Romans2
1Wâyc nây, munh lex — max cun mâyh six mănv, tinyh phanv tingc munh nyăngz stoif — mâyh songđ max hayh naih jau pyenv tuz, wâyc zuc mâyh tingc munh laiv huungđ, mâyh six lauf cănh tingc mâyh; wâyc mâyh tingc munh, bix zef lauf cănh ayx wax đomc dlayc.2Six pănh pâyz tuz coong, Zâu Tênb-Huungh tingc cloon wax đomc munh ayx năngđ nâyx, six toix senz gâyf.3Six, munh lex, mâyh tingc ayx wax đomc dlayc nyăngz munh, mâyh bix lauf ayx năngđ stiz nâyx, mâyh six nyâyh coong, mâyh hayh pyenv tuz đutb max zuc Zâu Tênb-Huungh tingc stoif naz?4Max six mâyh phătc Nănh naih nyăngz nyâuđ đao, cloon nyâuđ quăng, yâuc nyangc, mâyh bix mangc stam, max pâyz tuz coong Zâu Tênb-Huungh ayx nyâuđ đao six oix nongc mâyh tuz coi nyâuđ nhlimc stoif haz?5Six âyz mâyh nyăngz nyâuđ nhlengc, yâuc max oix coi nyâuđ nhlimc stoif, mâyh six cănh ston njâuh phunz mâyh zuc tingc stoif, tauv tingc stoif nyăngz noib, Zâu Tênb-Huungh six peengh stimz nyăngz stămđ setb taih,6Nănh six âyz muif lanh munh, ayx nyăngz cumh pâuz bix clao phunz stiz:7Wâyc nây, laiv lanh nongc nyâuđ ayx gongx nyăngz jau, lov gwăngz eeng, cloon saix nyăngz, cloon max hayh jac nyăngz phănc, six tuz sađ stâyv quâyx nyăngz mengc phunz,8six laiv lanh nyâuđ nhlengc, max âyz senz gâyf ayx, bix ninyh ayx max peengh stimz nyăngz jau, wax đomc munh six zuc hănđ, yâuc zuc tingc stoif niđ nzongf.9Muif lanh munh ayx huđ nyăngz mengc hoonh, six zuc zâuđ nanc, yâuc zuc dlauc wâyb, Yu-tai munh zuc đangc, cah đangz tauv Hi-lapc munh.10Six gwăngz eeng, cloon saix nyăngz cloon peengh oonz, six phunz wax đomc munh ayx gongx tauv laiv, phunz Yu-tai munh đangc, zef phunz cloon Hi-lapc munh.11Wâyc Zâu Tênb-Huungh six max pyac laiv lanh.12Laiv lanh max naih gâyf njanh bix longđ stoif, six lauf âyz max naih gâyf njanh bix zuc tayc, nzof laiv lanh naih gâyf njanh bix longđ stoif, six zuc âyz gâyf njanh bix stămđ.13Wâyc max zâyf coong phanv laiv lanh numđ gâyf njanh, bix tuz stunx ayx peengh stimz, yămz Zâu Tênb-Huungh nyăngz cah đangc, six cungb wax đomc ayx âyz gâyf njanh, nzăngđ tuz stunx ayx peengh stimz.14Pitc stingx nyăngz munh, nănh stiz max naih gâyf njanh, yâuc cănh âyz gâyf njanh ayx, hănđ six max naih gâyf njanh, stiz yâuc cănh ayx gâyf njanh phunz stiz,15stiz ayx nyăngz cumh pâuz, phunz stunx coong gâyf njanh ja yămz stiz nyăngz nyâuđ cah njaf, stiz nyăngz nyâuđ yâuc cănh ayx zanyx manyf phunz gâyf njanh, wâyc nây stiz nyăngz nyâuđ, ah zanyf yâuc cănh cooux stiz, ah zanyf yâuc cănh pyac stiz16tauv Zâu Tênb-Huungh nongc Zâu Yê-su Jix-Tuz, stămđ munh pinyx ayx nyăngz dlayc wax noib, six setb taih, âyz năngđ yaz nzônh nyăngz Cuđ Jenx nâyx.17Six năngđ coong mâyh cungb đamz manyh ayx Yu-tai munh, păngc gâyf njanh, bix ayx nzetx lub yămz Zâu Tênb-Huungh,18pâyz tuz Nănh nyăngz zux ix, yâuc pâyz tuz laiv huungđ săngh, laiv huungđ six max săngh, yămz gâyf njanh nzaox nyăngz,19yâuc cănh coong mâyh six ayx yenv jau, phunz mâyc buđ nyăngz munh, zef ayx gwăngz phunz wax đomc yămz nzămc nyăngz munh,20ayx stênx stengb nzaox munh oongx munh, yâuc ayx stênx stengb nzaox munh sây, wâyc nongc naih yămz gâyf njanh nyăngz bănh sangz cloon senz gâyf,21wâyc nây, săngh laix mâyh nzaox munh, bix max cănh nzaox mâyh heh? Mâyh nzaox munh coong năngx gâyf ayx stac, săngh laix mâyh zef ayx stac heh?22Mâyh coong năngx gâyf ninyh văngf munh, săngh laix mâyh zef ninyh văngf munh heh? Mâyh hănđ wax đomc miuc hanyh, săngh laix mâyh zef năngx nimc miuc hanyh nyăngz tungh zăngc heh?23Mâyh ayx nzetx lub coong mâyh naih gâyf njanh, săngh laix mâyh bix pamf gâyf njanh, ayx peo Zâu Tênb-Huungh?24Wâyc “Zâu Tênb-Huungh nyăngz manyh, zuc pitc stingx munh pib six wâyc nyâuh,” cayx năngđ naih wac ja coong nâyx.25Năngđ coong mâyh âyz gâyf njanh ayx, quaix catz nyăngz gâyf six senz săngh nongc, six năngđ coong mâyh max ayx âyz gâyf njanh têx, mâyh hănđ quaix catz six lauf cayx năngđ max quaix catz.26Wâyc nây, năngđ coong ah lanh munh max zeengx ayx quaix catz, bix âyz gâyf njanh ayx, nănh hănđ max zeengx ayx quaix catz, max zâyf lauf tuz stunx, cayx năngđ cay nănh ayx quaix catz nâyx haz?27Max zeengx ayx quaix catz yămz nâyx nomz stinb a, bix âyz gâyf njanh ayx wax đomc munh, six tingc nyâuh, senz cungb tuz nomz gâyf coong ayx quaix catz, bix max âyz gâyf njanh ayx nyăngz munh.28Wâyc senz nyăngz ah lanh Yu-tai munh, six max zâyf cungb mangc pâyh sangc cuungv, lauf max zâyf cungb yămz pâyh sangc ayx quaix catz nây stinb a cuungv,29Six senz nyăngz Yu-tai munh, six tăng wa nyâuđ njaf ayx Yu-tai munh, nzof senz quaix catz nyăngz gâyf, six tăng wa nyâuđ njaf ayx âyz Singx-Lingh, max zâyf cungb ayx nomz gâyf cuungv; ah lanh munh năngđ nâyx, senz tuz Zâu Tênb-Huungh tanv, max zâyf tăng bamh munh tanv.
FAR EAST BROADCASTING COMPANY