2 Corinthians11

1Tuz mungc nyâuh tanyđ yaz ayx minb đupx nyăngz jau tix cay, six nyâuh senz lauf jinh đangh tanyđ yaz!2Wâyc yaz numđ joomz nyâuđ nyâuh nzongf, cayx năngđ Zâu Tênb-Huungh joomz nyâuđ nâyx, wâyc yaz pungx nyâuh phunz ah tauh langh đokc, stungx nyâuh cayx năngđ ah lanh munh sab đăngb nâyx phunz Zâu Jix-Tuz.3Six yaz numđ stauh, cungb wangb cayx năngđ lôx noib Ha-wa zuc nangz nongc cux quaiz nyăngz zux ix jaf ayx năngđ laix, bix nyâuh nyâyh nyăngz jau lauf huđ ninyh năngđ wax nâyx, bix max năngx cayb neetb stimz yâuc ayx đăngb zeengh phunz Zâu Jix-Tuz.4Wâyc zuc năngđ coong naih tix lanh taih nzônh pitc tauh Yê-su bix max năngđ buz nzônh wax tauh, max six nyâuh stipx pitc tauh Singx-Lingh, bix max năngđ nyâuh tuz stipx wax tauh Singx-Lingh, max six stipx pitc huungđ Cuđ Jenx, bix max năngđ nyâuh tuz stipx nyăngz Cuđ Jenx têx, naih dlih nyâuh lôx numđ nyađ stipx!
5Six yaz nyâyh taih yaz lauf max cănh stâyb “wax đomc naih manyh yangh lub nyăngz cumh pâuz munh” đêh.6Max cun yaz manyf max yoiz coong wac, six yaz pâyz nyăngz jau lauf max haiđ, nzof yămz manf dlayc, buz yâuc hinđ manyf nâyx đomc muif huungđ jau phunz nyâuh.7Max six wâyc yaz nhlimc ayx jenz, bix cungb taih nzônh Zâu Tênb-Huungh nyăngz Cuđ Jenx phunz nyâuh yâuc max nongc luungđ, phunz nyâuh tuz zanyb staox, yaz bix longđ stoif heh?8Yaz guutb wax đomc pitc đoif nyăngz jiux pangx, stipx stiz stăngc phunz nyăngz nyanh nongc ayx cumh pâuz bokc dlic nyâuh.9Cloon nyâuh yămz wax zanyf — hănđ six max naih luungđ — yaz yâuc max wâyb nyâuh laiv lanh. Wâyc tăng yaz taih nây wax zanyf, yămz wa Ma-si-đô-ni wax đomc yâuf pez cănh stăngc phunz yaz naih caux nzuf sămv nongc nyăngz muif huungđ, nzof yămz manf dlayc, yaz yâuc leđ max phunz yaz wâyb nyâuh laiv lanh, nzof yâuc năngx leđ staox ninyh timb.10Zâu Jix-Tuz nyăngz senz gâyf yămz yaz cah njaf, wâyc nây yămz wa A-ca-ya wax đomc stâyz phangz max naih mănv hayh cangđ tuz yaz cănh numđ nyađ tanv yaz nyăngz jau.11Wâyc săngh laix heh? Wâyc yaz max stăngz nyâuh mah? Naih Zâu Tênb-Huungh pâyz yaz.
12Nzof yaz ayx nyăngz, yaz yâuc năngx ayx timb, nongc phunz yaz zab lov jau ayx nzetx lub tanv wax đomc munh nyăngz săngx huđ, ayx phunz stiz tanv wax đomc jau lauf max hayh blătc tuz buz.13Wâyc wax đomc munh năngđ nâyx six za cumh pâuz munh, stiz ayx cumh pâuz six cungb jaf munh cuungv, wâyc stiz jaf ayx cayx năngđ cay Zâu Jix-Tuz nyăngz cumh pâuz munh nâyx.14Naih luungđ njingc heh, wâyc hănđ Sax-tanx lauf hayh jaf ayx cayx năngđ gwăngz eeng nyăngz stinz munh nâyx.15Năngđ nây nănh wax đomc pâuz six lauf hayh jaf ayx cayx năngđ cay wax đomc peengh stimz nyăngz pâuz, tauv stêtb mâyv stiz six cănh tuz payh cloon stiz ayx nyăngz cumh pâuz.
