Лев7
1Теве титак верч кондымо надыр нерген закон. Тиде надыр – поснак святой.2Тудым йӱлалтен пуымо надыр вольыкым шӱшкылмӧ верешак шӱшкылман, вӱржым жертвенник ӱмбак чыла велым шыжыктыман.3Вольыкын чыла кояжым кондыман: коя дене леведалтше почым да кӧргарверым леведше коям,4кок вергым, нунын ӱмбалне да воктен улшо коям, тыгак мокшын чолкымжым – тудыжым верге дене пырля лукман.5Тек тидым иерей жертвенник ӱмбалне Господьлан надыр шотеш йӱлалтен тӱргыкта. Тиде – титак верч надыр.6Иерей тукымысо чыла пӧръеҥ тиде шылым кочкын кертеш, тудым святой верыште кочман. Тиде надыр – поснак святой.7Сулык верч надырланат, титак верч надырланат ик закон – надыр вольыкын шылже касарыме йӱлам шуктышо иерейлан лиеш.8Кунам иерей иктаж-кӧн йӱлалтен пуышаш вольыкшым надырлан конда, вольыкын коваштыже иерейлан кодеш.9Коҥгаш пыштыме, кӱртньӧ калаеш але салмаш кӱктен кондымо кеч-могай кинде надырат йӱлам шуктышо иерейлан кодеш.10Чыла кинде надыр – тудыжо олив ӱй дене йӧрымӧ але тудын деч посна лийже – Ааронын чыла эргыжлан иктӧр пуымо лийшаш.11Теве Господьлан кондымо татулык надыр шотышто закон.12Кӧ татулык надырым таушташ кондынеже, тудын дене пырля тек олив ӱй дене йӧрымӧ шергиндым, шере руаш гыч ыштыме да олив ӱй дене шӱрымӧ лепошкам, эн сай ложашыш олив ӱйым ешарен ыштыме эгерчым конда.13Тауштымо татулык надырым кондымо годым тек тудо шере лепошка дене пырля шушо руаш гыч пыштыме киндымат конда.14Господьлан пуаш манын, кажне тӱрлӧ киндым икте гыч налман. Нуно татулык надыр вольыкын вӱржым шыжыктыше иерейлан лийыт.15Вольыкым тауштымо татулык надыр шотеш шӱшкылмеке, шылжым тудо кечынак кочман. Эр марте тиде шыл деч нимо кодшаш огыл.16Кӧ надырым сӧрымӧ почеш але шке кумылын конда, шылым тек кондымо кечынак кочкеш. Но иктаж-мо кодеш гын, эрлашыжымат кочкаш лиеш.17А кумшо кечылан надыр шыл деч мо кодшым тулеш йӱлалтыман.18Татулык надырын шылжым кумшо кечын кочкыт гын, тиде сай огыл. Тыгай надыр тудым кондышо еҥлан нимогай пайдам ок пу, вет надырже шакшылалтын. Кӧ тиде шылым кочкеш, тудо титакан лиеш.19Шыл иктаж-мо ару огыл дек тӱкна гын, тудым кочман огыл, а тулеш йӱлалтыман. Ару надыр шылым кажне ару еҥ кочкын кертеш.20Но кӧ Господьлан кондымо татулык надыр шылым ару огыл улмыж годым кочкеш, тыгай еҥ шке калыкше кокла гыч кораҥдыме лийшаш.21Кӧ иктаж-мо ару огыл деке – айдемын ару огыллыкшо деке, ару огыл вольык але иктаж-могай ару огыл тыгыде чонан деке – тӱкна да Господьлан кондымо татулык надыр шылым кочкеш гын, тыгай еҥ шке калыкше кокла гыч кораҥдыме лийшаш».22Господь Моисейлан каласен:23«Израиль калыклан ойло: шолдыра вольыкынат, тыгыде вольыкынат нимогай кояжым ида коч.24Колышо але янлык кӱрыштмӧ вольыкын кояжым тӱрлӧ кӱлешлан кучылташ лиеш, но кочман огыл.25Кӧ Господьлан пуымо надыр вольыкын кояжым кочкеш, тыгай еҥ шке калыкше кокла гыч кораҥдыме лийшаш.26Кеч-кушто илаш тӱҥалыда гынат, нимогай вӱрым кочкышлан ида кучылт: кайыкынымат, вольыкынымат.27А кӧ иктаж-могай вӱрым кочкеш гын, тыгай еҥ шке калыкше кокла гыч кораҥдыме лийшаш».28Господь Моисейлан каласен:29«Израиль калыклан ойло: кӧ Господьлан татулык надырым конда, ты еҥ тушеч ужашым Господьлан пуышаш.30Тиде надырым тудо шке кидше дене кондышаш. Тек тудо коя [ден мокшын чолкымжым], тыгак оҥ шылым конда. Оҥ шылжым Господь ончылно рӱзалтен пуышаш.31Коям иерей жертвенникеш йӱлалтен тӱргыкта, а оҥ шыл Аарон ден эргыж-влаклан лиеш.32Татулык надыр гыч пурла эрдым иерейлан пуыза.33Ааронын кудо эргыже жертвенникеш татулык надыр гыч вӱр ден коям конда, пурла эрде тудын ужашыже лиеш.34Вет израиль эрге-влакын кондымо татулык надырышт гыч Мый рӱзалтен пуымо оҥ шыл ден нӧлтал пуымо эрдым налам да иерей Аарон ден эргыж-влаклан пуэм. Тиде нунылан Израиль калыкын кондымышт гыч курымешлан пуымо ужаш лиеш.35Господьлан кондымо надыр гыч теве Ааронын да тудын эргыж-влакын ужашышт. Тудым нуно Господь ончылно иерей пашам шукташ шогалмекышт налаш тӱҥалыт.36Иерей-влакым шӱрен палемдыме деч вара Израиль калык нунылан тиде ужашым пуэн шогыжо манын, Господь кӱштен. Тиде – курым-курымешлан тукым гыч тукымыш шуктен шогышаш закон.37Теве йӱлалтен пуымо надыр, кинде надыр, сулык верч надыр, титак верч надыр, иерейлан шӱрен палемдыме годым кондымо надыр да татулык надыр шотышто закон».38Тиде законым Господь Моисейлан Синай курыкышто пуэн. Тунам Господь Синай ир мландыште, Израиль калык Тудлан надырым конден шогыжо манын, кӱштен.
Institute for Bible Translation, Finland