Иов2
1Ик кечын Юмын эрге-влак угыч Господь ончыко шогалаш толыныт, нунын дене пырля тыгак сатана толын.2Господь сатана деч йодын: «Тый кушеч толынат?» Тудыжо Господьлан вашештен: «Мый мланде мучко коштым, чыла вере лийым».3Господь сатаналан каласен: «Мыйын Иов тарзем шекланышыч мо? Мландымбалне тудын гай айдеме уке: чынле да шылталаш амалдыме, Юмо деч лӱдшӧ да осал деч кораҥын коштшо. Иов ончычсо семынак шылталаш амалдыме. А тый, амал деч посна пытараш манын, Мыйым тудын ваштареш таратенат».4Господьлан сатана вашештен: «Кажныже шке коваштыжым арален налеш, вет шке илышыж верч айдеме мо улыжым чыла пуа.5Но кидет шуялте да лужым, капшым логал – тунам тудо Тыйым чапландара мо?»6Господь сатаналан каласен: «Йӧра, тудо – тыйын кидыштет, лач чонжым арален кодо».7Сатана Господь чурий ончыч каен да Иовым вуй гыч йол марте шӱйын пуалше лӱмӧ дене черландарен.8Капшым удырен нӱжаш манын, Иов шун ате катыкым налын да [ола деч ӧрдыжтӧ] ломыжыш шинчын.9Ватыже тудлан каласен: «Тый тугак шылталаш амалдыме лийнет? Юмым карге да коло!»10Но Иов ватыжлан вашештен: «Тый ушдымо ӱдырамаш гай ойлыштат. Ме Юмо деч сайым налына гын, удажымат налшаш огынал мо?» Чыла мо лийме ӱмбач Иов ик шомак денат сулыкыш пурен огыл.11Иов дене лийше чыла азап нерген тудын кум йолташыже пален налыныт. Нуно – Феман гыч Елифаз, Савхей гыч Вилдад да Наама гыч Софар – кажныже шке илыме верже гыч тарваненыт да, йолташышт дене ойгыжым пайлаш да тудым лыпландараш манын, пырля погынен толыныт.12Умбачын ужмеке, Иовым паленат огытыл. Нуно кугу йӱкын шортын колтеныт, ӱмбал вургемыштым кушкедыныт да кӱшкӧ, вуйышт ӱмбаке, пуракым кышкеныт.13Иов дене пырля мланде ӱмбалне нуно шым кече да шым йӱд шинченыт. Нигӧ тудлан ик шомакымат пелештен огыл, вет нуно ужыныт: Иов моткоч чот орлана.
Institute for Bible Translation, Finland