Шотл4
1Господь Моисей ден Ааронлан каласен:2«Левит-влак коклаште Кааф эрге-влакым урлык еда, еш еда,3кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотлен лукса.4Кааф эрге [левит-влаклан урлык еда, еш еда] тушто тыгай паша пуалтеш – нуно святой деч святой верлан вуйын шогышаш улыт.5Кунам станлан корныш тарваныман, тек Аарон ден эргыже-влак Юмо дене вашлийме омашыш пурат, петырен шогышо пӱрдышым налыт да тудын дене ойпидыш шондыкым леведыт.6Тудын ӱмбакыже чапле вичкыж коваште гыч ыштыме леведышым пыштат, ӱмбачынже эше шемалге-канде тӱсан меж куэм дене леведыт да нумалме вара-влакым чыкат.7Вара тек надыр киндым пыштыме святой ӱстел ӱмбаке шемалге-канде тӱсан меж леведышым шарат, тушко атым, кӱмыжым, коркам да йошкар арака надырым кондаш кувшин-влакым шындат. Туштак эре конден шогымо надыр кинде кийышаш.8Чыла тидым тек йошкар шовыч дене леведыт, ӱмбакыже чапле вичкыж коваште гыч ыштыме леведышым пыштат да нумалме вара-влакым чыкат.9Вара тек шемалге-канде тӱсан меж куэмым налыт да светильникым, тудын лампадыже, шипшиже да тулшол атыже-влакым, тыгак елейлан кӱлшӧ чыла атым леведыт.10Тек чыла тидым чапле вичкыж коваште гыч ыштыме леведыш дене вӱдылыт да носилкаш пыштат.11Тӱтыраш ыштыме шӧртньӧ жертвенник ӱмбаке тек шемалге-канде тӱсан меж куэмым шарат да тудым чапле вичкыж коваште гыч ыштыме леведыш дене леведыт, нумалме вара-влакым чыкат.12Тек святой верыште служитлыме годым кучылтмо чыла ӱзгарым налыт да, шемалге-канде меж куэмыш вӱдылын, тудым чапле вичкыж коваште гыч ыштыме леведыш дене леведыт да носилкаш пыштат.13Тек жертвенникым ломыж деч эрыктат да шемалге-йошкар куэм дене леведыт,14тушко жертвенник пелен служитлыме годым кучылтмо чыла ате-ӱзгарым пыштат: тулшол ате ден кӱмыж-влакым, изи шаньык ден кольмо-влакым. Чыла тидым чапле вичкыж коваште гыч ыштыме леведыш дене леведыт да нумалме вара-влакым чыкат. [Вара тек шемалге-йошкар куэмым налыт да чан ден тудын негызлажым леведыт, ӱмбакше чапле вичкыж коваште гыч ыштыме леведышым пыштат да носилкаш шындат.]15Корныш тарваныме деч ончыч тек Аарон ден эргыж-влак святой верым да тудын чыла арвержым леведыт, вара веле Кааф тукым пӧръеҥ-влак тудым нумалашлан лишем кертыт. Колаш огыл манын, нуно святой арвер деке тӱкнышаш огытыл. Кааф эрге-влак Юмо дене вашлийме омашын нине ате-ӱзгаржым нумалшаш улыт.16Елеазар, иерей Ааронын эргыже, лампе ӱй ден тамлыпушан тӱтыртышлан, конден шогымо надыр киндылан, елейлан вуйын шогаш тӱҥалеш. Тек тудо скинийлан да тушто улшо чыла святой арверлан мутым куча».17Господь Моисей ден Ааронлан каласен:18«Левий тукымысо Кааф урлыклан пыташ ида пу.19Святой деч святой арвер деке лишеммышт годым ынышт коло, но илыше кодышт манын, тыге ыштыза: тек Аарон ден эргыж-влак, нунын деке миен, кажныжлан шуктышаш сомылым да мом нумалаш кӱлмым ончыктат.20Кааф эрге-влак, святой арверым ончалаш манын, ик татланат ынышт лишем. Уке гын, нуно илыше огыт код».21Господь Моисейлан