Лев4
1Господь Моисейлан каласен:2«Израиль эрге-влаклан каласе: иктаж-кӧ Господьын иктаж-кудо кӱштымашыжым лӱмын огыл, а йоҥылыш пудыртен, сулыкыш пура, ышташ чарымым ыштен колта гын, теве мом ыштышаш.3Шӱрен палемдыме иерей сулыкым ышта да титак уло калык ӱмбаке возеш гын, тек шке сулыкшо верч Господьлан надыр шотеш экшыкдыме самырык ӱшкыжым конда.4Тек ӱшкыжым Юмо дене вашлийме омашыш пурымо вер деке, Господь ончыко, вӱден толеш, кидшым ӱшкыжын вуйышкыжо пышта да тудым Господь ончылно шӱшкылеш.5Вара шӱрен палемдыме, [святитлен шогалтыме] иерей тек ӱшкыж вӱрым налеш да Юмо дене вашлийме омашыш пурта,6парняжым вӱреш нӧрта да Господь ончылно, святой верын пӱрдышыжӧ ончылно, вӱрым шым гана шыжыкта.7Тек тудо Юмо дене вашлийме омашыште Господь ончылно улшо тамлыпушым тӱтырымӧ жертвенникын тӱкыжӧ-влакымат ӱшкыж вӱр дене шӱралта. А кодшо вӱрым тек Юмо дене вашлийме омашыш пурымо вер воктене улшо надыр йӱлалтыме жертвенник тӱҥыш кышкалеш.8Тек тудо сулык верч пуымо ӱшкыжын уло кояжым луктеш: кӧргарверым леведше да воктеныже улшо чыла коям,9эше кок вергыжым, нунын ӱмбалне да воктен улшо коям, тыгак мокшын чолкымжым – тудыжым верге дене пырля лукман.10Коям татулык надыр ӱшкыж гыч лукмо семынак лукман. Иерей чыла тидым йӱлалтен пуымо жертвенникеш йӱлалтен тӱргыктыжӧ.11А ӱшкыж коваштым да чыла шылжым, вуй ден йолжым, кӧргарвер ден шолоражым –12ӱшкыжын моло ужашыжым – тек стан деч ӧрдыжкӧ ару верыш, надыр коям йӱлалтыме деч кодшо ломыжым оптымо вер деке, луктеш да пу ӱмбалан йӱлалта. Чыла тиде тек ломыжым оптымо вер воктене йӱлалтыме лиеш.13Уло Израиль калык лӱмын огыл, а йоҥылыш сулыкым ышта да тидым ок шеклане – Господьын кӱштымашыже-влак ваштареш иктаж-мом ыштен, титакыш пура гын,14ыштыме сулыкым пален налмеке, тек сулык верч надырлан ӱшкыжым пуа. Тек нуно тудым Юмо дене вашлийме омаш ончыко вӱден кондат,15калыкын кугуракышт Господь ончылно шке кидыштым ӱшкыж вуйыш пыштат да тиде ӱшкыжым Господь ончылно шӱшкылыт.16Тек шӱрен палемдыме иерей ӱшкыж вӱрым Юмо дене вашлийме омашыш пурта,17парняжым вӱрыш чыка да Господь ончылно, святой верын пӱрдышыжӧ ончылно, вӱрым шым гана шыжыкта.18Тек тудо ӱшкыж вӱрым Юмо дене вашлийме омашыште Господь чурий ончылно улшо [тамлыпушым тӱтырымӧ] жертвенникысе тӱкылашке шӱралта. А кодшо вӱрым Юмо дене вашлийме омашыш пурымо вер воктене улшо надыр йӱлалтыме жертвенник тӱҥыш кышкалеш.19Вара тек ӱшкыжын чыла кояжым луктеш да жертвенникеш йӱлалтен тӱргыкта –20чылажымат сулык верч надырлан кондымо ӱшкыж дене ыштыме семынак ышта. Тыге иерей касарыме йӱлам шукта, да калыкын сулыкшо кудалтыме лиеш.21А ӱшкыжын моло ужашыжым иерей тек стан деч ӧрдыжкӧ луктеш да ончычсо ӱшкыжым йӱлалтыме семынак йӱлалта. Тиде калыкын сулыкшо верч надыр лиеш.22Калык вуйлатыше лӱмын огыл сулыкыш пура – Господь Юмыжын кӱштымашыже-влак ваштареш иктаж-мом йоҥылыш ышта да титакан лиеш гын,23сулыкыш пурымыж нерген пален налмеке, тек надырлан экшыкдыме казатагам вӱден конда.24Тек кидшым тудын вуйышкыжо пышта да Господь ончылно, йӱлалтен пуымо вольыкым шӱшкылмӧ вереш, шӱшкылеш. Тиде – сулык верч надыр.25Сулык верч кондымо надыр вольыкын вӱржым иерей парняж дене налеш да надыр йӱлалтыме жертвенникысе тӱкӧ-влакым шӱралта, а кодшо вӱрым жертвенник тӱҥыш кышкалеш.26Татулык надырын кояжым йӱлалтыме семынак тиде казатаган чыла кояжым иерей тек жертвенникеш йӱлалтен тӱргыкта. Тыге ыштен, иерей калык вуйлатыше дене касарыме йӱлам шукта, да тудын сулыкшо кудалтыме лиеш.27Тыглай калык кокла гыч иктаж-кӧ лӱмын огыл, а йоҥылыш сулыкым ышта – Господьын кӱштымыж ваштареш иктаж-мом ышташ чарымым ышта да титакан лиеш гын,28сулыкыш пурымыж нерген пален налмекше, тек надырлан экшыкдыме казам вӱден конда.29Тек тиде еҥ кидшым сулык верч кондымо надырын вуйышкыжо пышта да йӱлалтен пуымо надырым шӱшкылмӧ вереш шӱшкылеш.30Тек иерей каза вӱрым парняж дене налеш да надыр йӱлалтыме жертвенникысе тӱкӧ-влакым шӱралта, а кодшо вӱрым жертвенник тӱҥыш кышкалеш.31Татулык надыр коя семын казанат чыла кояжым лукман. Тек иерей тудым Господьлан келшыше тамлыпушан надыр семын жертвенникеш йӱлалтен тӱргыкта. Тыге иерей ты еҥ дене касарыме йӱлам эртара, да тудын сулыкшо кудалтыме лиеш.32Сулык верч надырым иктаж-кӧ шорык кӱтӱ гыч кондынеже гын, тек экшыкдыме шорыкым пуа.33Тек тудо шке кидшым сулык верч кондымо шорыкын вуйышкыжо пышта да тудым йӱлалтен пуымо надырым шӱшкылмӧ вереш шӱшкылеш.34Тек иерей сулык верч кондымо шорыкын вӱржым парняж дене налеш да надыр йӱлалтыме жертвенникын тӱкыжӧ-влакым шӱралта, а кодшо вӱрым жертвенник тӱҥыш кышкалеш.35Вара, татулык надыр шотеш кондымо шорыкын кояжым лукмо семынак, тек тиде шорыкын кояжым луктеш. Тек тудым иерей Господьлан пуымо моло надыр дене пырля жертвенникеш йӱлалтен тӱргыкта. Тыге иерей тиде еҥ дене касарыме йӱлам шукта, да тудын сулыкшо кудалтыме лиеш.
Institute for Bible Translation, Finland