Нав19
1Кокымшо шерева Симеон тукым ден тудын урлыкшо-влаклан лектын. Нунын мландышт Иуда тукым мланде коклаште лийын.2Тышке тыгай ола-влак пуреныт: Вирсавий але вес семынже Шева, Молада,3Хацар-Шуал, Вала, Эцем,4Елтолад, Вефул, Хорма,5Секелаг, Беф-Маркавоф, Хацар-Суса,6Беф-Леваоф да Шарухен – чылаже латкум ола да нунын йыр улшо илем-влак,7Аин, Риммон, Ефер да Ашан – ныл ола да нунын йыр улшо илем-влак,8тыгак нине ола воктене улшо чыла моло ял Ваалаф-Беер – вес семынже кечывалвел Рама – марте. Теве Симеон тукымын, тудын урлыкшо-влакын мланде ужашышт.9Симеон тукымлан мланде ужаш Иуда эрге-влакын мландыж гыч ойырымо лийын. Иуда тукымлан пуымо мланде нунылан утыждене кугу лийын, сандене Симеон тукым эрге-влак шке мланде пайыштым нунын ужаш гыч налыныт.10Кумшо шерева Завулон тукым ден тудын урлыкшо-влаклан лектын. Нунын мланде чекышт Сарид марте шуйнен.11Тушечын чек теҥыз деке да Марала велке каен, вара Дабешеф деке миен шуын да Иокнеам воктенысе йогын деке шуйналтын.12Сарид дечын тудо мӧҥгеш эрвелкыла, кече лекме могырыш, Кислоф-Фавор деке, савырнен. Тушечын Давраф деке каен да Иафийыш кӱзен.13Вара эрвелкыла Гаф-Хеферыш, Итта-Кациныш каен, тушеч Риммоныш, Мифоар ден Неяш миен шуын.14Йӱдвелне чек Ханнафоныш савырнен да Ифтах-Ел лапвер дене мучашлалтын.15Нунын мланде ужашышкышт тыгак Каттаф, Нагалал, Шимрон, Идеала да Вифлеем пуреныт – чылаже латкок ола да нунын йыр улшо илем-влак.16Теве Завулон тукым урлык-влакын мландышт, нунын ола ден илемышт.17Нылымше шерева Иссахар тукым ден тудын урлыкшо-влаклан лектын.18Нунын мландышкышт Изреель, Кесуллоф, Сунем,19Хафараим, Шион, Анахараф,20Раввиф, Кишион, Авец,21Ремеф, Ен-Ганним, Ен-Хадда, Беф-Пацец пуреныт.22Мландын чекше Фавор, Шагацим, Вефсамис воктеч эртен да Иордан дене мучашлалтын. Чылаже – латкуд ола да нунын йыр улшо илем-влак.23Теве Иссахар тукым урлык-влакын мландышт, нунын ола ден илемышт.24Визымше шерева Асир тукым ден тудын урлыкшо-влаклан лектын.25Нунын мландышкышт Хелкаф, Хали, Ветен, Ахсаф,26Аламелех, Амад да Мишал пуреныт. Касвелне мланде чек Кармил ден Сихор-Ливнаф воктечын эртен каен.27Вара эрвелкыла Беф-Дагон деке савырнен, Завулон мланде ден Ифтах-Ел лапвер деке миен шуын, [Асафыш пурен.] Тушечын йӱдвелыш Беф-Емек ден Неиел деке каен, Кавул деке йӱдвелыш шуйнен.28Вара чек Еврон, Рехов, Хаммон, Кана деке Кугу Сидон марте каен.29Тушечын мӧҥгеш Рама дек савырнен да чоткыдемдыме Тир ола марте шуын, вара Хосса велке савырнен да теҥыз дене, Ахзив лӱман вер дене, мучашлалтын.30Тышкак Умма, Афек, Рехов пуреныт – чылаже коло кок ола да нунын йыр улшо илем-влак.31Теве Асир тукым урлык-влакын мландышт, нунын ола ден илемышт.32Кудымшо шерева Неффалим тукым ден тудын урлыкшо-влаклан лектын.33Нунын чекышт Хелеф [да] Цананнимыште улшо тумо деч тӱҥалын. Тушеч Адами-Некев ден Иавнеил деке, Лаккум марте, каен да Иордан деке миен шуын.34Тушеч касвелкыла Азноф-Фавор деке савырнен да Хукок деке каен. Кечывалвелне нунын воктене Завулонын мландыже, касвелне Асирын мландыже лийыныт, а эрвелне, Иордан воктене, Иудан мландыже лийын.35Тышке чоткыдемдыме тыгай ола-влак пуреныт: Циддим, Цер, Хамаф, Раккаф, Киннереф,36Адама, Рама, Асор,37Кедес, Едрей, Ен-Гацор,38Иреон, Мигдал-Ел, Хорем, Беф-Анаф да Вефсамис – чылаже латиндеш ола да нунын йыр улшо илем-влак.39Теве Неффалим тукым урлык-влакын мландышт, нунын ола ден илемышт.40Шымше шерева Дан тукым ден тудын урлыкшо-влаклан лектын.41Нунын мландышкышт Цора, Ештаол, Ир-Шемеш,42Шаалаввин, Аиалон, Ифла,43Елон, Фимна, Екрон,44Елтеке, Гавафон, Ваалаф,45Игуд, Бене-Верак, Гаф-Риммон,46Ме-Иаркон, Ракон да Иоппий ваштареш улшо кундем пуреныт. Пуымо мланде Дан тукымлан изи лийын.47Но тудо варажым шке мландыжым йомдарен. Тунам Дан эрге-влак Ласем ӱмбаке сар дене каеныт, тудым сеҥен налыныт да тушто илыше-влакым керде дене кырен шалатеныт. Нуно тиде олам шкаланышт налыныт да тушто илаш тӱҥалыныт. Ласем олам шке кугезышт лӱмеш Дан манын лӱмденыт. [Аморрей-влак Елом ден Саламиныштак илаш кодыныт, но Ефрем эрге-влак нуным сеҥеныт, да аморрей-шамыч нунылан ӧкым пашам ыштен илаш тӱҥалыныт.]48Теве Дан тукым урлык-влакын мландышт, нунын ола ден илемышт. [Дан эрге-влак аморрей-шамычым пытарен огытыл. Сандене аморрей-влак нуным курыклаште шыгыремдылыныт, лапверыш лекташ эрыкым пуэн огытыл да икмыняр мланде ужашыштым шупшын налыныт.]49Мландым шеледен пытарымеке, израиль эрге-влак шке коклаштышт мландым Иисуслан, Нав эргылан, ойыреныт.50Господьын кӱштымыж почеш тудлан йодмыж семынак Ефрем курыкысо Фамнаф-Сараи олам пуэныт. Иисус тиде олам угыч нӧлталын да тушто илаш тӱҥалын.51Теве мланде ужаш-влак, нуным иерей Елеазар, Нав эрге Иисус да урлыквуй-шамыч израиль эрге-влакын тукымыштлан Силомышто, Господьын чурийже ончылно, Юмо дене вашлийме омашыш пурымо вер дене, шерева почеш шеледеныт. Тыге мландым шеледыме паша мучашлалтын.
Institute for Bible Translation, Finland