16Yaz coong timb: Năngx gâyf naih mănv laic nyâyh yaz six munh oongx munh. Năngđ max têx, phanv năngx stipx yaz cayx năngđ cay ah lanh munh oongx munh, phunz yaz hayh tuz ayx nzetx lub tanv tix cay.17Yaz cayx coong nyăngz wac, six max zâyf âyz Zâu coong, nây six cănh numđ ayx minb đupx bix ayx nzetx lub tanv.18Wâyc naih munh đuungx âyz stinb a bix ayx nzetx lub tanv, wâyc nây yaz lauf ayx nzetx lub tanv.19Wâyc nyâuh six tongb manyh munh, bix lauf năngx numđ nyađ tanyđ wax đomc munh oongx munh.20Wâyc zuc năngđ coong naih munh yac nyâuh ayx nâuh, max six njinh săngh naz nyâuh, max six zab nyâuh, max six ayx lub bix phătc nyâuh stanc, max six bopc nzac nyâuh nyăngz minb ninyh, nyâuh lauf tanyđ.21Yaz coong wâyc buz numđ nyayz, wâyc buz ayx cayx năngđ cay buz six đoonh nâyx! Six năngđ coong naih munh nzađ ayx nzetx lub tanv tauv laiv huungđ — yaz coong cayx năngđ cay ayx minb đupx nâyx — yaz six lauf nzađ ayx nzetx lub tanv năngđ ha.22Stiz six Hipđ-lu munh zâyf max? Yaz lauf zâyf. Stiz six I-sa-la-ên munh zâyf max? Yaz lauf zâyf. Stiz six Apx-la-ham nyăngz sây stunz zâyf max? Yaz lauf zâyf.23Stiz six Zâu Jix-Tuz nyăngz pâuz zâyf mah? (Yaz coong cayx năngđ munh oongx munh) Yaz zef ayx năngx nzongf têx timb: zuc tanyđ zâuđ năngx đuungx têx, zuc yămz nzauh năngx đuungx têx, zuc pya bopc max hayh stauđ tuz tongf, naih đuungx hâyđ cayx caiđ zuc tayc mengc.24Yaz zuc tanyđ Yu-tai munh nongc pya bopc pyaz hâyđ, muif hâyđ, sămv ah đitb timb bix caux stâyx săpc đitb.25Yaz zuc nongc njăngx cănv bopc pôz hâyđ. Ah hâyđ yaz zuc zoz njăuz ôx. Yaz zuc đangđ sêmh pôz hâyđ. Yaz zuc ah noib ah munf yâuh wa coiđ minc;26naih đuungx hâyđ yaz setb jau ninyh, cayx caiđ zuc hoiđ mengc yămz wa wăngx, cayx caiđ zuc stac munh hoiđ mengc, cayx caiđ zuc tăng cănh songc stingx munh hoiđ mengc, cayx caiđ zuc tăng wax đomc pitc stingx munh hoiđ mengc, cayx caiđ zuc hoiđ mengc yămz wa dlanyh tongc cah njaf, cayx caiđ zuc hoiđ mengc yămz wa stâyz phangz blănf, cayx caiđ zuc hoiđ mengc yămz wa coiđ, cayx caiđ zuc hoiđ mengc stauc wax đomc ja nyăngz yâuf pez;27zuc pongh zâuđ yâuc dlauc wâyb, naih đuungx hâyđ zuc tanyđ mâyc njoomh, tanyđ nyâuđ sab, tanyđ nyâuđ gatb, cungb zuc tanyđ năngv dlăngc, zuc tanyđ song yâuc max naih zuz;28Max zâyf cungb nâyx cuungv, yaz zef năngx muif noib nyâyh numđ stauh tauv wax đomc muif nomz jiux pangx.29Naih mănv đoonh bix yaz max đoonh heh? Naih mănv ayx zuc longđ, bix yaz max zâyf năngđ zuc tâuf pu nâyx heh?
30Năngđ coong sămv zuc ayx nzetx lub tanv têx, yaz six ayx nzetx lub tanv tauv yaz đoonh nyăngz jau.31Zâu Tênb-Huungh, six Zâu Yê-su nyăngz Pha, senz hoopđ zuc tanv tauv banc stâyv banc đaic wax Tauh, pâyz coong yaz six max puv maoh!32Yămz wa Đa-mat dlanyh, yămz A-lê-tat huungh lanyf cah đi wax tauh quanz pyây zu wa Đa-mat dlanyh nongc zoz yaz.33Six yaz tuz yămz ah nomz zongf pungx quaix bah tang jeengh setb wa dlanyh tongc cungh ngwaic ninyh, yaz nzăngđ tuz pyăux đutb nănh nyăngz puf.

FAR EAST BROADCASTING COMPANY

https://app.library.bible/content/4031cf477b55913c