Неем4
1Пырдыжым чоҥымына нерген колмекше, Санаваллат пеш чот сырен да шыдешкымыж дене иудей-влак нерген игылт ойлаш тӱҥалын.2Тудо шке еҥже да Самарий сарзе-влак ончылно каласен: «Нине мыскынь иудей-влак мом ышташ шонен пыштеныт? Нуно пырдыжым угыч нӧлталнешт мо? Надырым кондынешт мо? Пашаштым ик кечыштак пытарынешт мо? Ломыж ора гыч налме когаргыше кӱ-влаклан нуно у илышым пуынешт мо?»3А тудын воктеныже шогышо аммон Товий ешарен: «Тек чоҥат. Кӱ пырдыжышкышт кӱзен, эсогыл рывыж тудым сӱмыра».4«Юмына, кол нунын мыскылымыштым, вурсен ойлымыштым шкеныштын ӱмбаке савыре! Тек нунат йот мландыш пленыш наҥгайыме лийыт.5Титакыштым ит кудалте, сулыкыштым Шке ончычет ӱштыл ит шу, вет нуно чоҥышо-влакым мыскыленыт!»6Туге гынат, чоҥымо паша умбакыже шуйнен. Пырдыжым пелыже марте нӧлталыныт. Калык пашам тыршен ыштен.7Иерусалим пырдыжым угыч чоҥат, шалатыме верлажым тӧрлатат манмым колмеке, Санаваллат, Товий, араб ден аммон-влак да Азотышто илыше-шамыч чот шыдешкеныт.8Нуно пырля Иерусалим ӱмбаке сар дене каяш да тушто пуламырым нӧлталаш ойым пидыныт.9Но ме шке Юмыланна кумалын улына, а тушман деч аралалташ манын, мемнан оролна-влак йӱдшӧ-кечыже шогеныт.10Иудей-влак каласеныт: «Нумалше-влакын йыжыҥышт пытен, а тӱрлӧ тор эше шуко уло. Ме пырдыжым тетла чоҥен огына керт».11А тушманна-влак тыге ойленыт: «Нунын коклашкышт шижде пурымынам нуно паленат, ужынат огыт шукто. Ме нуным пуштеден пытарена да пашаштым чарена».12Мемнан деке нунын воктене илыше иудей-влак чыла вер гыч толеденыт да ӱмбакына керылташ шонымышт нерген ик гана огыл ойленыт.13Тунам мый оласе пырдыжын эн лапка, эше шагал нӧлталме верлаштыже еҥ-влакым ешын-ешын керде, умдо да пикш дене шогалтенам.14Ончен лекмеке, мый шогальым да лӱмлӧ еҥ-влаклан, тӧра-шамычлан да молыланат каласышым: «Нунын деч ида лӱд. Кугу да лӱдмашым лукшо Господьым ида мондо. Иза-шольыда, эрге-ӱдырда, ватыда да суртда верч чот шогыза!»15Мом ышташ шонымыштым палымына нерген тушманна-влак колыныт. Нуно умыленыт: Юмо осал шонымашыштлан чаракым шынден. Тунам ме чыланат пырдыж дек, кажныже шке пашашкыже, пӧртылна.16Тиде кече гыч пел калыкем пашам ыштен, а вес пелыже, умдым, авыртышым да пикшым кучен, кӱртньӧ тувыран шоген. Пырдыжым ачалыше пӱтынь Иуда калык шеҥгелне вуйлатыше-влак шогеныт. Нумалше-влак ик кидышт дене пашам ыштеныт, а вес кидышт умдым кучен.18Чоҥышо кажне еҥын пашам ыштымыж годым кыдалыштыже керде кечен. Мыйын воктенем пуч дене пуалташ ямде еҥ шоген.19Мый тӧра ден лӱмлӧ еҥ-влаклан, тыгак молыланат каласышым: «Пашана пеш кугу да кумда – ме пырдыж мучко тӱрлӧ верлаште икте-весе деч тораште улына.20Кунам иктаж-кушеч пуч йӱкым колыда, тудо верыш куржын толза, мемнан йыр погыныза: Юмына мемнан верч кредалаш тӱҥалеш».21Тыге ме пашам ыштен улына. Пел калыкше ӱжара волгалтме гыч шӱдыр кояш тӱҥалмешке кидыштыже умдым кучен.22Тунам мый калыклан тидымат каласышым: «Тек кажныже шке тарзыж дене йӱдлан Иерусалимеш кодеш. Йӱдым те оролаш, а кечывалым пашам ышташ тӱҥалыда».23Мыят, иза-шольым да тарзем-влакат, мый денем пырля коштшо орол-шамычат йӱдлан вургемнам кудашын огынал. Керде кажне еҥын пеленжак лийын.
Institute for Bible Translation, Finland