1 Thessalonians3
1Wâyc numđ max zu tuz lauh nzof, buz songđ nyâyh coong nođ zuc ah lanh yămz wa A-tên lôx năngx gongx têx,2buz songđ paiđ buz nyăngz yâuf pez Ti-mô-tai ninyh, nănh six Zâu Tênb-Huungh nyăngz pâuz, ayx Zâu Jix-Tuz nyăngz Cuđ Jenx cumh pâuz, nongc ayx phunz nyâuh hayh tuz zen tăngđ yâuc oonz nyâuh nyăngz nyâuđ,3phunz nyâuh max naih mănv zuc nyâuđ plungh plănb yămz nâyx đomc zâuđ nanc nyăngz jau. Wâyc nyâuh cănh pâyz tuz coong pănh six tuz bênc săngh nongc pongh nâyx đomc jau.4Nzof tăng buz năngx jinh cloon nyâuh yămz wax zanyf, buz bix bux phunz nyâuh quaix đangc nzof coong pănh six zuc pongh zâuđ nanc, nâyx zanyf nyâuh pongh nyăngz six âyz năngđ nyâuh tuz pâyz quaix nâyx.5Wâyc nây, yaz songđ numđ max zu tuz lauh, bix paiđ munh ninyh wâyc oix pâyz tuz nyâuh nyăngz zen stimz six năngđ laix, săngx đanyf hayh naih jaf munh nyăngz munh taih jaf nyâuh, bix phunz buz ayx nyăngz cumh pâuz zâuđ pênx max setb laiv huungđ.6Six nâyx zanyf, tăng Ti-mô-tai, ninyh nyâuh wa phunb đangz lauf, yâuc phunz buz tuz numđ nyađ wâyc numđ nănh lănv tauv nyâuh nyăngz zen stimz cloon nyâuh nyăngz stăngz coong nyâuh lauf jinh đangh săngx tauv buz, yâuc numđ oix tuz pongh buz, lauf cayx năngđ buz numđ oix tuz pongh nyâuh nâyx.7Wâyc nây, yâuf pez lex, păngc nyâuh buz bix tuz numđ oonz nyâuđ nzongf, yămz buz pongh zuc ayx huđ cloon muif huungđ zâuđ nanc nyăngz jau, wâyc nyâuh nyăngz zen stimz.8Wâyc nâyx zanyf buz săngh six, wâyc nyâuh tuz stâuđ tăngđ yămz Zâu.9Buz wâyc nyâuh bix sâuf hâuđ Zâu Tênb-Huungh max numđ hayh caux, wâyc nyâuh bix tuz numđ oonz looc nzongf, buz yâuc numđ nyađ yămz Zâu Tênb-Huungh nyăngz cah đangc,10noib munf nzac jab cloo Zâu nongc phunz hayh tuz pongh nyâuh, nongc ayx phunz nyâuh hayh tuz naih zen stimz năngx clăkx clunh nzuf?11Joođ Zâu Tênb-Huungh, six pănh nyăngz Pha, cloon pănh nyăngz Zâu Yê-su yenv jau phunz buz hayh tuz ninyh pongh nyâuh.12Cloo Zâu ayx phunz nyâuh tuz phutx hongđ staox yâuc naih lanh stăngz lanh cloon stăngz tinyh đoih năngx clăkx clunh nzuf, cayx năngđ buz stăngz nyâuh nâyx,13nongc ayx phunz nyâuh nyăngz nyâuđ tuz njoongh taih, yâuc đăngb zeengh max naih tinc nzêmh yămz Zâu Tênb-Huungh nyăngz cah đangc, six pănh nyăngz Pha, yămz pănh nyăngz Zâu Yê-su cloon Nănh wax đomc muif lanh đăngb zeengh munh nzac Taih wax zanyf. A-meen!
FAR EAST BROADCASTING COMPANY