Шотл3
1Господьын Синай курыкышто Моисейлан ойлымо жапыште Аарон ден Моисейын тукымышт тыгай лийын.2Ааронын эргыж-влакын лӱмышт: кугэрге Надав, Авиуд, Елеазар да Ифамар.3Тиде Ааронын шӱрен палемдыме иерей эргыже-влакын лӱмышт, нуным иерей пашам шукташ святитлен шогалтеныт.4Но Надав ден Авиуд Синай ир мландыште Господь ончыко йот тулым конденыт да тидлан кӧра коленыт. Йочашт нунын лийын огыл. Аарон ачашт пелен иерей сомылым шуктен шогаш Елеазар ден Ифамар кодыныт.5Господь Моисейлан каласен:6«Левий тукым еҥ-влакым кондо да иерей Аарон ончыко шогалте: тек нуно тудлан полшат.7Тек нуно Юмо дене вашлийме омаш пелен Аарон да уло калык лӱм дене чыла сомылым шуктен шогат.8Юмо дене вашлийме омаш пелен служитлен, нуно тушто улшо арверлан вуйын шогаш, израиль калык верч сомылым шукташ тӱҥалыт.9Левит-влакым Аарон [изатлан] да тудын [иерей] эргыж-шамычлан пу. Израиль эрге-влак кокла гыч нуно Ааронлан пуымо улыт.10Аарон ден тудын эргыж-влаклан [ойпидыш скинийым] ӱшане. Тек нуно шке иерей пашаштым шуктат, [жертвенник пелен да пӱрдыш шеҥгелне мо улым эскерен шогат]. А тушко иктаж ӧрдыжъеҥ лишемеш гын, тудым пуштман».11Господь Моисейлан каласен:12«Ава мӱшкыр гыч икымше лекше израиль кугэрге-влак олмеш Мый тиде калык гыч левит-влакым налам, [нуно кугэрге-шамычым вашталтат]. Левит-влак Мыйын лийшаш улыт,13вет чыла кугэрге Мыйын улыт. Кунам Мый Египет мландыште чыла кугэргым пытаренам, тиде кечын Мый чыла израиль кугэргым, айдеме гыч тӱҥалын вольык марте, Шкаланем ойырен святитленам. Нуно Мыйын лийшаш улыт. Мый Господь улам».14Синай ир мландыште Господь Моисейлан каласен:15«Левий эрге-влакым еш еда, урлык еда шотлен лек. Ик тылзаш аза гыч тӱҥалын, чыла эрге ден пӧръеҥым шотлен лук».16Господьын кӱштымыжым шуктен, Моисей нуным [Аарон дене пырля] шотлен луктын.17Левийын эргыж-влакын лӱмышт: Гирсон, Кааф да Мерари.18Гирсонын эргыж-влакын лӱмышт, нунын урлыкышт: Ливни ден Шимей.19Каафын эргыж-влак шке урлыкышт дене: Амрам, Ицгар, Хеврон, Узиил.20Мерарин эргыж-влак шке урлыкышт дене: Махли ден Муши. Теве еш еда шотлен лекме Левий тукым.21Гирсон деч Ливни ден Шимей урлык-влак лектыныт. Тиде Гирсонын урлыкшо-влак улыт.22Ик тылзаш аза гыч тӱҥалын, эрге ден пӧръеҥ-влакым тыште чылаже 7 500 еҥым шотлен луктыныт.23Гирсон тукым урлык-влак шке станыштым Юмо дене вашлийме омаш шеҥгелне, касвел могырышто, шогалтышаш улыт улмаш.24Гирсон тукымын онжо – Елиасаф, Лаелын эргыже.25Юмо дене вашлийме омаш пелен Гирсон тукым пӧръеҥ-влаклан омашым, тудын ӱмбал леведыш-влакшым, Юмо дене вашлийме омашыш пурымаште кечыше пӱрдышым ӱшанен пуымо.26Нуно тыгак омаш ден жертвенник йыр улшо кудывече пӱрдышлан, кудывечыш пурымо верын пӱрдышыжлан, нунын кандыраштлан да тусо чыла ӱзгарлан вуйын шогеныт.27Кааф деч Амрам, Ицгар, Хеврон да Узиил урлык-влак лектыныт. Тиде Каафын