Лев3
1Кӧ татулык надырлан шолдыра вольыкым – узым але авам – кондынеже гын, тек тудым Господьлан экшыкдымым пуа.2Тек кидшым надыр вольыкын вуйышкыжо пышта да Юмо дене вашлийме омашыш пурымо вер воктелан шӱшкылеш, а Ааронын иерей эргыже-влак вольык вӱрым жертвенник ӱмбак чыла велым шыжыктат.3Татулык надыр гыч Господьлан кӧргарверым леведше да воктеныже улшо чыла коям надыр шотеш пуыман,4эше кок вергыжым, нунын ӱмбалне да воктен улшо коям, тыгак мокшын чолкымжым – тудыжым верге дене пырля лукман.5Тек Ааронын эргыже-влак чыла тидым жертвенникысе пу ӱмбалан йӱлалтен пуымо надыр дене пырля йӱлалтен тӱргыктат. Тиде – Господьлан келшыше тамлыпушан надыр.6А кӧ Господьлан татулык надырым тыгыде вольык гыч кондынеже – узым але авам, – тек тудым экшыкдымым пуа.7Надыржылан тудо шорыкым конда гын, тек Господь ончыко шогалта,8вара кидшым надыр вольыкшын вуйышкыжо пышта да тудым Юмо дене вашлийме омаш ончылан шӱшкылеш. А Ааронын эргыж-влак тек шорык вӱрым жертвенник ӱмбак чыла велым шыжыктат.9Тек ты еҥ татулык надыр гыч Господьлан надыр шотеш вольыкын кояжым пуа. Тышке теве мо пурат: коя дене леведалтше пӱтынь поч – тудым почлу дечак пӱчкын налман, кӧргарверым леведше да воктен улшо чыла коя,10кок верге, нунын ӱмбалне да воктен улшо коя, тыгак мокшын чолкымжо – тудыжым верге дене пырля лукман.11Тек иерей чыла тидым жертвенникеш йӱлалтен тӱргыкта: тиде кочкыш – Господьлан надыр.12Кӧ надырлан казам пуа гын, тек тудым Господь ончыко конден шогалта,13кидшым казан вуйышкыжо пышта да Юмо дене вашлийме омаш ончылан шӱшкылеш. А Ааронын эргыж-влак тек каза вӱрым жертвенник ӱмбак чыла велым шыжыктат.14Господьлан надыр шотеш казан кӧргарвержым леведше да воктеныже улшо чыла коям пуыман,15эше кок вергыжым, нунын ӱмбалне да воктен улшо коям, тыгак мокшын чолкымжым – тудыжым верге дене пырля лукман.16Тек иерей чыла тидым жертвенникеш йӱлалтен тӱргыкта: тиде кочкыш – [Господьлан] келшыше тамлыпушан надыр, чыла коя – Господьлан.17Кеч-кушто илаш тӱҥалыда гынат, тиде – курым-курымешлан тукым гыч тукымыш шуктен шогышашлык закон. Нимогай коям, нимогай вӱрым ида коч».
Institute for Bible Translation, Finland