah đangc pănh ayx quaix taih nyăngz stoif, nongc ayx zanyx manyf tauv Nănh peengh stimz nyăngz jau,26Wâyc Zâu Tênb-Huungh ayx nyâuđ đao, hinđ manyf Nănh peengh stimz nyăngz jau, yămz nâyx yenh stâyv, phunz laiv lanh zen păngc yămz Zâu Yê-su, yâuc tuz hipđ ayx peengh stimz, wâyc Nănh six peengh stimz.27Năngđ nâyx, laiv hayh ayx nzetx lub heh? Nănh zuc zoz setb nzof. Păngc laiv huungđ gâyf heh? Gâyf njanh nyăngz cumh pâuz mah? Max zâyf! Nây six păngc zen stimz nyăngz gâyf.28Wâyc pănh pâyz tuz coong, ah lanh munh tuz stunx ayx peengh stimz six păngc zen stimz, max zâyf păngc ayx âyz gâyf njanh nyăngz cumh pâuz.29Ha Zâu Tênb-Huungh six cungb Yu-tai munh nyăngz cuungv yah? Max zâyf lauf cloon pitc stingx munh nyăngz haz? Zâyf, six lauf cloon pitc stingx munh nyăngz,30Wâyc zuc cungb naih ah tauh Zâu Tênb-Huungh cuungv, wax đomc păngc zen stimz bix ayx quaix catz nyăngz munh cloon max ayx quaix catz bix păngc zen stimz nyăngz munh, Nănh six stunx ayx peengh stimz.31Ha nâyx, pănh cayx păngc nây zen stimz bix quanyf gâyf njanh mah? Max zâyf năngđ nâyx. Plănc taih, pănh six ayx phunz gâyf njanh năngx neetb têx.
FAR EAST BROADCASTING COMPANY