урлыкшо-влак улыт.28Ик тылзаш аза гыч тӱҥалын, эрге ден пӧръеҥ-влакым тыште 8 600 еҥым шотлен луктыныт. Нуно святой верлан вуйын шогеныт.29Кааф тукым урлык-влак шке станыштым скинийын кечывалвелныже шогалтышаш улыт улмаш.30Кааф тукымын онжо – Елицафан, Узиилын эргыже.31Нуно шондыклан, ӱстеллан, светильниклан, жертвенник-влаклан, службо годым кучылтмо святой ате-ӱзгарлан, пӱрдышлан да нунын дене кылдалтше чыла сомыллан вуйын шогеныт.32Левий тукым он-влакын тӱҥ вуйлатышышт – Елеазар, иерей Ааронын эргыже. Тудо святой верлан вуйын шогышо-влакым вуйлатен.33Мерари деч Махли ден Муши урлык-влак лектыныт. Тиде Мерарин урлыкшо-влак улыт.34Ик тылзаш аза гыч тӱҥалын, эрге ден пӧръеҥ-влакым тыште чылаже 6 200 еҥым шотлен луктыныт.35Мерари тукымын онжо – Цуриил, Авихаилын эргыже. Нуно шке станыштым скинийын йӱдвел могырыштыжо шогалтышаш улыт улмаш.36Мерари тукымлан Юмо дене вашлийме омашын брусшо, вараже, меҥгыже, негызше-влакым да нунылан кӱлшӧ тӱрлӧ ӱзгарым ӱшанен пуымо.37Нунылан тыгак кудывече йыр шогышо меҥгылам, нунын негызыштым, кошар пашкарыштым да кандыраже-влакым ӱшаныме.38А омашын ончыл могырыштыжо, Юмо дене вашлийме омаш деч эрвелкыла, шке омашыштым Моисей, Аарон да тудын эргыже-влак шогалтеныт. Нуно израиль эрге-влак лӱм дене святой верлан вуйын шогеныт. А святой вер деке иктаж ӧрдыжъеҥ лишемеш гын, тудым пуштман.39Господьын кӱштымыж почеш Моисей ден Аарон уло Левий тукым эрге ден пӧръеҥ-влакым шке урлыкышт дене, ик тылзаш аза гыч тӱҥалын, шотлен лектыныт. Нунын чумыр чотышт 22 000 еҥ лийын.40Господь Моисейлан каласен: «Израиль эрге-влакын чыла кугэргыштым, ик тылзаш аза гыч тӱҥалын, кажныжым лӱмышт дене шотлен нал.41Мый Господь улам. Израиль калыкын чыла кугэргышт олмеш Мылам левит-влакым посна ойыро. Тыгак израиль калыкын вольыкыштын икымше шочшыштым Мылам левит-влакын вольыкышт дене вашталте».42Господьын кӱштымыж семынак, Моисей израиль эрге-влакын чыла кугэргыштым шотлен луктын.43Кугэрге-влакым, ик тылзаш аза гыч тӱҥалын, чылаже 22 273 еҥым шотлен луктыныт, нуным лӱмышт дене ончыктеныт.44Господь Моисейлан каласен:45«Израиль калыкын чыла кугэргыже олмеш левит-влакым да вольыкышт олмеш левит-влакын вольыкыштым нал. Левий тукым еҥ-влак Мыйын лийыт. Мый Господь улам.46Но израиль калыкын кугэргыже-влак левит-шамыч деч 273 еҥлан шукырак улыт.47Нуным тӱлен налаш манын, кажныж верч тек вич сикльым пуат. Тидым святой сикль дене шотлыман, ик сикльыштыже – коло гера.48Уто чотым тӱлен налме акым Аарон ден тудын эргыж-влаклан пу».49Левит-влак дене вашталтыде кодшо кугэрге-влак верч Моисей тӱлен налме акым поген.50Нине кугэрге-влак верч Моисей, святой сикль дене висен, 1 365 сикль шийым поген.51Моисей [уто чотлан] погымо шийым Аарон ден тудын эргыж-влаклан пуэн. Тыге ышташ Моисейлан Господь кӱштен.
Institute for Bible Translation, Finland