Лев9
1Кандашымше кечын Моисей шкеж деке Аарон ден эргыже-влакым, тыгак Израильын кугуракше-шамычым ӱжын.2Тудо Ааронлан каласен: «Сулык верч надырлан кӱтӱ гыч самырык ӱшкыжым да йӱлалтен пуымо надырлан тагам нал, когынекат экшык деч посна лийышт. Нуным Господь ончыко шогалте.3Израиль эрге-влаклан каласе: сулык верч надырлан казатагам да йӱлалтен пуымо надырлан [тагам,] идалыкаш ӱшкыж ден шорык пачам налза. Тек нуно чыланат экшык деч посна лийыт.4Тыгак Господь ончыко татулык надырлан тек ӱшкыж ден тагам, кинде надырлан олив ӱй дене йӧрымӧ киндым кондат. Вет таче тыланда Господь конча».5Мом Моисей кӱштен, чыла тидым Юмо дене вашлийме омаш ончыко конденыт. Тушко уло калык погынен да Господь ончыко шогалын.6Моисей каласен: «Тыланда Господьын чапше кончыжо манын, Тудо теве мом ышташ кӱштен».7Моисей Ааронлан каласен: «Жертвенник деке кай, сулык верч надыр ден йӱлалтен пуымо надыретым кондо – шке денет да калык дене касарыме йӱлам шукто. Вара калык деч надырым кондо да нунын дене касарыме йӱлам эртаре – тыге ышташ Господь кӱштен».8Аарон жертвенник деке лишемын да шке сулыкшо верч надырлан самырык ӱшкыжым шӱшкылын.9Эргыже-влак тудлан ӱшкыж вӱрым пуэныт. Тудо шке парняжым вӱреш нӧртен да жертвенникысе тӱкӧ-влакым шӱралтен. Кодшо вӱрым жертвенник тӱҥыш кышкалын.10Господьын кӱштымыж семынак, Моисей сулык верч кондымо надыр вольыкын кояжым, вергыжым, мокшысо чолкымым жертвенник ӱмбалан йӱлалтен тӱргыктен.11Шыл ден коваштым стан деч ӧрдыжтӧ йӱлалтен.12Вара Аарон йӱлалтен пуышаш надыр вольыкым шӱшкылын. Эргыже-влак тудлан вӱрым пуэныт, да Аарон тудым жертвенник ӱмбаке чыла велымат шыжыктен.13Тидын деч вара тудлан йӱлалтен пуышаш надыр шыл ужаш-шамычым да вуйым конденыт. Аарон чыла тидым жертвенник ӱмбалан йӱлалтен.14А кӧргарвер ден йолым мушкын да йӱлалтен пуымо надыр дене пырля жертвенник ӱмбалан йӱлалтен тӱргыктен.15Вара Аарон калыкын пуымо надыржым конден. Тудо калык деч сулык верч надырлан казатагам налын, тудым шӱшкылын да ончычсо семынак надырлан конден.16Тыгак йӱлалтен пуымо надыр вольыкым конден, чылажымат йӱла шуктымо радам почеш ыштен.17Кинде надырымат конден: тушечын кормыж тич налын да жертвенникеш йӱлалтен тӱтырен. Тудым Аарон кажне эрдене йӱлалтен пуымо надыр ӱмбач ешарен конден.18Вара Аарон калыкын татулык надырлан кондымо ӱшкыж ден тагажым шӱшкылын. Ааронлан эргыже-влак вӱрым пуэныт, да тудо жертвенник ӱмбак чыла велымат тиде вӱрым шыжыктен.19Ӱшкыжын кояжым, таган коя дене леведалтше почшым, кӧргӧ коям, вергым, мокшын чолкымжым конденыт.20Чыла тиде коям оҥ шыл ӱмбаке пыштеныт. Аарон коям жертвенник ӱмбалан йӱлалтен тӱргыктен,21а оҥ шыл ден пурла эрдым, Моисей кӱштымӧ семынак, Господь ончылно рӱзалтен конден.22Аарон, калык могырыш савырнен, кок кидшым кӱшкӧ нӧлталын да нуным суапландарен. Сулык верч надырым, йӱлалтен пуымо да татулык надыр-влакым кондымеке, тудо жертвенник гыч волен.23Моисей ден Аарон Юмо дене вашлийме омашыш пуреныт. Тушеч лекмекышт, нуно калыкым суапландареныт. Тунам уло калыклан Господьын чапше кончен:24Господь деч тул ора лектын да жертвенник ӱмбалне улшо надыр ден коям йӱлалтен. Тидым ужын, уло калык куанен кычкыралын да вуйжым мланде марте савен.
Institute for Bible Translation, Finland