Иов3
1Тидын деч вара Иов умшажым почын да шке шочмо кечыжым карген.2Тудо тыге каласен:3«Кошаргыже кече, кунам мый шочынам,да йӱд, кунам каласеныт: ”Эрге иланен”.4Тек тудо кече пычкемыш лиеш,тек кӱшнӧ улшо Юмо тудым ок шарналте,тек волгыдо ты кечым ок волгалтаре!5Тек пычкемыш ден колымаш ӱмыл тудо кечылан оза лийыт,тек тудым шем пыл вузалын авыра,тек ты кечым тӱп пычкемыш лӱдыкта.6Тек тудо йӱдым пич пычкемыш вӱдылеш,тек идалык кечышотыш тудо ок пуро,тылзыгече радамыштат ок шотлалт.7О, тудо йӱд! Тек тудо шочшо деч посна лиеш,куанле йӱк ты йӱдым ок йоҥгалт!8Тек тудым локтат ош кечым каргыше-влак,левиафанымат помыжалтарен кертше-шамыч.9Йӧрат тек тудын ӱжара шӱдыржӧ-влак:тек тудо волгыжмым вуча, но тудыжо ок тол,эр ӱжаран кечыйолжым тек огеш уж –10вет авамын мӱшкыржӧ гыч корным тиде йӱд петырен огыл,мыйын шинчам деч орлыкым шылтен огыл.11Молан колен омыл авагудо гыч лекме годымак,молан тӱнчыген омыл шочын вочмекак?12Молан мыйым кидышке налыныт,молан мылам чызым шупшашыже кӱлын?13Кием ыле кызыт канен, ласкан малем ыле14мландымбалысе кугыжа ден каҥашпуышо-влак коклаште,кӧмыт шкаланышт полат-шамычым нӧлтеныт,15кием ыле шӧртньым поген ситарыше,суртыштым ший дене темыше он-влак дене пырля.16Але лугыч кудалтыме аза семын мыйым тоят ыле,ош тӱням ужде колышо аза-влак коклаште лиям ыле.17Осалым ыштыше-влак тушто ажгынымыштым чарнат,ӱнарым йомдарыше-шамыч канаш тӱҥалыт.18Петырымаште шинчыше-влак тушто ласкалыкым муыт,пашам эскерышын кычкырымыжым нуно огыт кол.19Тушто тыглай еҥ кугу дене иктӧр,кулат шке озаж деч эрыкан.20Молан орланен илышылан ош тӱня пӧлеклыме лийын,кӧн чонжылан кочо – тудлан илыш пуалтын?21Нуно колымашым вучат, но тудыжо ок тол,поянлыкым кычалме деч чотрак тудым кычалыт –22шӱгарыш логалмылан нуно пеш чот куанат,пеш чот йывыртат ыле.23Кӧлан корно петыралтын,кӧн ончылно Юмо чаракым шынден –молан тыгай еҥлан илашыже?24Нелын шӱлымаш мылам кинде олмеш лийын,йоген лектеш вӱд семын мыйын кечкыжмем.25Мо деч лӱдынам, тидак мый денем лийын,мо деч чытырен иленам, тидак мый декем толын.26Йомын тыныс, уке ласкалык да каныш:чонемже пеш чот вургыжеш».
Institute for Bible Translation, Finland