1 Thessalonians2
1Yâuf pez lex, nyâuh lauf cănh pâyz tuz coong buz taih pongh nyâuh nyăngz jau, six max zâyf coong max setb laiv huungđ.2Six năngđ nyâuh lauf pâyz quaix nâyx, tăng zuc tanyđ zâuđ, yâuc zuc coong peo yămz wa Phi-lipx-poi dlanyh blătc, buz yâuc pungx stimz păngc yămz Zâu Tênb-Huungh, bix nzônh Zâu Tênb-Huungh nyăngz Cuđ Jenx phunz nyâuh, yămz đuungx hâyđ nzeengz zax nyăngz jau.3Wâyc buz nzaox nyăngz gâyf six max zâyf tăng max săngh luungđ nyăngz jau taih, yâuc max zâyf tăng max đăngb zeengh nyăngz jau taih, yâuc max zâyf puv maoh jaf munh,4six buz tuz Zâu Tênb-Huungh stâyv mangc yâuc jaoz Cuđ Jenx phunz buz ayx năngđ laix, buz lauf năngđ wa nâyx nzônh, max zâyf nongc ayx hoopđ bamh munh nyăngz nyâuđ, six nongc ayx hoopđ Zâu Tênb-Huungh nyăngz nyâuđ, senz zah mangc buz nyăngz nyâuđ wax Tauh.5Năngđ nyâuh lauf pâyz nâyx, buz ninyh wax zanyf max zâyf nongc wac camz jaf munh, yâuc max naih nyâuđ ămx mauh tax huungđ — naih Zâu Tênb-Huungh cănh ayx zanyx manyf —6yâuc max zâyf oix tuz munh tanv, tăng nyâuh max six tăng munh,7manyf hayh tuz munh zanyb wâyc ayx Zâu Jix-Tuz nyăngz cumh pâuz munh, six yămz nyâuh cah njaf, buz six ayx cayx năngđ cay munh nzif ênz sây jenz nâyx, sămv zuc jămđ ênz cănh nyăngz sây.8Wâyc stăngz nyâuh năngđ nâyx, buz songđ numđ nyađ max zâyf cungb nzônh Zâu Tênb-Huungh nyăngz Cuđ Jenx phunz nyâuh cuungv, yâuc năngx cloon buz cănh nyăngz mengc. Wâyc zuc nyâuh six buz stăngz nzongf nyăngz munh.9Yâuf pez lex, naih dlih nyâuh lauf năngx jinh săngx buz zuc ayx cumh pâuz zâuđ yâuc dlauc wâyb, buz cun nzônh Zâu Tênb-Huungh nyăngz Cuđ Jenx phunz nyâuh yâuc cun ayx cumh pâuz bah đoomz bah nzămc phunz max zâuđ wâyb tauv nyâuh laiv lanh.10Nyâuh six cănh ayx zanyx manyf, nzof Zâu Tênb-Huungh lauf ayx zanyx manyf coong, buz yămz nyâuh zen Zâu nyăngz munh mungh tongx, buz six yămz ayx đăngb zeengh, peengh stimz, yâuc max naih tinc nzêmh,11nyâuh lauf cănh pâyz coong, buz năngđ laix ayx phunz nyâuh muif lanh, six cayx năngđ ah lanh pha ayx phunz cănh nyăngz sây nâyx,12quinb bux nyâuh, yâuc oonz nyâuh nyăngz nyâuđ, yâuc joođ êu nyâuh yămz ayx năngx payh cloon Zâu Tênb-Huungh, senz êu nyâuh taih nzac Nănh nyăngz côkz cloon Nănh nyăngz gwăngz eeng wax Tauh.13Wâyc nây, buz songđ sâuf hâuđ Zâu Tênb-Huungh max setc tiny, wâyc nyâuh numđ buz nzônh Zâu Tênb-Huungh nyăngz gâyf yâuc stipx, nyâuh yâuc max zâyf stipx ayx cayx năngđ cay bamh munh nyăngz gâyf, six senz Zâu Tênb-Huungh nyăngz gâyf, yâuc jinh đangh yămz nyâuh cah njaf ayx cumh pâuz wax huungđ gâyf, senz naih nyâuđ zen Zâu nyăngz munh.14Yâuf pez lex, nyâuh senz lauf cayx năngđ yămz wa Yu-đê stâyz phangz wax đomc Zâu Tênb-Huungh nyăngz jiux pangx nâyx, six yămz Zâu Yê-su Jix-Tuz cah njaf wax đomc jiux pangx, wâyc nyâuh lauf zuc tanyđ zâuđ tăng cănh nyăngz songc stingx munh, cayx năngđ cay wax đomc jiux pangx nâyx lauf cănh zuc tanyđ zâuđ tăng Yu-tai munh,15six tayx Zâu Yê-su wax đomc munh, yâuc tayx wax đomc tâuc wac munh, yâuc ayx huđ ănz buz, stiz yâuc max ayx hoopđ Zâu Tênb-Huungh nyăngz nyâuđ, yâuc năngx nzeengz cloon tinyh đoih,16yâuc cangđ max phunz buz nzônh gâyf bây pitc stingx munh phunz đuungx lanh munh hayh tuz njâuv, songđ ayx phunz stiz nyăngz stoif cun ayx cun pâu đuungx staox. Six tauv stêtb mâyv, stiz songđ zuc tingc stoif.17Yâuf pez lex, max cun buz cloon nyâuh tinyh gâyh tix cay ah dlapc, stinb manyf gâyh six nyâuđ max gâyh, buz senz numđ oix tuz pongh nyâuh nyăngz minb nzongf.18Năngđ nây, buz numđ oix tuz ninyh pongh nyâuh — năngx oix têx six yaz, Phao-lô, đa ninyh ah hâyđ iz hâyđ nzof — six Sax-tanx yâuc tăng buz.19Wâyc zuc buz nyăngz njih mungc cloon numđ nyađ nyăngz jau, cloon gwăngz eeng nyăngz tany six luungđ heh? Ha max zâyf nyâuh six lauf tuz yămz pănh nyăngz Zâu Yê-su nyăngz cah đangc, tauv Nănh taih wax zanyf haz?20Wâyc, nyâuh six buz nyăngz gwăngz eeng cloon buz nyăngz numđ nyađ.
FAR EAST BROADCASTING COMPANY