Иов1
1Уц мландыште Иов лӱман еҥ илен. Тудо чынле, шылталаш амалдыме лийын, Юмо деч лӱдын илен да осал деч кораҥ коштын.2Иовын шым эргыже да кум ӱдыржӧ шочыныт.3Тиде еҥ пеш поян улмаш: тудын шым тӱжем вуй тыгыде вольыкшо, кум тӱжем верблюдшо, вичшӱдӧ мужыр ӱшкыжшӧ, вичшӱдӧ осёл вӱльыжӧ да моткоч шуко тарзыже лийыныт. Эрвел мландыште илыше-влак кокла гыч Иов эн чот чапланыше лийын.4Тудын эргыже-влак кочмаш-йӱмашым эртараш икте-весыштым шке мӧҥгышкышт черет дене погеныт. Пырля кочкаш-йӱаш нуно кум ака-шӱжарыштымат ӱжыныт.5Кунам черет дене ыштыме кочмаш-йӱмаш кече-влак эртеныт, Иов эргыже-влакым шкеж деке ӱжыктен да нунын дене эрныктыме йӱлам эртарен. Эрдене эр кынелын, тудо кажныж верч йӱлалтен пуымо надырым [да нунын сулыкышт верч ик ӱшкыжым] конден. Иов тыге шонен: «Эргым-влак, йоҥылышым ыштен, ала языкыш пуреныт да ушыштышт Юмым мыскыленыт». Тыге тудо кажне гана ыштен.6Ик кечын Юмын эрге-влак Господь ончыко шогалаш толыныт. Нунын дене пырля тыгак сатана толын.7Господь сатана деч йодын: «Тый кушеч толынат?» Тудыжо Господьлан вашештен: «Мый мланде мучко коштым, чыла вере лийым».8Господь сатаналан каласен: «Мыйын Иов тарзем шекланышыч мо? Мландымбалне тудын гай айдеме уке: чынле да шылталаш амалдыме, Юмо деч лӱдшӧ да осал деч кораҥын коштшо».9Господьлан сатана вашештен: «Таклан мо Иов Юмо деч лӱдын ила?10Тый огыл мо тудым шкенжым, суртшым да мо улыжым чыла могырым авырен налынат? Тый тудын чыла пашажым суапландаренат, садланак тудын кӱтӱжӧ-влак мланде мучко шукемыт.11Но шке кидетым шуялте да Иовын чыла мо улыжым логал – тунам тудо Тыйым чапландара мо?»12Господь сатаналан каласен: «Йӧра, тудын чыла мо улыжо – тыйын кидыштет, лач шкенжым ит логал». Господь деч сатана каен.13Ик кечын, кунам Иовын эргыж ден ӱдыржӧ-влак эн кугу изаштын пӧртыштыжӧ кочкын да йошкар аракам йӱын шинченыт,14Иов дек уверзе толын да каласен:15«Ӱшкыж-влак куралыныт, воктенышт осёл вӱльӧ-шамыч кочкын коштыныт. Кенета савей-влак керылтыныт да нуным руалтен налыныт, а тарзе-шамычым керде дене пуштыныт. Тылат увертараш манын, мый шкет утлен кодынам».16Тудо эше ойлен пытарен огыл, вес еҥ толын да увертарен: «Кава гыч Юмын тул рашкалтен, шорык ден тарзет-влакым йӱлалтен. Тылат увертараш манын, мый шкет утлен кодынам».17Тудат ойлен пытарен огыл, эше весе толын да каласен: «Халдей-шамыч, кум тӱшкалан шелалтын, верблюдет-влак ӱмбаке кержалтыныт да нуным руалтен налыныт, а тарзет-влакым керде дене пуштыныт. Мый шкет утлен кодынам да тидын нерген тылат увертарем».18Тиде еҥат ойлен пытарен огыл, эше весе толын да увертарен: «Тыйын эргыч ден ӱдырет-влак эн кугу изаштын пӧртыштыжӧ кочкын да йошкар аракам йӱын шинченыт.19Тиде жапыште ир мланде гыч кугу мардеж толын лектын да пӧртын ныл лукшым тарватен – пӧрт тыйын шочшет-влак ӱмбак сӱмырлен, да нуно коленыт. Мый шкет утлен кодынам да тидын нерген тылат увертарем».20Тунам Иов кынел шогалын да ӱмбал вургемжым кушкедын, вара ӱпшым нӱжын да, вуйжым мланде марте савен,21тыге каласен: «Ава мӱшкыр гыч мый чара лектынам, тышечынат чара каем. Господь пуэн, Господь налын. [Кузе Тудо шонен пыштен, тыгак ышталтын.] Тек Господьын лӱмжӧ чапландарыме лиеш!»22Чыла мо лийме ӱмбач Иов языкыш пурен огыл, Юмо нерген нимогай йӧрдымӧ шомакым пелештен огыл.
Institute for Bible Translation, Finland