Неем3
1Эн кугу иерей Елиашив да моло иерей-влак пашалан пижыныт да Шорык капкам чоҥеныт. Нуно тудым святитленыт да тушан омса-влакым сакеныт. Тыгак Меа ден Хананел башне-влак марте нуно чыла святитленыт.2Нунын воктене пырдыжым Иерихонышто илыше-влак чоҥеныт, а воктенышт Имрий эрге Заккур чоҥен.3Кол капкам Сенай эрге-влак чоҥеныт. Нуно тудым леведыныт, омса-влакым сакеныт, тӱкывара ден тӱкылтыш-шамычым пыштеныт.4Нунын воктене Гаккоц эрге Урийын Меремоф эргыже пырдыжым ачален, воктеныже – Мешезавел эрге Берехийын Мешуллам эргыже, нунын деч вара – Ваана эрге Садок.5Садок воктене Фекойышто илыше-влак олмыктеныт, но нунын эн лӱмлӧ еҥышт Господьлан пашам ышташ тупыштым пӱгыртен огытыл.6Тошто капкам Пасеах эрге Иоиада ден Бесодий эрге Мешуллам ачаленыт. Нуно капкам леведыныт, омса-влакым сакеныт, тӱкывара ден тӱкылтыш-шамычым пыштеныт.7Воктенышт Гаваон гыч Мелатий, Мероноф гыч Иадон, нунын дене пырля Евфрат эҥер вес вел кундемтӧран кидыштыже улшо Гаваон ден Мицпа олалаште илыше-влак пырдыжым ачаленыт.8Воктенышт Харгаий эрге Узиил, шӧртньыӱзгар мастар, ачален, а тудын воктеныже – тамлыпушан ӱйым ыштыше Хананий. Нуно Иерусалимым Лопка пырдыж марте тӧрлатеныт.9Нунын воктенышт Хур эрге Рефаий, Иерусалимын пел кундемжын тӧраже, ачален.10Воктеныже, шке пӧртшӧ ваштареш, Харумаф эрге Иедай ачален, а воктеныже – Хашавний эрге Хаттуш.11Пырдыжын вес ужашыжым Харим эрге Малхий ден Пахаф-Моав эрге Хашув ачаленыт, нунак Коҥга башньым олмыктеныт.12Нунын воктене Галлохеш эрге Шаллум, Иерусалимын пел кундемжын тӧраже, ӱдыржӧ-влак дене ачален.13Лапвер капкам Ханун да Заноахыште илыше-влак ачаленыт. Нуно капкам чоҥеныт, омса-влакым сакеныт, тушко тӱкывара ден тӱкылтыш-шамычым пыштеныт. Нуно эше Терыс капка марте тӱжем кынергут кутыш пырдыжым ачаленыт.14Терыс капкам Рехав эрге Малхий, Бефкарем кундемын тӧраже, ачален. Тудо капкам чоҥен, омса-влакым сакен, тушко тӱкывара ден тӱкылтыш-шамычым пыштен.15Памаш капкам Колхозей эрге Шаллум, Мицпа кундемын тӧраже, ачален. Тудо капкам чоҥен, леведын, омса-влакым сакен, тушко тӱкывара ден тӱкылтыш-шамычым пыштен. Тудак кугыжан садвече мучаште улшо Селах пӱя воктенысе пырдыжым Давид-Ола гыч волтышо тошкалтыш марте ачален.16Тудын воктене Азбук эрге Неемий, Беф-Цурын пел кундемжын тӧраже, Давид ешын кӱ курык шӱгарышт да кӱнчен ыштыме пӱя марте, тыгак тале сарзе-влакын пӧртышт йотке ачален.17Тудын деч умбакыже левит-влак ачаленыт: Ваний эрге Рехум, воктеныже Хашавий, Кеилан пел кундемжын тӧраже, шке кундемысе калык лӱм дене тыршен.18Умбакыже тудын тукым иза-шольыжо-влак ачаленыт: Хенадад эрге Баввай, Кеилан пел кундемжын тӧраже,19воктеныже – Иисус эрге Езер, Мицпан тӧраже. Тудын ачалыме кумдыкшо саргурал пӧлем дек кӱзымӧ вер ваштареш лукышто верланен улмаш.20Умбакыже пырдыжым Забвай эрге Варух, лук гыч тӱҥалын, кугу иерей Елиашивын пӧрт омсаже марте тыршен ачален.21Гаккоцын Урий эргыжын Меремоф эргыже пырдыжым умбакыже, Елиашивын пӧрт омсаж деч тӱҥалын, тудын пӧрт мучашыже марте ачален.22Тудын деч умбакыже пырдыжым лишыл кундемлаште илыше иерей-влак ачаленыт.23Нунын деч умбакыже, шке пӧртышт ваштареш, Вениамин ден Хашув ачаленыт. Нунын деч вара шке пӧртшӧ воктене Ананийын Маасей эргыжын Азарий эргыже ачален.24Тудын деч умбакыже пырдыжым Азарийын пӧртшӧ деч лук да савыртыш марте Хенадад эрге Биннуй ачален.25Тудын деч вара, пырдыж лук да казамат кудывече воктене, кугыжан кӱшыл пӧртшын башньыже ваштареш – Узай эрге Фалал, умбакыже – Парош эрге Федаий.26Офелыште илыше храм полышкалыше-влак пырдыжым эрвелныла улшо Вӱд капка да посна лектын шогышо башне марте ачаленыт.27Умбакыже пырдыжым лектын шогышо кугу башне деч Офел пырдыж марте Фекойышто илыше-влак ачаленыт.28Имне капка деч умбакыже пырдыжым иерей-влак, кажныже шке пӧртшӧ ваштареш, ачаленыт.29Нунын деч вара шке пӧртшӧ ваштареш Иммер эрге Садок, тудын почеш Шеханий эрге Шемай, Эрвел капкан оролжо, ачаленыт.30Умбакыже пырдыжым Шелемий эрге Хананий да Цалафын кудымшо эргыже Ханун ачаленыт. Нунын деч вара, шке пӧлемже ваштареш, Берехий эрге Мешуллам ачален.31Умбакыже пырдыжым шӧртньыӱзгар мастар Малхий ачален. Тудо Гаммифкад капка ваштареш улшо храм полышкалыше ден сатучо-влакын пӧртышт марте да лукысо пӧрт йотке пырдыжым тӧрлатен.32А лукысо пӧрт ден Шорык капка кокласе кутышым шӧртньыӱзгар мастар ден сатучо-влак ачаленыт.
Institute for Bible Translation, Finland