Лев5
1Кӧ иктаж-мо лиймылан танык лийын да чыным гына ойлаш товатлен але иктаж-мом ужын, але пален, но увертарен огыл да тыге сулыкыш пурен гын, тудо титакан лиеш.2Але кӧ иктаж-мо ару огыл деке – ару огыл янлыкын, вольыкын але тыгыде чонанын колышо капше деке – тӱкна, тидым шекланен огыл гынат, тудо ару огыл да титакан лиеш.3Але айдемын ару огыллыкшо деке тӱкна – тиде кеч-могай ару огыллык лийже, кудын дене амыргат, – кеч тидым шекланен огыл, а вара гына умылен, тудо титакан лиеш.4Але кӧ шоналтыде иктаж-мом осалым але сайым ышташ шке умшаж дене товатлен гын, – тиде шоналтыде товатлыме кеч-могай паша лийже, – кеч тидым шекланен огыл, а вара гына умылен, тидлан тудо титакан лиеш.5Кӧ нине каласыме гыч иктаж-кудыж дене титакан лийын гын, тек тудо мо дене сулыкыш пурымыж нерген чон почын каласа.6Тек тудо шке сулыкшо верч Господьлан титак верч надырлан тыгыде вольык гыч шорыкым але казам пуа. Тыге иерей тудын дене сулыкым касарыме йӱлам шукта.7Ты еҥ шорыкым пуэн ок керт гын, титакыш пурымыжлан Господьлан тек кок кедым але самырык кок кӧгӧрченым конда: иктыжым – сулык верч надырлан, весыжым – йӱлалтен пуашлан.8Тек нуным иерей деке конда. Тек ончыч тудыжо сулык верч кондымыжым налеш, кайыкын вуйжым пӱтыралеш, но капше деч ок ойыро.9Вара сулык верч кондымо тиде кайыкын вӱржым жертвенникысе пырдыжыш шыжыкта, а кодшо вӱрым жертвенник тӱҥыш чыпчыкта. Тиде сулык верч надыр лиеш.10А весыжым йӱлам шуктымо радам почеш йӱлалта. Тыге иерей ты еҥ дене касарыме йӱлам шукта, да тудын титакше кудалтыме лиеш.11А кӧ кок кедым але самырык кок кӧгӧрченым пуэн ок керт гын, тек сулыкыш пурымыжлан сулык верч надыр шотеш ефан луымшо ужашыже эн сай ложашым конда. Тек ложашыш олив ӱйым ок йоктаре, ӱмбакыже ладынымат ок пыште, вет тиде – сулык верч надыр.12Тек тидым иерей деке конда, а иерей тушеч шарныктыше ужашлан кормыж тич ложашым налеш да Господьлан пуымо моло надыр дене пырля жертвенникеш йӱлалтен тӱтыра. Тиде сулык верч надыр лиеш.13Тыге иерей ты еҥ дене касарыме йӱлам шукта, да тудын кӱшнӧ каласыме кеч-могай сулыкшо кудалтыме лиеш. Кодшо ложаш, кинде надыр семынак, иерейлан лиеш».14Господь Моисейлан каласен:15«Иктаж-кӧ, Господьлан святитлен пуымо надыр ваштареш титакым ыштен, йоҥылыш сулыкыш пура гын, тек шке титакше верч шорык кӱтӱ гыч Господьлан экшыкдыме тагам конда. Титак верч пуымо таган акшым ший сикль дене – святой сикль дене – шотлыман.16Тек тудо святитлен пуымо надыр ваштареш титакым ыштымыжлан надырын акшым тичмашнек пӧртылта да тышке тудын эше ик визымше ужашыжым ешара, чыла тидым иерейлан пуа. Тагам титак верч надырлан конден, иерей тиде еҥ дене касарыме йӱлам шукта, да тудын титакше кудалтыме лиеш.17Кӧ Господьын кӱштымыж ваштареш иктаж-мом ышташ чарымым ыштыме дене сулыкыш пура, да тудын ӱмбак титак возеш гын,18тек тудо иерей деке палемдыме акым шогышо экшыкдыме тагам титак верч надырлан конда. Иерей ты еҥын палыде ыштыме сулыкшым касара, да тудын титакше кудалтыме лиеш.19Тиде – титак верч надыр. Тудым Господь ончылно титакым ыштымылан кондат».
Institute for Bible Translation, Finland