2 Corinthians13
1Nây six tah stamz hâyđ yaz ninyh pongh nyâuh. “Muif huungđ dlayc six tuz stunx ayx senz phanv naih iz max six pôz lanh zanyx manyf munh nyăngz wac.”2Cah đangc yaz ninyh tah nyâyc hâyđ yaz lauf coong nzof, nâyx zanyf yaz hănđ max naih minb yămz wa, yaz lauf coong timb — ănz cah đangc ayx longđ stoif wax đomc munh, cloon yăngc nzac wax đomc tauv laiv — coong năngđ coong yaz năngx ninyh wa ah hâyđ timb yaz six max nyangc bex,3wâyc nyâuh jinh đangc oix lov zanyx manyf yămz Zâu Jix-Tuz coong bux yaz nyăngz jau, Nănh six max zâyf cungb ayx cay đoonh đoonh ănz nyâuh bex, six naih jab naih lanyf yămz nyâuh mungh tongx.4Wâyc Nănh yămz đoonh nyăngz jau bix zuc tingz jămz ănz săpc đăngc zax, six Nănh săngh taih păngc Zâu Tênb-Huungh nyăngz tômx jab. Wâyc zuc buz lauf đoonh yămz Nănh cah njaf, six păngc Zâu Tênb-Huungh nyăngz tômx jab, buz six lauf cloon Nănh săngh, nongc ayx cumh pâuz phunz nyâuh.5Nyâuh oix zuc zah mangc cănh nyăngz stinb, mangc jađ nyâuh six naih zen stimz max naih. Oix zuc zah cănh nyăngz stinb mangc. Max six nyâuh lauf max cănh pâyz tuz yox cănh nyăngz stinb coong Zâu Yê-su Jix-Tuz six yămz nyâuh cah njaf heh — năngđ coong nâyx, ha nyâuh six za nyăngz yah?6Six yaz mungc coong nyâuh six cănh pâyz tuz coong buz six max zâyf za nyăngz.7Nzof buz yâuc cloo Zâu Tênb-Huungh phunz nyâuh max ayx laiv huungđ huđ nyăngz jau, max zâyf nongc phunz buz tuz stipx, six wâyc phunz nyâuh hayh ayx gongx nyăngz jau, max cun buz six cayx năngđ cay zuc quanyf.8Wâyc buz six max ayx laiv huungđ nzeengz cloon senz gâyf, plănc taih buz six ayx âyz senz gâyf.9Max cun buz six đoonh phanv nyâuh tuz njoongh buz lauf numđ nyađ. Buz yâuc cloo Zâu phunz nâyx đomc jau: six phunz nyâuh tuz clăkx clunh nzuf.10Wâyc nây, max naih minb nyăngz săngx huđ, yaz nzăngđ ja nâyx đomc jau, phunz tauv naih minb, yaz max zâuđ năngx zuc ayx neetb âyz tômx jab, wâyc Zâu sađ phunz yaz six nongc zâyv staox, max zâyf nongc mêtc.11Six, yâuf pez lex, oix zuc numđ nyađ! Oix zuc lov clăkx clunh nyăngz jau, phunz pănh tuz oonz nyâuđ, oix zuc songc ah stinz jau nyâyh, oix zuc hoopđ stimz tongh âyx yămz. Zâu Tênb-Huungh six stăngz nyăngz jau cloon peengh oonz nyăngz jau six cloon nyâuh yămz.12Oix zuc nongc đăngb zeengh nyăngz tomz lanh đeh lanh. Muif lanh đăngb zeengh nyăngz munh lauf pungx wac đeh tauv nyâuh.13Cloo Zâu Yê-su Jix-Tuz nyăngz pôz cloon Zâu Tênb-Huungh nyăngz stăngz, cloon Zâu Singx-Lingh tinyh tongb nyăngz jau, cloon nyâuh muif lanh yămz.
FAR EAST BROADCASTING COMPANY