1 Thessalonians4
1Wâyc nây yâuf pez lex, buz joođ nyâuh yâuc quinb nyâuh yămz Zâu cah njaf, six Zâu Yê-su, cayx năngđ nyâuh tuz stipx tăng bux nâyx coong, nyâuh oix zuc yămz ayx năngx hoopđ Zâu Tênb-Huungh nyăngz nyâuđ, lauf cayx năngđ nyâuh jinh đangh ayx nyăngz nâyx, phunz nyâuh hayh tuz cun ayx cun njoongh staox.2Wâyc zuc nyâuh pâyz tuz buz yămz Zâu Yê-su bix nzaox laiv huungđ gâyf phunz nyâuh.3Wâyc Zâu Tênb-Huungh nyăngz zux ix, six oix nyâuh tuz đăngb zeengh: oix zuc cun tuz cănh yâuc pyenv goib pongz lauh nyăngz jau;4nyâuh muif lanh munh oix zuc pâyz hayh cun tuz cănh nyăngz stinb, ayx năngx đăngb zeengh yâuc săngh zanyf,5năngx gâyf âyz stimz nyâuđ ninyh ayx pongz lauh nyăngz jau (cayx năngđ max pâyz Zâu Tênb-Huungh wax đomc pitc stingx munh nâyx);6năngx gâyf naih mănv ayx longđ yâuc năngx gâyf ayx nâyx ănz cănh nyăngz yâuf pez yămz nâyx đomc jau, wâyc zuc Zâu six clao phunz nâyx đomc muif huungđ jau wax Tauh, cayx năngđ cah đangc buz lauf coong nib niđ zăpx ănz nyâuh nâyx.7Wâyc Zâu Tênb-Huungh six max zâyf êu pănh taih nongc phunz naih wâyx, six nongc phunz đăngb zeengh.8Wâyc nây, laiv lanh max stipx nâyx đomc gâyf six max zâyf pyenv bamh munh nây six pyenv Zâu Tênb-Huungh, senz sađ Nănh nyăngz Zâu Singx-Lingh phunz nyâuh wax Tauh.9Nzof coong tauv lanh stăngz lanh nyăngz jau buz max zâuđ năngx sămv zuc ja phunz nyâuh, wâyc nyâuh cănh tuz tăng Zâu Tênb-Huungh nzaox coong oix zuc lanh stăngz lanh.10Wâyc nyâuh senz naih ayx năngđ nâyx ănz wa Ma-si-đô-ni steengv nyăngz yetx stong yâuf pez. Six yâuf pez lex, buz joođ nyâuh oix zuc ayx năngx đuungx staox timb,11yâuc oix zuc cayb yămz ayx năngx stinyb njâuh, nongc cănh nyăngz puf ayx nyâuh nyăngz cumh pâuz, cayx năngđ buz nzaox nyâuh nâyx,12phunz nyâuh hayh yămz ayx tuz gongx cloon max zen nyăngz munh, yâuc max yêmv luungđ.13Yâuf pez lex, buz max oix nongc nyâuh max pâyz tuz luungđ tauv wax đomc mâyc njoomh nyăngz munh, phunz nyâuh max zâuđ stauh cayx năngđ wax đomc max naih njih mungc nyăngz munh stauh nâyx.14Wâyc năngđ coong pănh zen coong, Zâu Yê-su tayc zef năngx săngh taih têx, six lauf tinyh năngđ, Zâu Tênb-Huungh six ênz mâyc njoomh yămz Zâu Yê-su wax đomc munh muf cloon Nănh yămz.15Âyz Zâu nyăngz wac, buz coong nâyx đomc jau phunz nyâuh, coong pănh năngx jinh săngh nyăngz munh tauv laiv six năngx yămz ayx tuz tauv Zâu taih wax zanyf, six max ninyh đangc wax đomc mâyc njoomh nyăngz munh.16Wâyc Zâu six tăng guungh nzac taih naih lanyf, naih stinz munh pây nyăngz stingb, cloon Zâu Tênb-Huungh nyăngz blungh blex stingb buib, tauv wax zanyf wax đomc tayc yămz Zâu Jix-Tuz nyăngz munh tauv laiv six săngh taih đangc.17Nzăngđ taux tauv pănh, six năngx jinh săngh nyăngz munh, năngx jinh yămz nyăngz munh, six tuz ênz muf cloon stiz yămz wa vănx nongc pongh Zâu yămz wa đamx guungh, năngđ nâyx, pănh songđ tuz cloon Zâu stâyv quâyx yămz.18Năngđ nây, oix zuc nongc nâyx đomc wac lanh oonz lanh nyăngz nyâuđ.
FAR EAST BROADCASTING COMPANY