Иер13
1Господь мылам тыге каласен: «Кай, шкаланет йытын ӱштым нал да кыдалышкет ӱштал, но тудым вӱдеш ит нӧртӧ».2Господьын кӱштымыж семынак, мый ӱштым налынам да кыдалышкем ӱшталынам.3Вес гана мылам Господь деч тыгай шомак лийын:4«Налын чийыме ӱштетым нал да Евфрат эҥер деке кай, тудым кӱ курыкысо шелшеш шылтен пыште».5Мый каенам да, Господьын кӱштымыж семынак, ӱштым Евфрат воктене шылтенам.6Шуко жап эртымеке, Господь мылам каласен: «Кынел, Евфрат деке кай да Мыйын тылат тушан шылташ кӱштымӧ ӱштым налын кондо».7Мый Евфрат деке толынам да шылтыме вер гыч ӱштым кӱнчен луктынам, но тудо лыжгаен, нимолан йӧрдымӧ лийын.8Господь деч мылам тыгай шомак лийын:9«Тыге ойла Господь: теве тыге Мый Иудан кугешнымашыжым, Иерусалимын кугу кугешнымашыжым пытарем.10Тиде осал калык, кудо Мыйын шомакем ынеж колышт, ӱскырт шӱмжӧ ӱжмӧ почеш ила, вес юмо-влак почеш коштеш, нунылан служитла да кумалеш. Тиде калык саде ӱштӧ гаяк нимолан йӧрдымӧ лиеш.11Кузе ӱштӧ айдемын кыдалже деке чак кия, тугак Мыят Израиль ден Иуда калыкым Шке декем лишемденам, – ойла Господь. – Нуно Мыйын калыкем да Мыйын чапем, моктымашем да сӧрастарышем лийшаш улыт, но Мыйым колыштын огытыл.12Сандене нунылан тыгай шомакым каласе: ”Тыге ойла Господь, Израильын Юмыжо: чыла арака кувшиным йошкар арака дене темат”. Нуно тылат вашештат: ”Арака кувшиным йошкар арака дене темымым ме огына пале мо?”13Тый нунылан вашеште: ”Тыге ойла Господь: тиде мландыште илыше чыла еҥлан, Давидын престолыштыжо шинчыше кугыжа-влаклан, иерей ден пророк-шамычлан, Иерусалимыште илыше-влаклан Мый йошкар аракам руштмешкышт йӱктем.14Мый нуным икте-весышт дене ваш перен шалатем: изам – шке шольыж дене, ачам – эргыж дене, – ойла Господь. – Ом чамане, ом серлаге, нуным пытарымылан ом ӧкынӧ!”»15Колыштса, тӱткын колыштса,кугешныше ида лий,вет тидым Господь ойла.16Чапым пуыза шке Господь Юмыланда,кунам Тудо пычкемышым эше колтен огыл,кунам йолда пычкемышалтше курыклаште эше шӱртнен огыл.Те волгыдым вучаш тӱҥалыда,но волгыдым Тудо колымаш ӱмылыш,тӱп пычкемышыш савыра.17Тиде шомакым огыда колышт гын,мый шолып шорташ,кугешнымашда шотышто мӱгырен шорташ тӱҥалам.Шинчавӱдым йоктара шинчамже,вет Господьын кӱтӱжӧ пленыш наҥгайыме лиеш.18«Каласе кугыжалан да тудын аважлан:”Престол гыч волыза!Вуйда гыч чап вуйшӱдыш камвозын.19Кечывалвел ола-влак авырыме улыт,тушко ок лий пураш.Пленыш наҥгаят пӱтынь Иудам,икте кодде пленыш наҥгаят!”»20Вуйдам нӧлталзада йӱдвел гыч толшо-влакым ончалза:кушто тылат пуымо кӱтӱ,тыйын чапланыше кӱтӱэт?21Мом тый каласет, кунам Господь вуйлатышетлан шогалта нуным,кӧмыт дене тый йолташ лияш шоненат?Азам ыштыше ӱдырамашын орлыкшо тунам тыйым авалта!22Шкаланет тый йодышым пуэт гын:«Молан мый денем тиде лийын?» –Сулыкет кугу да шуко улмыланурвалтет нӧлталыныт да тыйым намысленыт.23Кертеш мо эфиоп шке коваште тӱсшым,а леопард тамгаже-влакым вашталтен?Тыгак теат, осалым ышташ тунеммеке,кертыда мо сайым ыштен?24«Садлан Мый тендам арва семын пуалтен колтем,кудыжым ир мланде гыч толшо мардеж наҥгая.25Теве тыйын шереват,Мыйын тылат висен пуымо ужаш, – ойла Господь, –вет тый Мыйым монденат да шояклан инаненат.26Садлан урвалтет нӧлталме лиеш чуриет дек шумеш,намысле верет почын ончыктымо лиеш!27Ужынам Мый яжарлыкетым,темдыме кумыл йодметым, аташланыметым,кӱкшака ден пасулаште йырнык пашатым ужынам.Ойго тыланет, Иерусалим!Иктаж-кунам тый эрналтат мо?»
Institute for Bible Translation, Finland