Лев10
1Ааронын Надав ден Авиуд эргыже-влак тулшол атыштым налыныт, тушко тулшол ден тӱтыртышым пыштен, Господь ончыко йот тулым конденыт. Тыге ышташ Господь кӱштен огыл улмаш.2Господь деч тул ора лектын да нуным йӱлалтен. Нуно Господьын чурийже ончылно коленыт.3Моисей Ааронлан каласен: «Теве мо нерген Господь шижтарен улмаш. Тудо ойлен: ”Мый декем лишемше-влак гочын Мый шке святой улмем, уло калык ончылно шке чапем ончыктем”». Аарон нимомат пелештен огыл.4Моисей тунам Мисаил ден Елцафаным – Ааронын Узиил чузайжын эргыже-влакым – ӱжын да нунылан каласен: «Кайыза, шольыда-влакым святой вер гыч стан деч ӧрдыжкӧ нумал лукса».5Нунышт каеныт да Моисейын каласымыж семынак шольыштым, вургемышт гыч кучен, стан деч ӧрдыжкӧ нумал луктыныт.6Ааронлан, тудын Елеазар ден Ифамар эргыж-влаклан Моисей каласен: «Шортмо йӱлам шуктен, ӱпдам шала ида колто, вургемдам ида кушкед, уке гын те коледа да Господьын шыдыжым уло калык ӱмбаке кондеда. Тек Господьын йӱлалтымыжлан тендан иза-шольыда-влак, уло израиль калык, шортыт.7А те, колаш огыл манын, Юмо дене вашлийме омашыш пурымо вер деч ида кораҥ, вет тендан ӱмбалныда – Господьын елейже». Аарон, Елеазар да Ифамар Моисейын каласымыж семынак ыштеныт.8Господь Ааронлан каласен:9«Тыланда колаш огыл манын, Юмо дене вашлийме омашыш пурымыда [але жертвенник деке лишеммыда] годым тыят, эргыч-влакат йошкар аракам да руштыктарыше моло йӱышым ида йӱ. Тиде тыланда – курым-курымеш тукым гыч тукымыш шуктен шогышаш закон.10Те святойым святой огыл деч да ару огылым ару деч ойырен моштышаш,11израиль калыкым Господьын Моисей гоч пуымо пунчалже-влаклан туныктышаш улыда».12Моисей Ааронлан да тудын кодшо эргыже-влаклан, Елеазар ден Ифамарлан, каласен: «Господьлан кондымо надыр деч кодшо кинде надырым налза да, тудын гыч шергиндым кӱктен, жертвенник воктене кочса. Тиде надыр – поснак святой.13Тудым святой верыште кочса, вет тиде – Господьлан кондымо надыр гыч тылат да эргыч-влаклан пуышаш ужаш. Тыге мылам [Господь] кӱштен.14Рӱзалтен пуымо оҥ шылым, нӧлтал пуымо эрдым ару верыште кочса. Нуным тый эрге-ӱдырет-влак дене пырля кочкын кертат. Вет тиде – израиль эрге-влакын кондымо татулык надырышт гыч тылат да эргыч-влаклан пуышаш ужаш.15Нӧлтал пуымо эрде ден рӱзалтен пуымо оҥ шылым израиль эрге-влак надыр коя дене пырля Господь ончылно рӱзалтен кондышаш улыт. Тиде курым-курымешлан тылат, эргыч [ден ӱдырет-влаклан] пуышашлык ужаш лиеш. Тыге [мылам] Господь кӱштен».16Моисей сулык верч кондымо казатагам кычалаш тӱҥалын, но тудым йӱлалтеныт улмаш. Тунам Моисей Елеазар ден Ифамарлан, Ааронын илыше кодшо эргыже-влаклан, шыдешкен да нунылан каласен:17«Молан те сулык верч надырым святой верыште кочкын огыдал? Вет тиде надыр – поснак святой. Тудо тыланда калык ӱмбач титакым кораҥдаш, тудын дене Господь ончылно касарыме йӱлам шукташ пуалтын.18Тиде надыр вольыкын вӱржым святой верыш пуртымо огыл. А шылжым те святой верыште кочшаш улыда ыле – тыге мылам кӱштымӧ».19Аарон Моисейлан каласен: «Теве таче нуно Господьлан сулык верч надыр ден йӱлалтен пуымо надырыштым кондышт. А вара мый денем теве мо лийын кайыш. Мый таче сулык верч надырым кочкам ыле гын, тиде Господьлан келша ыле мо?»20Тидым колмеке, Моисей тудын дене келшен.
Institute for Bible Translation, Finland