Иез9
1Вара мый Господьын кугу йӱкын каласымыжым колынам: «Кӧмыт олам наказатлышаш улыт, тек лишемыт, кажныжын кидыштыже пуштедыше саргурал лийже!»2Мый ужынам: йӱдвелыш ончышо кӱшыл капка деч кудытын толыт, кажныжын кидыштыже – пуштедыше саргурал. Нунын коклаште эше йытын вургемым чийыше ик еҥ лийын, тудын кыдалыштыже возкалышын ӱзгарже-влак кеченыт. Нуно лишемыныт да той жертвенник воктене шогалыныт.3Тунам херувим ӱмбалне улшо Израиль Юмын чапше нӧлталтын да храмын омса лондемже дек толын. Йытын вургемым чийыше еҥым, кӧн кыдалыштыже возкалышын ӱзгарже-влак кеченыт, Господь ӱжын4да тудлан каласен: «Тиде ола гоч, Иерусалим гоч, эрте да олаште ышталтше йырнык паша-влаклан кӧра шӱлыкаҥын ойгырышо еҥ-влакын саҥгашкышт палым шынде».5А молылан мый тыге каласымыжым колынам: «Тудын почеш ола мучко кайыза да пуштедыза, ида чамане, ида серлаге!6Шоҥго ден самырык пӧръеҥым, ӱдырым, йоча ден ӱдырамашым – чылам пытарыза, пуштса, но кӧн ӱмбалне пале лиеш, ик еҥымат ида тӱкале. Мыйын святой верем деч тӱҥалза». Нунышт храм ончылно шогышо кугурак-влак деч тӱҥалыныт.7Вара Тудо саде куд еҥлан каласен: «Храмым шакшылыза – кудывечыже-влакым колышо-шамыч дене темыза! Тарваныза!» Нунышт лектыныт да олаште пуштедаш тӱҥалыныт.8Нуно пуштеденыт, а мый шкетын кодынам. Тунам мый кумык возынам да кычкыралынам: «О, Господь Юмем! Иерусалим ӱмбак шыдетым йоктарен, Тый Израильын илен кодшо калыкшым пӱтынек пытарынет мо?»9Тудо мыланем вашештен: «Израиль ден Иудан сулыкшо кугу, пеш кугу. Тиде мланде вӱр дене, ола чындымылык дене темыныт. Нуно ойлат: ”Господь тиде мландым коден каен, Господь ок уж”.10Садлан Мый нуным ом чамане, ом серлаге. Мом ыштылмыштым Мый вуй ӱмбакышт савырем».11Тунам йытын вургемым чийыше еҥ, кӧн кыдалыштыже возкалышын ӱзгарже-влак кеченыт, толын да увертарен: «Мом Тый мылам кӱштышыч, мый чыла шуктышым».
Institute for Bible Translation, Finland