Зах12
1Израиль шотышто Господьын пророк шомакше. Господь, Кӧ кавам шарен, мландылан негызым пыштен да айдемын кӧргӧ шӱлышыжым ыштен, тыге ойла:2«Мый Иерусалимым йыр улшо чыла калыклан да Иудаланат руштыктарыше коркам ыштем. Тиде Иерусалимым авырен налме годым лиеш.3Тудо кечын Мый тиде олам чыла нине калыклан неле кӱм ыштем: тудым нӧлтышӧ-влак чыланат чот эмганат, а мландымбалне улшо чыла калык Иерусалим ваштареш погына.4Тудо кечын, – ойла Господь, – Мый чыла имне ӱмбак тулымашым, имнешке-влак ӱмбак ушдымылыкым колтем, а Иуда тукымым аралаш тӱҥалам, нунын ӱмбач шинчам ом кораҥде. Чыла йот калыкын имньыштым Мый сокырым ыштем.5Тунам Иудан онжо-влак каласат: ”Ме виян улына, вет Иерусалимыште илыше-влак дене нунын Юмышт, Господь Саваоф, уло”.6Тудо кечын Мый Иудан онжо-влакым пу коклаште улшо тулшол ате гайым, кылта-влак коклаште йӱлышӧ факел гайым ыштем. Нуно йыр улшо чыла калыкым шолаштат, пурлаштат пытарат. А Иерусалим ончычсо верыштыжак лиеш, тушто еҥ-влак угыч илаш тӱҥалыт.7Давид тукым ден Иерусалимыште илыше-шамычын чапышт Иуда тукымын чапше деч кугурак ынже лий манын, Господь эн ончыч Иудан омашыже-влакым утара.8Тудо кечын Господь Иерусалимыште илыше-шамычым арален налеш. Нунын коклаште эн начар еҥ тунам Давид гай лиеш, а Давидын тукымжо Юмо гай, ончылнышт кайыше Господьын Суксыж гай лиеш.9Тудо кечын Мый Иерусалим ӱмбак керылтше чыла калыкым пытарем.10А Давид тукым да Иерусалимыште илыше-влак ӱмбак Мый порылык ден кумалмаш шӱлышым опталам, да нуно Мыйын ӱмбак, шуралтыме Еҥышт ӱмбак, ончалыт. Тудын верч нуно ик шкет эрге верч шортмо семын шорташ да кугэрге верч ойгырымо семын ойгыраш тӱҥалыт.11Тудо кечын Иерусалимыште кугу йӱкын шорташ тӱҥалыт, лач тыге Мегиддо тӧрверысе Гададриммонышто шортыныт.12Пӱтынь эл, кажне тукым посна шорташ тӱҥалыт: Давид тукым – посна, ӱдырамашыже-влак – посна; Нафан тукым – посна, ӱдырамашыже-влак – посна;13Левий тукым – посна, ӱдырамашыже-влак – посна; Симеон тукым – посна, ӱдырамашыже-влак – посна.14Чыла моло тукым – кажныже посна, ӱдырамашыже-влакат – посна.
Institute for Bible Translation, Finland