Лев8
1Господь Моисейлан каласен:2«Аароным да тудын эргыже-влакым кондо. Тыгак вургемым, елейым, сулык верч надырлан самырык ӱшкыжым, кок тагам да ик комдо шергиндым нал.3Уло калыкым Юмо дене вашлийме омашыш пурымо вер воктене пого».4Моисей Господьын ойлымыж семынак ыштен. Кунам калык Юмо дене вашлийме омашыш пурымо вер воктеке погынен,5Моисей нунылан каласен: «Теве мом Господь ышташ кӱштен».6Моисей Аарон ден эргыж-влакым ончыко луктын да нуным вӱд дене мушкын.7Ончыч Ааронлан кужу тувырым чиктен, тудым ӱштӧ дене ӱшталын, вара ӱмбал вургемым, ӱмбакыже ефодым чиктен да ефод ӱмбач ӱштым ӱшталтен.8Ӱмбакше оҥсакышым чиктен, тушко урим ден туммимым пыштен.9Вуйышкыжо кидарым упшалтен, тудын ончыл велкыже ягылтыме шӧртньӧ изи оҥам, святой сӧрастарыш оҥам, пижыктен – тыге ышташ Моисейлан Господь кӱштен.10Моисей елейым налын да Юмо дене вашлийме омашым, тушто мо улым чыла шӱрен святитлен.11Тудо жертвенник ӱмбаке елейым шым гана шыжыктен. Жертвенникым, тушто кучылтмо чыла ӱзгарым, вӱд чаным да тудым шындыме негызым шӱрен святитлен.12Моисей елейым Ааронын вуйышкыжо йоктарен да тудым шӱрен святитлен.13Вара Моисей Ааронын эргыже-влакым ончыко луктын, нунылан кужу тувырым чиктен, ӱштым ӱшталтен, вуйышкышт вуйчиемым упшалтен – тыге ышташ Моисейлан Господь кӱштен.14Тылеч вара Моисей сулык верч надырлан самырык ӱшкыжым вӱден конден. Аарон ден эргыж-влак кидыштым ӱшкыж вуйыш пыштеныт.15[Моисей] ӱшкыжым шӱшкылын. Вара тудын вӱржым налын да, жертвенникым эрныкташ манын, парняж дене жертвенникын тӱкыжӧ-влакым чыла могыр гычат шӱрен. Кодшо вӱрым жертвенник тӱҥыш кышкалын. Тыге тудо, эрныктыме йӱлам шуктен, жертвенникым святитлен.16[Моисей] кӧргарверым леведше чыла коям, мокшын чолкымжым, кок вергым кояжге налын да жертвенникеш йӱлалтен тӱргыктен.17А ӱшкыжын моло ужашыжым – коваштыжым, шылжым, шолоражым – Господь кӱштымӧ семынак стан деч ӧрдыжтӧ йӱлалтен.18Вара [Моисей] йӱлалтен пуашлан тагам вӱден конден. Аарон ден тудын эргыж-влак тага вуйыш кидыштым пыштеныт.19Моисей тагам шӱшкылын да вӱржым жертвенник ӱмбак чыла велым шыжыктен.20Тудо тагам ужашлан пӱчкеден, вара вуйым, моло ужашым да коям йӱлалтен тӱргыктен.21Кӧргарвер ден йолым мушмеке, Моисей тагам жертвенник ӱмбалан пӱтынек йӱлалтен тӱргыктен. Тиде – Господьлан келшыше йӱлалтен пуымо тамлыпушан надыр. Моисейлан тыге ышташ Господь кӱштен.22Моисей вес тагам, иерейлан шогалтыме годым шӱшкылшашым, вӱден конден. Аарон ден эргыж-влак кидыштым тага вуйыш пыштеныт.23Моисей тагам шӱшкылын, тудын вӱржым налын да Ааронын пурла пылыш мучашкыже, пурла кидшын кугыварняшкыже да пурла йолжын кугыварняшкыже шӱралтен.24Вара Моисей Ааронын эргыж-влакым ончыко луктын да нунын пурла пылыш мучашкышт, пурла кид ден пурла йолыштын кугыварняшкышт вӱрым шӱралтен. Вӱрым тудо жертвенник ӱмбакат чыла велым шыжыктен.25Вара [Моисей] коям, коя дене леведалтше почым, кӧргарверым леведше чыла коям, мокшын чолкымжым, кок вергым кояжге да пурла эрдым налын.26Тыгак Господь ончылно улшо шергинде комдо гыч ик шергиндым, олив ӱян ик киндым да ик лепошкам налын, нуным коя ден пурла эрде ӱмбаке пыштен.27Чыла тидым тудо Ааронын ден эргыж-влакын кидышкышт пыштен да, Господь ончылно рӱзалтен, надырлан конден.28Вара Моисей чыла тидым нунын кидышт гыч налын да йӱлалтен пуымо надыр дене пырля жертвенник ӱмбалан йӱлалтен тӱргыктен. Иерейлан шогалтыме лӱмеш тиде Господьлан келшыше тамлыпушан надыр лийын.29Вара Моисей тага оҥым налын да, Господь ончылно рӱзалтен, надырлан конден. Иерейлан шогалтыме годым кондымо надыр тага деч тиде Моисейын пайже лийын. Тыге ышташ тудлан Господь кӱштен.30Тылеч вара Моисей елейым, жертвенникысе вӱрым налын да Аарон ӱмбаке, вургемже ӱмбаке, тыгак эргыж-влак да нунын вургемышт ӱмбаке шыжыктен. Тыге Моисей Аароным, тудын вургемжым, тыгак эргыж-влакым, нунын вургемыштым святитлен.31Вара Моисей Аарон ден тудын эргыж-влаклан каласен: «Юмо дене вашлийме омашыш пурымо вер воктене шылым шолтыза да тудым комдышто кийыше святитлыме кинде дене туштак кочса. Мыланем кӱштымӧ да каласыме семынак лийшаш: ”Тидым Аарон ден эргыже-влак кочшаш улыт”.32А кодшо шыл ден киндым тулеш йӱлалтыза.33Тендам иерейлан шогалтыме кече-влак эртымешке, Юмо дене вашлийме омашыш пурымо вер деч ида кораҥ. Тиде шым кече шуйнаш тӱҥалеш.34Мом таче ыштыме – Господьын кӱштымыж почеш, тендан дене касарыме йӱлам шукташ ыштыме.35Шым кече йӱдшӧ-кечыже Юмо дене вашлийме омашыш пурымо вер воктене лийза. Колаш огыл манын, Господьын каласымыж семынак ыштыза. Тыге ышташ мылам [Господь Юмо] кӱштен».36Мом Господь Моисей гоч кӱштен, Аарон ден тудын эргыже-влак чыла шуктеныт.
Institute for Bible Translation, Finland