Нав20
1Господь Иисуслан каласен:2«Израиль эрге-влаклан ойло: куржын утлаш манын, тек шке мландыштышт ола-влакым ойырат. Нунын нерген Мый тыланда Моисей гоч ойленам.3Тушко вес еҥым лӱмын огыл, а йоҥылыш пуштшо куржын кертеш. [Пуштшо еҥын мер калык ончылно судыш шогалмешкыже,] вӱр верч ӱчым шуктышо еҥ [тудым ынже пушт манын], тек [нине ола] тендан дене куржын утлымо вер лийыт.4Кӧ нине ола гыч иктаж-кудышкыжо куржеш, тек ола капка деке шогалеш да олан кугуракше-влаклан мо лиймым каласкален пуа. Тек нуно тудым шке олашкышт пуртат, илашыже верым пуат.5Кунам вӱр верч ӱчым шуктышо еҥ тудын почеш толеш, нуно пуштшо еҥым тудын кидыш пуышаш огытыл – тудо лишылъеҥжым лӱмын пуштын огыл, тудым нигунам тушман семын ончен огыл.6Мер калык ончылно судыш шогалмешке да тиде жапыште лийше кугу иерейын колымешкыже, тек тудо ты олаште ила. Тидын деч вара гына пуштшо еҥ шке мӧҥгыжӧ, шке олашкыже, кушечын тудо куржын, пӧртыл кертеш».7Нуно Галилейысе Неффалим курыклаште Кедес олам, Ефрем курыклаште Сихемым да Иуда курыклаште Кириаф-Арбам, вес семынже Хевроным, ойыреныт.8Тыгак Иордан вес велне, Иерихон деч эрвелныла, тыгай ола-влакым ойыреныт: ир мландыште, Рувим тукымын тӧрверыштыже – Бецерым, тыгак Галаадыште, Гад мландыште – Рамофым да Васаныште, Манассий мландыште – Голаным.9Нине ола чыла израиль эрге да нунын дене илыше йотъеҥ-влаклан лийыныт. Пуштшо еҥын мер калык ончылно [судыш] шогалмешкыже вӱр верч ӱчым шуктышо еҥ тудым ынже пушт манын, вес еҥым йоҥылыш пуштшо еҥ нине олалашке куржын кертын.
Institute for Bible Translation, Finland