Шотл12
1Моисей шкаланже эфиоп ӱдырым марлан налын улмаш, садлан Мариам ден Аарон тудым шылталаш тӱҥалыныт.2«Ик Моисей дене веле мо Господь кутырен? Тудо мемнан денат кутырен огыл мо?» – ойленыт нуно. Господь тидым колын.3А Моисей гын пеш чот тыматле-ӱҥышӧ лийын, тудын гай еҥ мландымбалне лийынат огыл.4Господь вучыдымын Моисей, Аарон да Мариамлан каласен: «Кумытынат Юмо дене вашлийме омаш деке толза». Нуно кумытынат тушко миеныт.5Господь пыл меҥге лоҥгаште волен да скинийыш пурымо вереш шогалын. Тудо Аарон ден Мариамым ӱжын, нунышт Тудын деке лишемыныт.6Господь каласен: «Колыштса Мыйын шомакем. Тендан коклаште Господьын пророкшо уло гын, Мый тудлан Шкемым кончымаш гоч почам да тудын дене омо гоч кутырем.7Но Моисей тарзем дене гын – тыге огыл. Мыйын пӧртыштем тудо чыла шотыштат ӱшанле.8Тудлан Мый туштен огыл, а шинчаваш тура ойлем. Тудо Господьын сынжым ужеш. Кузе те Мыйын Моисей тарземым шылталаш лӱдын огыдал?»9Нунын ӱмбаке Господьын шыдыже ылыжын, да Тудо нунын деч каен.10Пыл скиний деч нӧлталтын, а Мариам гын проказе дене лум гай ошемын. Аарон Мариам ӱмбаке ончалын да тудын проказе дене леведалтмыжым ужын.11Тунам Аарон Моисейлан каласен: «Мыйын озам, мемнам мут кучаш ит шогалте – ме окмак семын сулыкыш пуренна!12Мариамым ава мӱшкыр гыч колышо лекше, пел капшат шӱйын шуктышо аза гайым ит кодо».13Моисей Господьым сӧрвален кумалын: «Юмем, паремде тудым».14Господь Моисейлан вашештен: «Ачаже шӱргышкыжӧ шӱвалеш ыле гын, тудо шым кече намыслалт ок кошт ыле мо? Тек тудо шым кечылан стан деч ӧрдыжкӧ кораҥдыме лиеш, вара мӧҥгеш пӧртыл кертеш».15Мариам стан деч ӧрдыжкӧ шым кечылан кораҥдыме лийын. Тудын пӧртылмешкыже, калык корныш тарванен огыл.
Institute for Bible Translation, Finland