2 Corinthians12
1Yaz sămv zuc ayx nzetx lub tanv yaz, hănđ six max hayh stăngc tuz luungđ, six yaz oix coong tauv wax đomc hinđ yangh nyăngz jau cloon Zâu hinđ phunz wax đomc jau.2Yaz pâyz naih ah lanh munh yămz Zâu Jix-Tuz cah njaf, săpc stâyx nyăngv cah đangc — tuz ênz ninyh tauv tah stamz wax tab guungh — tuz njinh stinb ninyh max six max tuz njinh stinb ninyh, yaz max pâyz, Zâu Tênb-Huungh pâyz.3Yaz pâyz coong naih ah lanh munh năngđ nâyx — max cun njinh stinb ninyh max six max njinh stinb ninyh, yaz max pâyz, six Zâu Tênb-Huungh pâyz —4wax tauh munh tuz ênz ninyh tauv Pa-đa-đi yâuc tuz numđ wax đomc max tuz coong nyăngz wac yâuc max phunz laiv lanh coong setb taih.5Ah lanh munh năngđ nâyx, yaz six ayx nzetx lub tanv. Six yaz cănh nyăngz stinb, yaz yâuc max ayx nzetx lub tanv, blătc nzuf yămz yaz đoonh nyăngz jau.6Wâyc năngđ coong yaz oix ayx nzetx lub tanv, yaz yâuc max zâyf oongx, wâyc yaz coong senz nyăngz; six yaz tanyđ max coong, cungb wangb naih tix lanh hayh nyâyh coong yaz ninyh blătc nănh phătc yămz yaz nyăngz jau max six numđ tăng yaz nyăngz jau.7Wâyc wax đomc hinđ yangh nyăngz jau senz lub nzongf, năngđ nây yaz nzăngđ max ayx lub, yâuc naih ah cuyb nzim njayc nzopb yaz nyăngz stinb a — naih Sax-tanx nyăngz ah tauh manđ — tuz sađ phunz yaz nongc phunz nănh wâyb yaz, phunz yaz nzăngđ max hayh ayx lub.8Yaz wâyc nâyx đomc dlayc, bix nzac jab joođ Zâu tuz pôz hâyđ êu Nănh zoz wax cuyb ninyh gâyh yaz.9Six Nănh coong ănz yaz: “Yaz nyăngz pôz caux phunz mâyh nzof, wâyc zuc Yaz nyăngz jab six tuz ayx setb taih clăkx clunh nzuf yămz đoonh nyăngz jau.” Wâyc nây, yaz senz numđ nyađ nzongf tuz ayx nzetx lub tanv tauv yaz đoonh nyăngz jau, nongc phunz Jix-Tuz nyăngz jab yămz yaz nyăngz cah njaf.10Năngđ nây, yaz wâyc Zâu Jix-Tuz bix pong nyâuđ yămz đoonh nyăngz jau, zuc coong peo, pongh zuc zâuđ, zuc ayx huđ, zuc dlauc wâyb; wâyc zuc laiv zanyf yaz đoonh, wax zanyf yaz six tuz njoongh staox.11Yaz pênx munh oongx munh; wâyc nyâuh cănh yac phunz yaz zuc năngđ nâyx. Wâyc yaz six hoopđ zuc tuz nyâuh tanv, max cun yaz hănđ max setb luungđ, yaz lauf max cănh stâyb “naih manyh yangh lub wax đomc cumh pâuz munh” laiv huungđ.12Wax đomc cumh pâuz jau tuz ayx setb taih yămz nyâuh mungh tongx phunz stunx coong ah lanh cumh pâuz munh, cloon yetx stong naih nyâuđ tanyđ nyăngz jau — cloon njih hoouđ njingc cloon jix caox njingc cloon naih lanyf naih jab wax đomc cumh pâuz.13Wâyc nyâuh stâyb wax đomc pitc đoif jiux pangx nyăngz jau, six cungb wâyc yaz max wâyb nyâuh cuungv? Oix zuc quanyf phunz yaz nâyx huungđ max peengh nyăngz jau!14Nây! Six tah stamz hâyđ yaz bênc săngh nongc ninyh pongh nyâuh, nzof yaz six max wâyb nyâuh luungđ tiny. Wâyc yaz six max zâyf ninyh lov nyâuh nyăngz jax toongx, six ninyh lov nyâuh. Wâyc max zâyf coong sây zuc njâuh jax toongx phunz nzif pha, six nzif pha njâuh phunz sây lêc.15Nzof yaz yâuc numđ nyađ nongc nzuf nyanh stinh, yâuc cănh nođ stâyb nzuf muif huungđ wâyc nyâuh nyăngz mengc hoonh. Max cun yaz stăngz nyâuh đuungx staox, bix tuz nyâuh stăngz yaz stoc nzac?16Six lauf phanv dluyh pyeenz, yaz manyf max zeengx wâyb nyâuh tinyh, six, wâyc yaz six munh lemđ munh, yâuc ta zux ix ninyh zoz nyâuh.17Ha naih tix lanh munh six yaz paiđ ninyh pongh nyâuh nyăngz munh, bix nongc nănh zoz nyâuh nyăngz jax dlaih max?18Yaz êu Ti-tatc ninyh tayđ nyâuh yâuc paiđ ah lanh yâuf pez timb cloon nănh ninyh. Ha max zâyf Ti-tatc zoz nyâuh nyăngz jax dlaih haz? Ha buz max zâyf tinyh đoih songc ah nomz stimz nyâuđ haz? Max zâyf songđ ah vac staux manđ yăngh haz?19Tăng cah đangc, nyâuh six nyâyh coong buz cănh pyenv buz ănz nyâuh max six heh? Buz yămz Zâu Tênb-Huungh nyăngz cah đangc bix jinh đangh coong yămz Zâu Jix-Tuz cah njaf. Six, stăngz nyăngz yâuf pez lex, nâyx đomc muif huungđ dlayc six wâyc phunz nyâuh tuz gongx nzuf.20Wâyc yaz cungb wangb, săngx đanyf, tauv yaz ninyh, bix hayh phătc nyâuh max năngđ yaz nyâyh mungc nâyx, nzof nyâuh yâuc max phătc yaz năngđ nyâuh nyâyh mungc nâyx; max cayb nyâuh lôx năngx hayh naih tinyh panx, tinyh hănđ, siv nhlenx, max tinyh zuc, tanh munh, coong pây nây pây wa, ayx lub, lunc laoc,21ha tauv yaz ninyh nyâuh wa, Zâu Tênb-Huungh bix zef năngx zuc phunz yaz nhlimc ayx jenz stauc nyâuh ah hâyđ timb, nzof yaz zef năngx zuc haoh phunz cah đangc ayx longđ stoif bix max nhlimc stoif wax đomc munh, yămz stiz ayx longđ naih wâyx nyăngz jau, pongz lauh nyăngz jau, cloon max săngh luungđ nyăngz jau wax đomc.
FAR EAST BROADCASTING COMPANY