Неем5
1Калык кокла гыч шуко пӧръеҥ ден ӱдырамаш шке иудей иза-шольыж-влаклан ӧпкелаш тӱҥалыныт.2Южышт тыге ойленыт: «Ме эрге-ӱдырна дене пырля шукын улына. Мыланна кочкаш да илен лекташ кинде кӱлеш».3Весышт тыге маныныт: «Шужен шинчаш огыл манын, киндым налашлан мыланна пасунам, виноград аҥанам да пӧртнам залог шотеш пуаш логалеш».4Тыге ойлышо-влакат лийыныт: «Пасу ден виноград аҥанам залог шотеш пуэн, кугыжалан йозакым тӱлаш шийым арена.5Ме моло иза-шольына дене ик кап, ик вӱр улына, эргына-влакат нунын эргышт гаяк улыт. А ме ынде шке эрге-ӱдырнам кул шотеш пуышаш улына. Южо ӱдырна тиде жаплан кул шотеш ужалымат улыт. Ме нимом ыштен огына керт, пасу ден виноград аҥа-влакнат вес кидыш кусненыт».6Нине ӧпке мут ден вуйшиймашым колмеке, мый чот шыдешкышым.7Тидын нерген шонкалымеке, лӱмлӧ еҥ ден тӧра-влакым чот шылталышым. Нунылан каласышым: «Те шке иза-шольыда деч кӱрыда!» Вара тидын шотышто кугу погынымашым эртарышым.8Тыге каласышым: «Вес калык-влаклан куллыкыш ужалыме иудей иза-шольына-влакым ме кертмына семын мӧҥгеш тӱлен налынна. А те тыште шке иза-шольыдам ужаледа! Мыланна нунымат мӧҥгеш тӱлен налман мо?» Лӱмлӧ еҥ ден тӧра-влак, нимом вашештен кертде, шып шогышт.9Тунам мый каласышым: «Тыге ыштымыда сай огыл! Тушман калык-влак мемнам ынышт мыскыле манын, Юмо деч лӱдын илышаш огыдал мо?10Мыят, иза-шольым да тарзем-влакат нунылан ший ден шурным арымеш пуэнна. Айста нунын парымыштым кудалтена!11Кызытак нунылан пасуштым, виноград аҥаштым, олив пакчаштым да пӧртыштым пӧртылтыза. А ший ден шурным, йошкар арака ден олив ӱйым налмыдам чарныза».12Нунышт каласеныт: «Пӧртылтена, нунын деч йодаш огына тӱҥал. Ойлымет семынак ыштена». Иерей-влакым ӱжын, мый тушто улшо-шамычлан «тыгак ыштена» манын товатлаш кӱштышым.13Мый вургемем почкалтышым да каласышым: «Тек Юмо тиде мутым шуктыдымо кажне еҥым шке пӧртшӧ гыч, ыштен налме погыжым тудын деч тыгак почкалта, тек тудын чылажат почкалтен шуымо лиеш да яра кодеш». Погынышо калык «аминь!» манын каласен да Юмым чапландарен, вара шке товатлыме мутшым шуктен.14Иуда мландын кундемтӧраже лиймем годым – Артаксерксын колымшо гыч кумло кокымшо ий кугыжаланымыж марте, латкок ий – мыят, иза-шольым-влакат кундемтӧралан пуышаш киндым кочкын огынал.15А мый дечем ончыч кундемтӧра лийше-влак калыкын илышыжым нелемден шогеныт: нылле сикль шийым погеныт, тидын деч посна калык деч кинде ден йошкар аракам налыныт. Эсогыл тӧра-влакын полышкалышышт калык дене озаланеныт. Мый гын Юмо деч лӱдынам, тыге ыштен омыл.16Тидын годымак мый Иерусалим пырдыж чоҥымо пашаште тыршенам, тушко мыйын еҥем-влакат коштыныт. Мландымат ме шкаланна наледен огынал.17Мыйын ӱстелтӧрыштем шӱдӧ витле иудей ден тӧра шинченыт, тидын деч посна эше пошкудо калык еҥ-влак толеденыт.18Кажне кечын кочкышым ямдылаш ик ӱшкыжым, ойырен налме куд шорыкым да кайык-влакым кучылтыныт. Кажне лу кече гыч йошкар аракамат шуко конден шогеныт. Тидын годым мый калык деч кундемтӧралан погышаш киндым йодын омыл, вет калыклан тидын деч поснат неле лийын.19Мыйын Юмем, тиде калыклан мом ыштымемлан мыйым порын шарналте!
Institute for Bible Translation, Finland