Ис63
1Кӧ тиде Едом гыч толеш,Восора гыч йошкар чиеман лишемеш?Кӧ тиде пеш чапле вургеман,кугу вий-куат дене ошкылшо?«Тиде Мый улам – чыныш лекмым увертарыше,уло Мыйын утарен кертше вием».2Молан Тыйын чиемет йошкарге,вургемет виноградым тошкышо еҥын гай?3«Виноградым Мый шкет тошкенам,калык-влак кокла гыч нигӧ пеленем лийын огыл.Шыдем дене тошкенам Мый тудым,кугу шыдем дене темденам.Вӱрышт вургемышкем шыжалтын,да Мый чиемем амыртенам.4Вет ӱчым шуктымо кечым Мый ямдыленам,тыгак сулен налме ий толын шуын.5Ончалынам Мый, но полшышо лийын огыл,ӧрынам Мый – нигӧ пеленем лийын огыл.Тунам шке кидем Мылам сеҥымашым конден,Мыйын шыдем Мыланем полшен.6Шыдем дене Мый калык-влакым тошкенам,кугу шыдем дене нуным темденам,вӱрыштым мландыш йоктаренам».7Господьын порылыкшым мый увертарем,мыланна ыштыме чыла пашажлан Господьым моктем.Израиль деке Тудын кугу суапшым шарныктарем,Тудын кугу чаманымашыжым, ӱшанле улмыжым увертарем.8Тудо каласен: «Чынжымак, нуно Мыйын калыкем улыт,йочам-влак, кудышт огыт ондале», –да лийын Тудо нунын Утарышышт.9Нунын кажне орлыкшо лийын Тудынат орлыкшо,Тудо Шкеак нуным, Суксо семын толын, утарен шоген.Шке йӧратымашыже да порылыкшылан кӧра Тудо нуным утарен,нумал коштын нуным акрет годсо кечылаште.10Но нуно вуянче лийынытда Тудын Святой Шӱлышыжым ойгандареныт.Сандене Тудо нунылан тушманыш савырнен,нунын ваштареш сар дене каен.11Тунам Тудын калыкше шарналтен акрет жапым,Моисей илыме кечылам:«Кушто Тудо, Кӧ нуным теҥыз гоч наҥгаен,кӱтӱжым кӱтӱчышт дене пырля луктын?Кушто Тудо, Кӧ нунын кӧргышкышт Святой Шӱлышыжым пуртен,12Кӧ виян пурла кидше дене Моисейым вӱден наҥгаен,Кӧ нунын ончылно теҥызым шелын,шке лӱмжылан курымаш чапым конден,13Кӧ нуным, пуйто степьыште имньым, келгыт гоч вончыктарен?Шӱртнен огытыл нуно,14лапверыш волышо кӱтӱ семын каеныт –Господьын Шӱлышыжӧ нуным ласкалыкыш наҥгаен».Тыге Тый калыкетым вӱден каенат,шке лӱметым чапландаренат.15Ончал пылпомыш гыч, ончал святой да чапле илыме верет гыч!Кушто мемнан верч чон йӱлен тыршымет, кушто вий-куатет?Кораҥыныт мемнан деч чаманымаш ден порылыкет.16Но вет Тый мемнан Ачана улат!Кеч Авраам мемнам ок пале,Израиль мемнам шкенжынлан ок шотло,но Тый, Господь, мемнан Ачана улат!«Мемнам Сулен налше» – теве Тыйын лӱмет ожнысек.17Молан Тый, Господь, мемнам шке корнет гыч кораҥдет?Молан шӱмнам кӱэмалтшым ыштет,да ме Тый дечет лӱдмым чарненна?Пӧртыл мӧҥгеш – шке тарзет-влаклан кӧра,шке калыкетын тукымыштлан кӧра.18Святой верыштет Тыйын святой калыкет кӱчык жап озаланен,тудым кызыт тушман-влакна тошкат.19Тиде пеш кужун шуйна –пуйто Тый нигунам мемнан дене озаланен отыл,пуйто ме Тыйын манын лӱмдалтын огынал.
Institute for Bible Translation, Finland