Romans4
1Ha nâyx, pănh coong tauv pănh nyăngz claof jex Apx-la-ham, âyz nây stinb a bix setb laiv huungđ heh?2Wâyc zuc, năngđ coong Apx-la-ham wâyc cumh pâuz ayx, bix tuz stunx ayx peengh stimz, nănh six naih jau ayx nzetx lub, six wâyc yămz Zâu Tênb-Huungh nyăngz cah đangc max zâyf năngđ nâyx.3Wâyc Canyx Stâub nzaox coong laix? “Apx-la-ham zen caođ Zâu Tênb-Huungh, nănh songđ tuz stunx ayx peengh stimz.”4Six ayx cumh pâuz nyăngz munh, tuz nyăngz congz nyanh, six max stunx nongc ayx tuz pôz, six cayx năngđ zaix nâyx lêc.5Nzof laiv lanh max ayx cumh pâuz, six zen yămz hayh ayx phunz naih stoif nyăngz munh, tuz săngh peengh stimz munh wax Tauh, yămz nănh nyăngz zen stimz six tuz stunx ayx peengh stimz.6Hănđ Đa-witx huungh lauf coong tauv nănh nyăngz pôz, tuz Zâu Tênb-Huungh stunx ayx peengh stimz, six max zâyf wâyc cumh pâuz ayx, coong:7“Laiv lanh ayx huđ nyăngz jau, bix tuz quanyf phunz, cloon nănh ayx nyăngz stoif bix tuz pinyx omz, nănh senz naih oonz looc gôh.8Wax đomc munh tuz Zâu max stunx tauv stiz nyăngz stoif wax đomc, senz naih oonz looc gôh.”9Năngđ nâyx, coong tauv nâyx đomc pôz, six cungb phunz quaix catz nyăngz munh yah, max zâyf lauf phunz căn max quaix catz nyăngz munh haz? Wâyc pănh coong: “Apx-la-ham tuz stunx ayx peengh stimz six wâyc zen stimz.”10Ha wax huungđ zen stimz tuz stunx tăng laiv heh? Tăng ayx quaix catz blătc, max six tăng max zeengx ayx quaix catz wax zanyf? Nây six tăng nănh max zeengx ayx quaix catz, max zâyf tăng ayx quaix catz blătc.11Nănh stipx quaix catz nyăngz gâyf, six cayx năngđ ah nomz peengh stimz nyăngz yenx nâyx, yămz nănh nyăngz zen stimz, nây six tăng max zeengx ayx quaix catz bix zen, phunz nănh ayx pha bây wax đomc max ayx quaix catz bix zen nyăngz munh, phunz wax đomc munh lauf tuz stunx ayx peengh stimz;12nănh lauf săngh wax đomc ayx quaix catz munh nyăngz Pha, yâuc max zâyf cungb phunz wax đomc ayx quaix catz nyăngz munh cuungv, yâuc năngx phunz cloon wax đomc munh, ayx âyz pănh nyăngz claof jex, Apx-la-ham nyăngz zen stimz nyăngz jau wax đomc, tăng max zeengx ayx quaix catz wax zanyf.13Wâyc naih nyunc wac phunz Apx-la-ham cloon nănh nyăngz sây stunz, coong nây guungh đi six săngh stiz nyăngz phănc, six max zâyf păngc gâyf njanh, nây six păngc nănh zen nyăngz peengh stimz.14Wâyc zuc năngđ coong păngc gâyf njanh, nzăngđ tuz stipx wax đomc phănc têx, zen stimz songđ max setb laiv huungđ, nzof wax đomc nyunc nyăngz wac yâuc max săngh nongc.15Wâyc gâyf njanh six ayx phunz zuc tingc stoif nyăngz jau, six laiv tix max naih gâyf njanh, lauf max naih pamf gâyf njanh nyăngz jau.16Wâyc nây, wax đomc tuz stipx nyunc phunz nyăngz phănc, six naih zen stimz nyăngz munh, nây six âyz tuz pôz nyăngz jau, nzof nyunc nyăngz wac six senz nyăngz phunz Apx-la-ham nyăngz muif lanh sây stunz — max zâyf cungb phunz wax đomc naih gâyf njanh nyăngz munh cuungv, six lauf phunz cloon wax đomc naih zen stimz năngđ Apx-la-ham nyăngz munh, wâyc nây nănh six pănh muif lanh munh nyăngz claof jex,17cayx năngđ naih ja coong: “Yaz njăpc mâyh ayx pha phunz đuungx stingx munh,” yămz nănh zen caođ wax Tauh nyăngz cah đangc, six Zâu Tênb-Huungh, senz ayx phunz tayc nyăngz munh naih săngh mengc wax Tauh, yâuc hayh êu max zeengx naih wax đomc tuz naih taih;18Nănh nongc zen stimz yâuc naih njih mungc, max cun nănh hănđ côx, nănh yâuc tuz ayx pha phunz đuungx stingx munh, âyz năngđ naih wac coong ănz nănh nâyx, coong: “Mâyh nyăngz sây stunz six năngđ nâyx.”19Nănh numđ nănh nyăngz stinb sangc côx cayx tayc gôh, (wâyc tuz cox ah pez nyăngv nzof), yâuc phătc Sa-la max hayh stengb tuz sây, six nănh nyăngz zen stimz yâuc max đoonh.20Nănh zen mungc yămz Zâu Tênb-Huungh nyunc nyăngz wac, nănh nyăngz stimz nyâuđ yâuc max naih plungh plănb, six plănc taih, nănh yâuc naih zen stimz năngx tăngđ têx, yâuc tanv Zâu Tênb-Huungh,21wâyc zen tingc coong Zâu Tênb-Huungh nyunc phunz nyăngz, Nănh six naih tômx jab hayh ayx tuz.22Wâyc nây “nănh nyăngz zen stimz tuz stunx ayx peengh stimz”.23Cayx năngđ, naih wac ja coong “nănh nyăngz zen stimz six tuz stunx ayx peengh stimz”, max zâyf cungb wâyc nănh cuungv,24six lauf wâyc cloon pănh, phunz pănh laiv lanh naih wax huungđ zen stimz six tuz stunx ayx peengh stimz, six phunz wax đomc munh zen yămz ayx phunz pănh nyăngz Zâu Yê-su tăng tayc săngh taih wax Tauh,25Nănh zuc maic six wâyc pănh nyăngz stoif, Nănh tuz săngh taih six wâyc phunz pănh tuz stunx ayx peengh stimz.
FAR EAST BROADCASTING COMPANY