Иез10
1Мый ужынам: херувим-влакын вуй ӱмбалысе тувраш ӱмбалне ала-мо сапфир гай, престол гай койшо лийын.2Йытын вургемым чийыше еҥлан Господь каласен: «Херувим-влак йымалне улшо орава-шамыч коклашке пуро, тушто херувим-влак коклаште йӱлышӧ тулшолым урзо тич нал да ола ӱмбаке кудалте». Тудо пурен, а мый ончен шогенам.3Саде еҥын пурымыж годым херувим-влак храмын пурла велныже шогеныт, кӧргӧ кудывечым пыл темен.4Господьын чапше херувим ӱмбач нӧлталтын да храмын омса лондемже дек куснен. Храм пыл дене, а кудывече Господьын чапшын йолгалтмыж дене темыныт.5Херувим-влакын шулдыр йӱкыштым эсогыл тӱжвал кудывечыште колаш лийын. Тиде йӱк Чылакертше Юмын ойлышо йӱкшӧ гай лийын.6Кунам Тудо йытын вургемым чийыше еҥлан «Орава-влак кокласе, херувим-влак кокласе тулым нал» манын каласен, саде еҥ лишемын да орава воктене шогалын.7Тунам херувим-влак кокла гыч иктыже нунын коклаште улшо тул деке кидшым шуялтен, тудым налын да йытын вургемым чийыше еҥын урзышкыжо пыштен. Тудыжо налын да тушеч лектын.8Херувим-влакын шулдырышт йымалне айдеме кид гай койын.9Херувим-влак воктене мый ныл оравам ужынам – кажне херувим воктене ик орава дене. Орава-влак топаз дене ыштымыла койыныт.10Сынышт дене нуно нылытынат икгай лийыныт, пуйто ик орава кӧргыштӧ вес орава верланен.11Кунам нуно каеныт, савырныде, ныл велышкат каен кертыныт. Кушко вуйышт ончен, нуно тушко каеныт. Кайымышт годым нигуш савырнен огытыл.12Нунын капышт, тупышт, кидышт, шулдырышт да оравашт – кажне ныл херувимын оравашт – мучко шинча-влак лийыныт.13Нине оравам «галгал» манын лӱмдымым колынам.14Кажне херувимын ныл чурийже лийын: икымше – херувимын чурийже, кокымшо – айдемын, кумшо – левын, нылымше – арыслангайыкын чурийже.15Херувим-влак нӧлталтыныт. Нуно Ховар эҥер воктене ужмо чонан ӱжака-шамычак лийыныт.16Кунам херувим-влак каеныт, воктенышт орава-шамычат каеныт, а кунам херувим-влак, мландымбач нӧлталташ манын, шулдырыштым шаралтеныт, орава-шамыч нунын деч кодын огытыл, пеленыштак лийыныт.17Кунам херувим-влак шогалыныт, нунат шогалыныт, а кунам херувим-влак нӧлталтыныт, нунат нӧлталтыныт, вет орава кӧргыштат чонан ӱжака-влакын шӱлышышт лийын.18Господьын чапше храмын омса лондемже деч кораҥын да херувим-влак ӱмбалан чарнен шогалын.19Херувим-влак шулдырыштым шаралтеныт да мыйын шинча ончылнем мландымбач нӧлталтыныт. Кунам нуно каеныт, орава-шамычат пеленышт лийыныт. Нуно Господьын пӧртшын эрвел капка оралтышкыже пурымо вер дене шогалыныт, нунын ӱмбалнышт Израиль Юмын чапше лийын.20Тиде саде чонан ӱжака-влакак лийыныт, кудым мый Ховар эҥер дене улмем годым Израиль Юмын престолжо йымалне ужынам. Тунам мый нунын херувим улмыштым умыленам.21Кажныжын ныл чурийже да ныл шулдыржо лийыныт, а шулдырышт йымалне айдеме кид гай койын.22Чурийышт, нунын сынышт тугаяк лийын, могайым мый Ховар эҥер воктене ужынам. Кажныже, чурийже кушко ончен, тудо велыш тура каен.
Institute for Bible Translation, Finland