Шотл13
1Тидын деч вара калык Асироф гыч каен да Фаран ир мландеш шогалын.2Господь Моисейлан каласен:3«Мый израиль калыклан Ханаан мландым пуэм. Тудым ончен лекташ кажне тукым гыч ик еҥым, нунын оныштым, колто».4Моисей нуным Господьын кӱштымыж почеш Фаран ир мланде гыч колтен. Нуно чыланат израиль эрге-влакын вуйлатышышт лийыныт.5Теве нунын лӱмышт: Рувим тукым гыч – Шаммуй, Заккурын эргыже,6Симеон тукым гыч – Сафат, Хорийын эргыже,7Иуда тукым гыч – Халев, Иефоннийын эргыже,8Иссахар тукым гыч – Игал, Иосифын эргыже,9Ефрем тукым гыч – Осий, Навын эргыже,10Вениамин тукым гыч – Фалтий, Рафун эргыже,11Завулон тукым гыч – Гаддиил, Содийын эргыже,12Иосифын Манассий эргыжын тукымжо гыч – Гаддий, Сусийын эргыже,13Дан тукым гыч – Аммиэл, Гемаллийын эргыже,14Асир тукым гыч – Сефур, Михаилын эргыже,15Неффалим тукым гыч – Нахбий, Вофсийын эргыже,16Гад тукым гыч – Геуил, Махийын эргыже.17Теве Моисейын мландым ончаш колтымо еҥ-влакын лӱмышт. А Осийым, Навын эргыжым, Моисей Иисус манын лӱмден.18[Фаран ир мланде гыч] Ханаан мландым ончаш колтымыж годым Моисей нунылан каласен: «Кечывалвел мланде гоч эртен, курыклашке кӱзыза,19тусо мландым шымлен лекса. Тиде мланде да тушто илыше калык могай – виян але виян огыл, шуко еҥан але шагал еҥан?20Нунын илыме мландышт сай але сай огыл? Илыме олашт могайрак – илемышт пырдыж дене авырыме улыт але уке?21Тусо мланде ӱян але уке, тушто пушеҥге-влак улыт мо? Лӱддымӧ лийза, тиде мландын саскажым кондыза». Тидыже виноград кӱаш тӱҥалме жап годым лийын.22Нуно каеныт да Син ир мланде гыч Емаф лишне улшо Рехов марте мландым шымлен лектыныт.23Кечывалвел мландым эртен, нуно Хевроныш миен шуыныт. Тушто Енакын эргыж-влак – Ахиман, Шешай да Фалмай – иленыт. Тиде ола Египетысе Цоан ола деч шым ий ончыч чоҥымо лийын.24Вара Есхол лапверыш толын шуыныт, [тудым ончен лектыныт,] тушто ик орлаҥган виноград укшым пӱчкын налыныт. Орлаҥге тугай кугу лийын – тудым варашке сакен, кок еҥлан нумал каяш логалын. Пеленышт нуно эше гранат ден смоква саскам налыныт.25Тиде верым Есхол лапвер манын лӱмденыт, вет тыште израиль эрге-влак виноград орлаҥгым пӱчкын налыныт.26Нылле кече мландым ончен коштмеке, нуно мӧҥгеш пӧртылыныт.27Колтымо еҥ-влак Моисей, Аарон да уло израиль калык дек Фаран ир мландысе Кадесыш толыныт. Нуно ужын коштмышт нерген каласкаленыт да тусо мландын саскажым ончыктеныт.28«Ме тыйын колтымо мландышкет миен коштна, – маныныт нуно Моисейлан. – Тушто чынжымак шӧр ден мӱй йогат, тушто теве тыгай саска шочеш.29Но тушто илыше калык виян. Ола-влак пеш кугу да чоткыдемдыме улыт. Тушто ме Енак тукым эрге-влакымат ужынна.30Амалик-влак Кечывалвел мландыште, а хеттей, [евей,] иевусей да аморрей-влак курыклаште илат. Хананей-влак теҥыз воктене да Иордан эҥер серыште илат».31Но Халев, Моисей йыр шогышо калыкым лыпландарен, тыге каласен: «Каена да тудо мландым налына, тидлан мемнан вийна сита!»32Тунам тудын дене пырля миен коштшо-влак ойленыт: «Ме тиде калык дене кредалын огына керт – тудо мемнан деч виянрак!»33Нуно израиль эрге-влаклан миен коштмо мланде нерген уда мутым ойлаш тӱҥалыныт: «Мемнан ончен коштмо мланде тушан илаш верланыше-влакым пытара. Тушто ужмо еҥ-влак чыланат кугу капан улыт.34Тушто ме онарле капкылан Енак тукым еҥ-влакым ужынна. Нунын воктенышт ме шкенам шудышырчык гай шижынна. Нуныланат ме, очыни, тыгаяк койынна!»
Institute for Bible Translation, Finland