каласен:22«Гирсон эрге-влакым урлык еда, еш еда,23кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотлен лук.24Теве Гирсон тукымын ыштышаш сомылжо да мом нуно нумалшаш улыт:25святой омашын – Юмо дене вашлийме омашын – куэмжым, леведышыжым, тудын ӱмбалнысе чапле вичкыж коваште гыч ыштыме леведышым, омашыш пурымо верын пӱрдышыжым,26тыгак кудывечысе пӱрдыш-влакым, омаш да жертвенник йыр улшо кудывечыш пурымо верын пӱрдышыжым, нунын кандыраштым да чыла арверыштым. Нунын дене кылдалтше пашам Гирсон тукым еҥ-влак шуктен шогышаш улыт.27Аарон ден эргыж-влакын кӱштымышт почеш Гирсон эрге-влак сомылым шукташ, мо кӱлешым нумалаш да нумалме арверыштлан вуйын шогаш тӱҥалыт.28Теве Гирсон тукым урлык-влакын Юмо дене вашлийме омаш пелен ыштышаш сомылышт. Тек нуно иерей Ааронын Ифамар эргыже вуйлатыме почеш шке пашаштым шуктат.29Мерари эрге-влакым урлык еда, еш еда,30кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотлен лук.31Юмо дене вашлийме омаш пелен нунын ыштышаш сомылышт тыгай, теве мом нуно нумалшаш улыт: омашын брус ден вараже-влакым, меҥге ден негызше-влакым,32тыгак кудывечын чыла велысе меҥге ден негызыштым, кошар пашкар ден кандыраштым да нунын пелен кучылтмо чыла арвер ден ӱзгарым. Кӧлан могай арверым нумалман – кажныжлан посна каласе.33Теве Мерари тукым урлык-влакын Юмо дене вашлийме омаш пелен шуктен шогышаш сомылышт. Тек нуно иерей Ааронын Ифамар эргыже вуйлатен шогымо почеш шке пашаштым шуктат».34Моисей, Аарон да израиль калыкын онышт-влак Кааф эрге-влакым урлык еда, еш еда, кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотленыт.36Урлык еда чылаже 2 750 еҥым шотлен луктыныт.37Кааф урлыклаште шотлен лукмо нине пӧръеҥ-влак Юмо дене вашлийме омаш пелен пашам ыштышаш улыт улмаш. Господьын Моисейлан кӱштымыж почеш нуным Моисей ден Аарон шотлен лектыныт.38Гирсон эрге-влакым урлык еда, еш еда39кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотленыт.40Урлык еда, еш еда чылаже 2 630 еҥым шотлен луктыныт.41Гирсон урлыклаште шотлен лукмо нине пӧръеҥ-влак Юмо дене вашлийме омаш пелен пашам ыштышаш улыт улмаш. Моисей ден Аарон нуным Господьын кӱштымыж почеш шотлен лектыныт.42Мерари эрге-влакым урлык еда, еш еда,43кумло ияш гыч витле ияш марте, Юмо дене вашлийме омаш пелен пашам ышташ йӧрышӧ-влакым, шотленыт.44Урлык еда, [еш еда] чылаже 3 200 еҥым шотлен луктыныт.45Тиде – Мерари урлыклаште шотлен лукмо пӧръеҥ-влак. Господьын Моисейлан кӱштымыж почеш нуным Моисей ден Аарон шотлен лектыныт.46Тыге Моисей, Аарон да израиль калык он-влак Левий тукым эрге-шамычым урлык еда, еш еда, кумло ияш гыч витле ияш марте, Юмо дене вашлийме омаш пелен пашам ышташ да тудым нумалаш йӧрышӧ-влакым, шотлен лектыныт.48Нунын чотышт чылаже 8 580 еҥ лийын.49Господьын Моисей гоч кӱштымыж семынак, кажныжлан шке сомылжым да мом нумалшашыжым палемденыт. Чылажат Господьын Моисейлан кӱштымыж семын ыштыме лийын.
Institute for Bible Translation, Finland