Шотл11
1Калык Господь ончылно ӧпкелен ойлаш тӱҥалын. Тидым колмеке, Господь чот шыдешкен. Нунын дене Господьын тулжо ылыжын, да станын тӱржӧ йӱлаш тӱҥалын.2Калык Моисей деч полышым йодын кычкырен. Моисей Господьым йодын кумалын, да тул йӧрен.3Тиде верым Тавера манын лӱмденыт, вет тушто Господьын колтымо тулжо ылыжын.4Вара Израиль калык деке ушнышо йот эл еҥ-влак кочкыш шотышто васартылаш тӱҥалыныт. Нунын дене пырля израиль эрге-влакат тыге шортын ойленыт: «Кызыт шылым кочшаш ыле!5Египетыште колым яра кочмым ме монден огынал! Тушто тыгак кияр, дыне, тыглай да порей шоган, чеснок лийыныт!6А кызыт мемнан ӱнарна кодын огыл: тыште нимат уке, шинча ончылно лач ик манна».7Манныже кориандр нӧшмыла койын, тӱсшӧ дене тудо тамлыпушан кукшо кишым шарныктен.8Калык тудым поген коштын, вара кидвакш дене йоҥыштен але шуареш шурен, тудым кӧршӧкеш шолтен да лепошкам кӱэштын – манна тамже дене ӱян лепошка гай лийын.9Йӱдым станыш лупс вочмо дене пырля маннат мланде ӱмбаке возын.10Калыкын шортмыжым Моисей колын, вет кажне еш шке омашыж воктене шортын шинчен. Тидлан Господь пеш чот шыдешкен, Моисей шинча ончылнат тиде осал паша лийын.11Тудо Господьлан каласен: «Молан Тый шке тарзетым орландарет? Молан мый Тыйын поро кумылетым сулен омыл? Молан тиде калык шотышто азапланымашым мыйын ӱмбакем пыштенат?12Мый мо тиде калыкым мӱшкырыштем нумалынам, мый мо тудым шочыктенам? Молан Тый мылам ача-кочаштлан товатлен сӧрымӧ мландышкет нуным йочам ончышо ӱдырамашын азам нумалмыж семын наҥгаяш кӱштенат?13Кушеч мый тиде калыклан шылым муам? Вет нуно шортын-шортын мый дечем шылым йодыт.14Мый тиде калыкым шкетын вӱден каен ом керт, мыланем тиде неле нумалтыш.15Мый денем умбакыжат тыгак ышташ шонет гын, мый декем поро лий – пушт мыйым. Тунам мылам тиде орлыкым чыташ ок логал ыле!»16Господь Моисейлан каласен: «Мый декем Израильын кугуракышт-влак кокла гыч шымле еҥым, кӧм тый шке калыкетын кугуракышт да вуйлатышышт семын палет, пого. Нуным Юмо дене вашлийме омаш дек кондо да пеленет шогалте.17Мый волем да тушто тый денет кутыраш тӱҥалам. Тыйын ӱмбалнет улшо Шӱлышым Мый нуныланат пуэм. Тунам тый шкетын от лий, нуно тый денет пырля калыкым вӱден каяш тӱҥалыт.18Калыклан тыге каласе: ”Эрласе кечылан эрналтса – те шылым кочкаш тӱҥалыда. ’Шылым кочшаш ыле! Египетыште мыланна сай ыле!’ шортын ойлымыдам Господь колын. Теве Господь тыланда шылым пуа, те [шылым] кочкаш тӱҥалыда!19Те тиде шылым ик кече, кок кече, вич кече, лу кече, эсогыл коло кече огыл,20а неррож гыч лекташ тӱҥалмешке, йыгыжгымешке ик тылзе кочкаш тӱҥалыда! Вет тендан коклаште илыше Господьым те шотлен огыдал, ’Молан мыланна Египет гыч каяш кӱлын’ манын, Тудын ончылныжо шортын ойленда!”»21Моисей каласен: «Мый денем тыште кудшӱдӧ тӱжем йолешке, а Тый нунылан тылзе мучкылан ситыше шылым пуэм манын ойлет.22Ме шкенан чыла тыгыде ден шолдыра вольыкнам шӱшкылына гынат, тиде нунылан сита мо? Теҥызыште улшо чыла колым кучена гынат, тиде нунылан сита мо?»23Господь Моисейлан вашештен: «Господьын кидше кӱчык шонет мо? Мыйын мутем шукталтеш але уке – тый вашке ужат».24Моисей калык деке лектын да нунылан Господьын мом ойлымыжым каласен. Вара калыкын кугуракше-влак кокла гыч шымле еҥым поген да нунылан Юмо дене вашлийме омаш йыр шогалаш кӱштен.25Тушко пыл лоҥгаште Господь волен да Моисей дене кутырен. Вара Моисей ӱмбалне улшо Шӱлышым налын да шымле кугуракланат пуэн. Кунам Шӱлыш ӱмбакышт волен, нуно пророклен ойлаш тӱҥалыныт, вара чарненыт.26Кугурак-влак кокла гыч кок еҥ станыштак кодын, нунын лӱмышт Елдад ден Модад лийын. Шӱлыш нунын ӱмбакат волен, да нунат станыште пророклен ойлаш тӱҥалыныт. Нуно кугурак-влак чотыш пуртымо лийыныт, но скиний дек миен огытыл улмаш.27Моисей деке ик рвезе куржын толын да каласен: «Елдад ден Модад станыште пророклен ойлат!»28Тунам Иисус, Нав эрге, Моисейлан полышкален шогышо, тудын ойырен налме-влак кокла гыч иктыже, тыге каласен: «Моисей озам, чаре нуным!»29Но Моисей тыге вашештен: «Мыланем верч тый нунылан кӧранет мо? Господь шке калыкшын кажне еҥже ӱмбак шке Шӱлышыжым колта да чыланат пророк лийыт гын, пеш сай лиеш ыле!»30Вара Моисей да Израильын кугуракше-влак станыш пӧртылыныт.31Господьын колтымо мардеж нӧлталалтын, теҥыз вечын пулдырчо-влакым конден да стан воктеке кышкен. Нуно стан йырым-йыр ик кече кайыме кутышышто кок кынергут кӱкшытым леведыныт.32Калык тарванен да пулдырчым погаш пижын – тудым кече мучко, йӱдвошт, эрлашыжым кече мучко поген. Лу хомер деч шагал погышо лийын огыл. Пулдырчо-влакым стан йыр шарен оптеныт.33Шылым нуно эше кочкынат шуктен огытыл, эше умшаштышт лийын – Господьын шыдыже ылыжын: калык ӱмбаке Тудо кугу пытарымашым колтен.34Тиде верым Киброт-Гаттаава манын лӱмденыт, вет тушан васартылше калыкым тоеныт.35Киброт-Гаттаава гыч калык Асирофыш каен да тушан шогалын.
Institute for Bible Translation, Finland